Neh 13 | KaaIBT22L | STEP | Sol kúni Muwsanıń kitabı xalıqqa oqıp berildi. Kitapta bılay dep jazılǵan edi: «Ammonlar menen moablılar hesh qashan Qudaydıń jámiyetine kire almaydı.

‏ Nehemiah 13

Nexemiyanıń sońǵı kirgizgen jańalıǵı

1 Sol kúni Muwsanıń kitabı xalıqqa oqıp berildi. Kitapta bılay dep jazılǵan edi: «Ammonlar menen moablılar hesh qashan Qudaydıń jámiyetine kire almaydı. 2 Sebebi olar Izrail xalqı Mısırdan shıqqanda, olardı suw hám nan menen qarsı alıwdıń ornına, izraillılardı ǵarǵaw ushın Bilamdı jallap aldı. Biraq Qudayımız ǵarǵıstı jarılqawǵa aylandırdı». ^{▼▼ Nzm 23:3-5.} 3 Bul Nızamdı esitkennen soń, Izrail xalqı barlıq ózge millet adamların ózlerinen bólekledi.

4 Bunnan aldın Qudayımızdıń Úyindegi zatlar saqlanatuǵın bólmege ruwxaniy Elyashib qadaǵalawshı etip tayınlanǵan edi. Ol Tobiya menen jaqın baylanısta bolıp, 5 Tobiyaǵa úlken bir bólme ajıratıp bergen edi. Burın bul bólmege ǵálle sadaqaları, xosh iyisli tútetki, Ibadatxana buyımları, sonday-aq nızam boyınsha lebiylilerge, qosıqshılarǵa hám dárwaza qarawıllarına tiyisli bolǵan dán, sharap hám záytún mayınan alınǵan onnan birler, ruwxaniylerge berilgen sadaqalar qoyılatuǵın edi.

6 Biraq bul isler bolıp atırǵan waqıtta men Erusalimde emes edim. Sebebi Babiloniya patshası Artakserkstiń patshalıǵınıń otız ekinshi jılı men patshaǵa ketken edim. Bir neshe waqıt ótkennen keyin, men patshadan ruxsat alıp, 7 Erusalimge qayttım. Sonda Elyashib islegen jaman is, yaǵnıy Elyashibtiń Tobiyaǵa Qudaydıń Úyiniń háwlisinen bir bólme ajıratıp bergenin bildim. 8 Buǵan qattı ǵázebim kelip, Tobiyaǵa tiyisli hámme zatlardı bólmeden shıǵarıp, ılaqtırdım. 9 Keyin bólmelerdi páklewdi buyırdım. Sońınan Qudaydıń Úyine tiyisli buyımlardı, ǵálle sadaqaların hám xosh iyisli tútetkini ol jerge qaytadan qoydırdım.

10 Jáne de, lebiylilerge óz úlesleri berilmegenin, sol sebepli Ibadatxanada xızmet etip júrgen lebiyliler menen qosıqshılar óz atızlarına ketip qalǵanın bildim. 11 Sonda el basshılarına keyip, olarǵa: «Qudaydıń Úyi nege qarawsız qaldı?» – dedim. Sońınan ketip qalǵanlardıń hámmesin qayta jıynap, óz orınlarına xızmetke qoydım. 12 Sonda pútkil Yahuda xalqı dánnen, sharaptan hám záytún mayınan beretuǵın onnan bir bólegin zatlar saqlanatuǵın bólmelerge alıp kele basladı. 13 Men ruwxaniy Shelemiyanı, ulama Sadoqtı hám lebiylilerden Pedayanı zatlar saqlanatuǵın bólmelerge juwapker etip, al Mattaniyanıń aqlıǵı, Zakkurdıń ulı Xanandı olarǵa járdemshi etip qoydım. Bular sadıq adamlar edi. Olardıń wazıypası Lebiy urıwınan bolǵan tuwısqanlarına úleslerin bólip beriwden ibarat edi.

14 Qudayım, meni yadqa ala gór. Qudayımnıń Úyi ushın hám ondaǵı xızmetler ushın islegen jaqsı islerimdi hesh qashan umıtpaǵaysań!

