Micah 5
1Háy, Erusalim, áskerlerińdi topla!Dushpanlar bizdi qamal qıldı.
Olar tayaq penen Izrail húkimdarınıń betine urdı.
Beytlehemnen shıǵatuǵın kósem
2Jaratqan Iye bılay deydi:«Háy, Efrata aymaǵındaǵı Beytlehem,
Yahudadaǵı qalalardıń kishkenesi bolsań da,
Izraildı Meniń atımnan basqaratuǵın kósem sennen shıǵadı.
Onıń násili zamannıń baslanıw dáwirine barıp taqaladı».
3Sonıń ushın, hámiledar hayal kóz jarıp, ullı bolǵanǵa deyin,
Jaratqan Iye Izrail xalqın dushpanlarǵa táslim qıladı.
Keyin sol súrgindegi qalǵan tuwısqanları qaytıp,
Izrail xalqına qayta qosıladı.
4Ol kelip, Jaratqan Iyeden alǵan kúshi menen,
Qudayı Jaratqan Iyeniń atınıń ullılıǵı menen,
Súriwin baǵadı.
Pútkil dúnya onıń ullılıǵın tán aladı.
5Tınıshlıq ornatıwshı ol boladı.
Qutqarılıw hám tazalanıw
Assiriyalılar elimizge hújim etip,Qorǵanlarımızdı jarıp ótkende,
Olarǵa qarsı jeti jetekshi hám segiz basshı tayınlaymız.
6Olar Assiriya jerlerine qılısh penen,
Nimrod jerlerine qanjar menen húkimdarlıq etedi.
Assiriyalılar elimizge hújim etip, shegaramızǵa kirip kelse,
Bizlerdi usı kósem qutqaradı.
7Kóp xalıqlar arasında,
Yaqıp xalqınıń qalǵanları,
Jaratqan Iyeniń jibergen shıǵınday,
Maysa shóplerdiń ústine jawǵan jawınday boladı.
Olar adamzatqa ǵárezli bolmaydı,
Hesh kimnen járdem de kútpeydi.
8Kóp milletler ishinde, kóp xalıqlar arasında,
Yaqıp xalqınıń qalǵanları,
Toǵay haywanları arasındaǵı arıslanday,
Qoy súriwi arasına kirip alǵan,
Jırtqısh arıslanday boladı.
Júrgen jollarında hámmege kútilmegende taslanadı.
Olardıń qolınan hesh kim qutqara almaydı.
9Háy, Izrail, dushpanlarıńdı jeńeseń,
Barlıq dushpanlarıń qırılıp ketedi.
10«Sol kúni, – deydi Jaratqan Iye, –
Atlarıńızdı qırıp taslayman,
Sawash arbalarıńızdı sındırıp taslayman.
11Wayran qılaman elińizdegi qalalardı,
Jer menen jeksen qılaman barlıq qorǵanlarıńızdı.
12Sıyqırshılıqqa shek qoyaman,
Arańızda birde bir palker qaldırmayman.
13Joq qılaman but hám kiyeli taslarıńızdı,
Artıq tabınbaysız qollarıńız benen islegen butlarıńızǵa,
14Arańızdaǵı kiyeli aǵashlardı qoparıp taslayman,
Qalalarıńızdı jer menen jeksen qılaman.
15Maǵan boysınbaǵan milletlerge,
Óz qáhár hám ǵázebimdi tógip, ósh alaman».
Copyright information for
KaaIBT22L