‏ Nehemiah 10

1Minnetlemege mór basqanlar mınalar edi:

Xaxaliya ulı hákim Nexemiya hám Sedekiya.

2Ruwxaniyler:

Seraya, Azariya, Eremiya, 3Pashxur, Amariya, Malkiya, 4Xattush, Shebaniya, Mallux, 5Xarim, Meremot, Obadiya, 6Daniel, Ginneton, Barux, 7Meshullam, Abiya, Miyamin, 8Maaziya, Bilgay, Shemaya.

9Lebiyliler:

Azaniya ulı Eshua, Xenadad urpaqlarınan Binnuy, Qadmiel, 10olardıń tuwısqanları: Shebaniya, Hodiya, Kelita, Pelaya, Xanan, 11Mixa, Rexob, Xashabiya, 12Zakkur, Sherebiya, Shebaniya, 13Hodiya, Baniy, Beninu.

14Xalıq basshıları:

Parosh, Paxat-Moab, Elam, Zattu, Baniy, 15Bunniy, Azgad, Bebay, 16Adoniya, Bigway, Adin, 17Ater, Xizkiya, Azzur, 18Hodiya, Xashum, Betsay, 19Xarif, Anatot, Nebay, 20Magpiash, Meshullam, Xezir, 21Meshezabel, Sadoq, Yaddua, 22Pelatiya, Xanan, Anaya, 23Hoshea, Xananiya, Xashshub, 24Halloxesh, Pilxa, Shobek, 25Rexum, Xashabna, Maaseya, 26Axiya, Xanan, Anan, 27Mallux, Xarim, Baana.

28Qalǵan xalıqtıń hámmesi: ruwxaniyler, lebiyliler, dárwaza qarawılları menen Ibadatxana xızmetshileri, qosıqshılar, Qudaydıń Nızamına muwapıq basqa xalıqlardan bóleklengen hár bir adam hayalları hám oqılǵandı túsine alatuǵın ul-qızları menen birge 29óz tuwısqanlarına, yaǵnıy aqsúyeklerge qosılıp bılay dep ant ishti: «Bizler Qudaydıń Óz qulı Muwsa arqalı bergen Nızamı boyınsha jasaymız, Iyemiz bolǵan Jaratqan Iyeniń barlıq buyrıqlarına, nızam hám qaǵıydalarına tolıq boysınamız. Al boysınbaǵanlarǵa nálet jawsın! 30Átirapımızdaǵı xalıqlar menen qız alıp, qız berispeymiz. 31Eger átiraptaǵı xalıqlar Shabbat kúni qanday da bir zatın yamasa biydayın satıw ushın alıp kelse, olardan Shabbat kúni yamasa qanday da bir muxaddes kúnde zat satıp almaymız. Hár jeti jıldıń jetinshi jılında bir ret jerdi súrmeymiz hám qarızlarımızdan keshemiz. 32Qudayımızdıń Úyindegi xızmet ushın jılına shekeldiń úshten birin beriw minnetlemesin ózimizge alamız. 33Bul aqsha usınılǵan nanlar, kúndelikli ǵálle sadaqaları, kúndelikli jandırılatuǵın qurbanlıqlar, Shabbat kúni, Jańa ay bayramları, belgilengen bayramlar, muxaddes sadaqalar, Izrail urpaqların páklew ushın beriletuǵın gúna qurbanlıqları hám Qudayımızdıń Úyindegi basqa isler ushın jumsaladı. 34Bizler – ruwxaniyler, lebiyliler hám xalıq birgelikte shek taslaymız. Ol arqalı Nızamda jazılǵanına muwapıq, Qudayımız Jaratqan Iyeniń qurbanlıq ornında jaǵılatuǵın otındı hár jılı belgilengen waqıtta Qudayımızdıń Úyine qaysı áwladtıń alıp keletuǵının belgilep alamız. 35Hár jılı eginimizdiń hám hár bir miywe aǵashımızdıń birinshi ónimin Jaratqan Iyeniń Úyine alıp kelemiz. 36Nızamda jazılǵanınday, tuńǵısh ullarımızdı, mallarımızdıń birinshi tóllerin, sonday-aq iri hám mayda mallarımızdıń birinshi tóllerin Qudayımızdıń Úyine, sol jerde xızmet etip atırǵan ruwxaniylerge alıp kelemiz. 37Jáne qamırdıń birinshi zuwalasınan jabılǵan nanımızdı, basqa ónimlerimizden beriletuǵın sadaqalardıń, barlıq miywe aǵashlarımızdıń miyweleriniń, sharaptıń hám záytún mayınıń dáslepki ónimlerin Qudayımızdıń Úyindegi zatlar saqlanatuǵın bólmege qosıw ushın ruwxaniylerge beremiz. Al jerimizden óngen ónimnen beriletuǵın onnan birin lebiylilerge beremiz. Sebebi diyxanshılıq penen shuǵıllanatuǵın hámme qalalardan alınatuǵın onnan birdi lebiyliler jıynaydı. 38Lebiyliler onnan birin jıynap atırǵanda, Xaron urpaǵınan bolǵan bir ruwxaniy olardıń qasında boladı. Lebiyliler ózleri jıynaǵan onnan birden onnan birin Qudaydıń Úyindegi zatlar saqlanatuǵın bólmege beredi. 39Izrail xalqı hám lebiyliler biydaydan, jańa sharaptan, záytún mayınan beriletuǵın sadaqalardı sol zatlar saqlanatuǵın bólmelerge alıp keledi. Ol jerde Muxaddesxana buyımları saqlanadı. Sonday-aq ruwxaniyler, dárwaza qarawılları hám qosıqshılar xızmet waqtında sol jerde boladı.

Bizler Qudayımızdıń Úyin qarawsız qaldırmaymız».