Nah 2 | KaaIBT22L | STEP | Basqınshılar bastırıp kiyatır, háy Nineviya, qorǵanıńdı bekkemle, Jollardı qadaǵala, belińdi bekkem buwıp, bar kúshińdi jıyna.

‏ Nahum 2

Nineviyanıń qulawı

1 Basqınshılar bastırıp kiyatır, háy Nineviya, qorǵanıńdı bekkemle,
Jollardı qadaǵala, belińdi bekkem buwıp, bar kúshińdi jıyna.

2 Dushpanları Izraildı tas-talqan etip,
Júzim baǵların wayran etken edi.
Biraq Yaqıptıń aldınǵı ullılıǵın qayta tiklegendey etip,
Jaratqan Iye Izraildıń ullılıǵın da qayta tikleydi.

3 Nineviya, dushpanıńnıń áskerleriniń qalqanı qıp-qızıldur,
Láshkerleriniń kiyimi qırmızı reńdur,
Sawash arbaları sawash kúni jalınday jaltıldaydı,
Nayzaları hawada shayqalıp turadı.
4 Kósheler boylap jelip ushar sawash arbaları,
Zuwıldaydı qala maydanlarında arman-berman,
Janıp turǵan shom sıyaqlı ot shıǵarıp, jıldırım sıyaqlı jarqıraydı.
5 Sárkárdası láshkerbasıların jıynaydı,
Alǵa basqanda, olar óz jolında asıǵadı.
Qalqanların ózlerine pana qılıp,
Qala diywalına japırıladı.
6 Dárya bógetleri ashıladı,
Saray suw menen shayılıp, jer menen jeksen boladı.
7 Aldın ala járiyalanǵanday súrgin etiler Nineviya,
Onıń shorıları kepterdey nala sheger,
Ókinishten olar kókiregine urar.
8 Nineviya qalası suwı jıǵıp ketken háwiz yańlı,
Qashıp keter ishindegi xalıqlar,
Artınan: «Toqtańlar, toqtańlar!» dep baqırar,
Biraq qayrılıp qaramas hesh kim artına.

9 Tonalǵan gúmis penen altını,
Tawısılmaydı Nineviyanıń qımbatbaha zatları,
Ol tolıdur hár túrli ǵáziynege.

10 Quladı, jer menen jeksen bolıp, wayran boldı Nineviya.
Qorqınıshtan ruwxları túsip ketti,
Dizeleri qaltırap, titirep ketti deneleri,
Solǵın tartıp, bozardı hár biriniń júzi.

11 Ne bolıp qaldı arıslan inine uqsaǵan Nineviyaǵa?
Arıslan óz balaların baqqan sol jerge.
Arıslan hám ana arıslan júrgen waqıtta,
Qáwip-qátersiz edi olardıń balaları.
12 Arıslan jeterlishe ań awlaǵan edi balaları ushın,
Ana arıslan ushın oljaların bawızlaǵan edi.
Awlaǵan awları menen óz inin,
Oljalar menen toltırǵan edi óz uyasın.

13 Álemniń Jaratqan Iyesi bılay deydi: «Saǵan qarsıman, háy, Nineviya! Sawash arbalarıńdı jandırıp jiberemen. Kúshli arıslanlarıń qılıshtan óledi. Endigiden bılay, sen tonawshılıq qıla almaysań. Xabarshılarıńnıń dawısı artıq esitilmeydi».