‏ Micah 7

Izrail xalqınıń jawız isleri

1Wah, sorım qurıdı!
Júzimzar jıyın-terimi bolınıp,
Jazǵı miyweler terip alınǵannan soń,
Shaqalarınan jewge bir solqım da taba almaǵan,
Bir dana ánjirge zar bolǵan adam sıyaqlıman.
2Bul elde Qudayǵa sadıq adam qalmadı,
Durıs júrgen hesh kim qalmadı adamlar arasında.
Qan tógiw ushın adamlar ańlıp jatar,
Duzaq quradı tuwısqanlar bir-birine.
3Jamanlıq qılıwǵa sheber olar,
Hámeldar hám qazı para aladı.
Kúshli adam qálegenin zorlıq penen qıldıradı,
Birgelikte haqlıqtı buzıp kórsetedi.
4Olardıń eń jaqsısı jantaqqa uqsaydı,
Hújdanlısı bolsa, tikenekten beter.
Biraq sizler kútip turǵan kúnleri,
Jetip keldi jazalanatuǵın kúnleri,
Endi olar sasqalaqlap qaladı.
5Isenbeń qońsıńızǵa, súyenbeń dostıńızǵa.
Qoynıńızda hayalıńız jatqanda,
Qum quyıń awzıńızǵa.
6Óytkeni sol waqıtları ul óz ákesin xorlaydı,
Qız anasınıń betinen aladı,
Kelin bolsa, qáyin enesine qarsı turadı.
Adamnıń dushpanları óziniń úy-ishi boladı.
7Biraq men Jaratqan Iyege kóz tigemen,
Qutqarıwshım bolǵan Qudaydı úmit penen kútemen,
Sózsiz esitedi meni Qudayım meniń.

Jaratqan Iyeniń qutqarıwı

8Jaǵdayımdı kórip, shad bolmań, háy, dushpanlarım!
Jıǵılsam da, ózim turaman.
Qarańǵılıqta qalsam da, Jaratqan Iye maǵan nur boladı.
9Jaratqan Iyege qarsı gúna isledim.
Endi Onıń ǵázebine shıdayman.
Biraq Ol meni jaqlap, aqlaydı.
Jarıqlıqqa meni alıp shıǵadı,
Sonda Onıń ádilligin kóremen.
10Dushpanım bunı kóredi,
«Qudayıń Jaratqan Iye qay jerde?» – dep masqara qılǵan,
Sol dushpanım shermende boladı.
Onıń qulawın óz kózim menen kóremen,
Solay etip, ayaq astı boladı kóshedegi batpaq sıyaqlı.

11Háy, Erusalim, mınaday waqıt keledi:
Seniń diywallarıń qayta qurıladı,
Shegarań seniń keńeyip ketedi.
12Sol waqıtta hámme jerden xalıqlar keledi.
Assiriyadan Mısırǵa deyin,
Mısırdan Evfrat dáryasına deyin sozılǵan jerlerden,
Uzaq teńiz boylarınan hám alıs taw janbawırlarınan,
Aǵıp keledi kóp xalıqlar.
13Biraq ishinde jasap atırǵanlardıń qılmıslarınan,
Dúnya júzi qańırap bosap qaladı.

Mixanıń duwası hám Jaratqan Iyege alǵıs aytıwı

14Jaratqan Iye, xalqıńnıń shopanı bol,
Átirapları ónimdarlı jerler,
Biraq toǵay ishinde jalǵız jasaytuǵın súriwińdi,
Óz hasań menen basqara gór.
Uzaq ótmishte bolǵanınday,
Bashan hám Gilad jaylawlarında otlata gór.
15Bizlerdi Mısırdan alıp shıqqan kúnlerińdegidey,
Káramatlarıńdı kórset xalqıń ushın.
16Káramatlarıńdı kórgen milletler,
Kúsh-qúdiretlerine jarasa shermende boladı.
Qorqınıshtan qolları menen awızların basıp,
Qulaqları olardıń gereń bolıp qaladı.
17Jılan hám jer bawırlawshılar sıyaqlı topıraq jalaydı olar,
Qorqqanınan titirep qorǵanlarınan shıǵadı.
Qudayımız Jaratqan Iye, olar húreyi ushıp,
Qaltırap Seniń aldıńa keledi.

18Quday, Saǵan uqsası bar ma eken?
Óz xalqıńnıń qalǵanlarınıń,
Jınayatların hám kóterilislerin keshiretuǵın basqa Quday joqdur.
Máńgige ǵázeplenbesseń xalqıńa,
Sebebi sadıq miyrimińdi kórsetiwdi maqul kóreseń.
19Sen bizlerge jáne miyrim-shápáát qılarsań,
Ezip taslarsań ayıplarımızdı ayaǵıń astında,
Pútkil gúnalarımızdı teńiz túbine ılaqtırasań.
20Ótmishte ata-babalarımızǵa, Ibrayımǵa hám Yaqıpqa ant iship, wáde bergenseń,
Olardıń urpaǵına bergen haqıyqat sózińde sadıq turasań.