Nehemiah 1
Nexemiyanıń duwası
1Xaxaliya ulı Nexemiyanıń sózleri: Persiya patshası Artakserkstiń húkimdarlıǵınıń jigirmalanshı jılınıń kislew ayında men Suza qorǵan qalasında edim. 2Sonda tuwısqanlarımnan biri Xananiy ayırım adamlar menen birge Yahudadan keldi. Men olardan súrginnen qutılıp qalıp, tiri qalǵan yahudiyler hám Erusalim qalası tuwralı soradım. 3Olar maǵan súrginnen qutılıp qalıp, Yahuda wálayatında tiri qalǵanlardıń qattı qıyınshılıq hám shermendelik awhalda qalǵanı, Erusalim diywallarınıń wayran etilip, dárwazalarınıń órtep jiberilgeni tuwralı aytıp berdi. 4Bul sózlerdi esitkenimde, otırıp jıladım. Bir neshe kún qayǵıǵa batıp júrdim, oraza tutıp, aspannıń Qudayına bılay dep duwa ettim: 5«O, aspannıń Qudayı Jaratqan Iye! Sen ullı hám aybatlı Qudaysań! Sen Ózińdi súygenler hám buyrıqlarıńdı orınlaǵanlar menen dúzgen kelisimińe sadıq qalasań. 6Qulıńnıń duwasın esitiw ushın qulaqlarıń túriwli, kózleriń ashıq bolǵay. Endi Seniń aldıńda qullarıń bolǵan Izrail xalqı ushın kúni-túni duwa etip, olardıń gúnaları ushın táwbe qılaman. Awa, bizler Seniń aldıńda gúna isledik, men de, meniń ákemniń úy-ishi de gúna isledi. 7Bizler Seniń aldıńda qattı jerkenishli islerdi isledik. Seniń qulıń Muwsaǵa bergen buyrıqlarıńa, qaǵıydalar hám nızamlarıńa boysınbadıq. 8Endi qulıń Muwsaǵa bergen mına sózlerińdi esińe ala gór: „Eger sizler Maǵan opasızlıq etseńiz, Men sizlerdi xalıqlar arasına shashıp jiberemen. 9Biraq Maǵan qaytıp kelseńiz hám buyrıqlarıma boysınıp, olardı orınlasańız, jerdiń eń shetine quwǵın qılınǵan bolsańız da, sizlerdi ol jerden jıynap alaman. Atımdı ornalastırıw ushın, tańlap alǵan jerge sizlerdi alıp kelemen“. ▼ 10Izrail xalqı – Seniń qullarıń hám Óz xalqıń. Ullı qúdiretiń hám kúshli qolıń menen olardı azat etkenseń. 11O, Iyem! Qulıń bolǵan meniń duwama hám Seniń atıńdı húrmet qılıwdan zawıqlanatuǵın qullarıńnıń duwasına qulaq túre gór. Búgin maǵan áwmet berip, patshada maǵan degen rehim oyata gór». Sol waqıtları men patshanıń sharap quyıwshısı edim.
Copyright information for
KaaIBT22L