Nah 1 | KaaIBT22L | STEP | Bul Nineviya qalası haqqında payǵambarshılıq sózi. Elqoshlı Naxumǵa berilgen ayan mınaday:

‏ Nahum 1

1 Bul Nineviya qalası haqqında payǵambarshılıq sózi. Elqoshlı Naxumǵa berilgen ayan mınaday:

Jaratqan Iyeniń Nineviyaǵa qarsı ǵázebi

2 Jaratqan Iye – qızǵanshaq, ósh alıwshı Qudaydur,
Ol ósh aladı hám ǵázepke tolıdur.
Qarsı shıqqanlardan ósh alar,
Dushpanlarına qarsı ǵázeplenip júrer.
3 Jaratqan Iye sabır-taqatlı,
Biraq Ol kúshli, qúdiretlidur.
Ayıplınıń ayıbın sózsiz jazalaydı,
Júrgen jolı quyın menen dawıl boladı,
Ayaq astınan shańday qoyıw bultlar kóteriledi.
4 Ol bir buyrıq penen qurǵatar teńizdi,
Keptirip taslar pútkil dáryalardı.
Quwrap qalar Bashannıń hám Karmel tawınıń jasıl shópleri,
Solıp qalar Lebanonnıń gúlleri.
5 Jaratqan Iyeniń aldında tawlar titirer,
Dárgayında tóbeshikler erip keter.
Ol kóringende, jer silkiner,
Pútkil jer júzi hám ondaǵı barlıq qaltırap keter.
6 Kim qarsı tura alar Onıń qáhárine?
Kim shıday alar Onıń lawlaǵan ǵázebine?
Ǵázebi ottay lawlap jayılar,
Jartaslar shıl-párshe bolıp keter.

7 Jaratqan Iye jaqsıdur,
Qıynalǵan waqıtta qorǵandur,
Qorǵaydı Ol Ózinen pana tapqanlardı.
8 Biraq kúshli suw tasqını menen joq eter Nineviyanı,
Dushpanlarınıń izine túsip, qarańǵılıqqa aydaydı.
9 Jaratqan Iyege qarsı hesh qanday joba dúzbe!
Óytkeni Ol seni joq qıladı.
Ekinshi márte Oǵan qarsı tura almaysań.
10 Shırmalǵan tikendey, más bolıp batırday bolǵan sizler,
Qurǵaq sabanday jandırılıp joq bolasızlar.
11 Háy, Nineviya, Jaratqan Iyege qarsı joba dúzetuǵın,
Jawız másláhát beretuǵın sennen shıqtı.

12 Jaratqan Iye Yahuda xalqına bılay deydi:
«Assiriyalılar kúshli hám sansız bolǵanı menen de,
Olar qırılıp, joq bolıp ketedi.
Háy xalqım, seniń basıńdı azapqa salǵan edim,
Endi bunnan bulay azapqa duwshar etpeymen,
13 Moyıntırıǵıńdı sındırıp, Assiriyanıń qolınan azat qılaman».

14 Assiriya haqqında Jaratqan Iye mınaday buyrıq berdi:
«Atıńızdı dawam etiwshi zúryadıńız bolmasın,
Joq qılaman qudaylarıńnıń úyindegi but músinlerdi,
Jaǵımsız xalıq bolǵanıń ushın, tayarlayman qábirińdi».

15 Mine, xosh xabar alıp keliwshi,
Tınıshlıq xabarı menen tawlardan asıp keler.
Háy, Yahuda xalqı, belgile bayramlarıńdı,
Orınla Qudayǵa bergen wádelerińdi.
Endi dushpanlarıń bastırıp kelmes elińe,
Óytkeni tolıǵı menen joq etildi olar.