Mic 6 | KaaIBT22L | STEP | Jaratqan Iyeniń aytqan mına sózine qulaq salıń: «Qáne, turıń! Shaǵımıńızdı tawlar aldında aytıń, Tóbeshikler dawısıńızdı esitsin».

‏ Micah 6

Jaratqan Iyeniń Óz xalqın ayıplawı

1 Jaratqan Iyeniń aytqan mına sózine qulaq salıń:
«Qáne, turıń! Shaǵımıńızdı tawlar aldında aytıń,
Tóbeshikler dawısıńızdı esitsin».
2 Háy, tawlar Jaratqan Iyeniń ayıplawına qulaq salıń!
Háy, jer júziniń bekkem tiykarları Oǵan qulaq túriń,
Sebebi Jaratqan Iye Óz xalqına qarsı dawın aytar,
Izrail xalqı menen tartısar.
3 Jaratqan Iye bılay deydi:
«Háy, xalqım, Men saǵan ne qıldım?
Qáne, juwap ber, saǵan qanday awırmanlıǵım tústi?!
4 Mısırdan seni alıp shıqqan edim,
Azat etken edim qullıq moyıntırıǵınan.
Saǵan jolbasshı bolsın dep,
Muwsanı, Xarondı hám Máriyamdı jibergen edim.
5 Háy, xalqım, Moab patshası Balaqtıń sizlerge qarsı jawız niyetin,
Beor ulı Bilamnıń oǵan qalay juwap bergenin esle. ^{▼▼ San 22–24.}
Shittimnen Gilgalǵa deyingi bolǵan waqıyalardı esle, ^{▼▼ Eshu 3–4.}
Sonda bilip alasań seni qanday etip qutqarǵanımdı».

Haqıyqıy boysınıwshılıq

6 Jaratqan Iyeniń aldına ne alıp barayın?
Joqarıdaǵı Qudayǵa qalay sıyınayın?
Oǵan arnap jandırılatuǵın qurbanlıq bereyin be?
Bir jasar tananı usınayın ba?
7 Oǵan arnap mıńlap qoshqarlardı soysam,
Záytún mayın dárya qılıp aǵızsam,
Jaratqan Iyeniń mennen kewli tolar ma eken?
Ayıbım ushın tuńǵısh ulımdı bereyin be?
Gúnam ushın óz perzentimdi qurban eteyin be?
8 Háy, adamzat, neniń jaqsı ekenin,
Jaratqan Iye bildirdi saǵan,
Onıń sennen talap qılatuǵını ibaratdur mınadan:
Ádillik qılıp, súyispenshilikke sadıq bol,
Múláyim bolıp, Quday menen birge júr.

Izraildıń gúnası hám jazası

9 Jaratqan Iye qala xalqına dawıslap bılay deydi,
Oǵan qulaq salıw – danalıqdur:
«Háy, tıńlań, xalıq hám qala jámiyeti!
10 Úylerin haram baylıq penen toltırıp atırǵanlarǵa,
Nadurıs ólshemlerge qalay itibar bermeyin.
11 Táreziden jegenine,
Nadurıs ólshem tas qollanǵanına,
Qalay shıday alaman?
12 Zorlıq qıladı qaladaǵı baylar,
Jalataydur qala xalqı da,
Tillerinen bolsa jalǵan sózler shıǵar.
13 Sonıń ushın, Men sizlerdi uraman,
Gúnalarıńız ushın wayran qılaman.
14 Sizler jeysiz, biraq toymaysız,
Hámme waqıtta ash qaladı qarnıńız.
Zat jıynaysız, onı saqlay almaysız,
Jıynap-tergenińizdi qılısh penen joq qılaman.
15 Egesiz, biraq orıp almaysız,
Záytún mayın sıǵıp alasız,
Biraq maydan ústińizge súrte almaysız,
Júzim iskenjede júzim sıǵasız,
Biraq onıń sharabınan ishe almaysız.
16 Óytkeni erdińiz patsha Omriydiń úrp-ádetlerine,
Patsha Axabtıń áwladınıń jawız qılmıslarına. ^{▼▼ 3Pat 16:21-34.}
Olardıń másláháti menen jasadıńız,
Sonlıqtan Men sizlerdi qorqınıshlı kóriniske aylandıraman.
Sizlerdi kórgenlerdiń janı túrshigedi,
Barlıq xalıqlardıń aldında ^{▼▼ Barlıq xalıqlardıń aldında – Áyyemgi grekshe awdarmadan. Evreyshe qoljazbalarda «Meniń xalqımnıń aldında».} nasaqqa qalasız».