15 Sol kúnleri Yahudada bazı adamlardıń Shabbat kúni iskenjede júzim sıǵıp atırǵanın kórdim. Bazılardıń qap-qap dándi esheklerine júklep, jáne de sharap, júzim, ánjir hám basqa da júklerdi artıp, Shabbat kúni Erusalimge alıp kiyatırǵanın kórdim. Sol kúni, men olardı azıq-awqat satıp atırǵanı ushın qattı eskerttim. 16 Sonıń menen birge Erusalimde jasaytuǵın tirliler balıq hám hár túrli zatlar alıp kelip, Shabbat kúni Erusalimde jasaytuǵın yahudiylerge satıp júrdi. 17 Men Yahuda aqsúyeklerine keyip, olarǵa bılay dedim: «Nege bunday jawız islerdi islep, Shabbat kúnin xorlap atırsızlar? 18 Ata-babalarıńız da usılay islegenlikten Qudayımız basımızǵa hám bul qalaǵa apatshılıq jawdırmadı ma? Sizler Shabbat kúnin xorlaw arqalı Qudaydıń Izrailǵa degen ǵázebin lawlatıp atırsızlar».

19 Bunnan keyin, men: «Shabbat kúninen aldınǵı kún gewgim túse baslaǵannan Erusalim dárwazaları jabılıp, olar Shabbat kúni ótkenshe ashılmasın», – dep buyırdım. Shabbat kúni qalaǵa hesh bir júktiń kirgizilmewi ushın, xızmetshilerimnen bazıların dárwazalarǵa qoydım. 20 Sonda sawdagerler hám hár qıylı nárselerdi satıwshılar bir-eki ret Erusalim sırtında túnedi. 21 Biraq men olarǵa qattı keyip: «Sizler nege diywal janında túnep atırsızlar? Eger jáne usılay isleytuǵın bolsańız, sizlerge qarsı shara qollanaman», – dedim. Sol kúnnen baslap, olar Shabbat kúni kelmeytuǵın boldı. 22 Shabbat kúniniń muxaddesligin saqlaw ushın, men lebiylilerge ózlerin páklewdi hám kelip, dárwazalarda náwbetshilik etiwdi buyırdım.

Qudayım, bul is ushın da meni eske alıp, Ózińniń ullı miyrimiń menen maǵan rehim ete gór!

23 Jáne men sol kúnleri Ashdod, Ammon hám Moab jerlerinen bolǵan hayallarǵa úylengen yahudiylerdiń de bar ekenin bildim. 24 Hátte, olardıń balalarınıń yarımı ashdodlılar sóyleytuǵın tilde yamasa basqa xalıqlardıń tilinde sóylep, evrey tilin bilmeydi eken. 25 Sonıń ushın men olarǵa keyip, nálet ayttım. Ayırım erkeklerdi urıp, shashların juldım. Olarǵa Quday haqı bılay ant ishkizdim: «Qızlarıńızdı ózge millet adamlarına turmısqa bermeńler, ózlerińiz de, ullarıńız da olardıń qızlarına úylenbeńler. 26 Izrail patshası Sulayman da usınday hayallar sebepli gúnaǵa batqan joq pa edi? Kóplegen xalıqlarda oǵan uqsaǵan patsha joq edi. Ol óz Qudayınıń súyiklisi bolǵanlıqtan, Quday onı pútkil Izrail ústinen patsha etip qoyǵan edi. Sonday bolsa da, ózge milletlerden alǵan hayalları onı da gúnaǵa basladı. 27 Ózge millet qızlarına úylenip, Qudayımızǵa opasızlıq ettińiz. Islegen bul asa jawızlıǵıńızdı kórmeslikke alıwımız kerek pe?»

28 Bas ruwxaniy Elyashibtiń ulı Ioyadanıń ullarınan biri xoronlı Sanballattıń kúyew balası edi. Sol sebepli men onı janımnan quwıp jiberdim.

29 Qudayım, olardı eske ala gór! Sebebi olar ruwxaniylik xızmetin, ruwxaniylik hám lebiylik kelisimin ^{▼▼ Shıǵ 28:1; 29:1-9.} buzıp, muxaddeslikti haramladı.

30 Usılayınsha, men ruwxaniyler menen lebiylilerdi hámme jat nárselerden tazaladım. Jáne olardıń xızmetlerin qayta tiklep, jumısların belgilep berdim. 31 Jandırılatuǵın otınlar menen eginniń dáslepki ónimlerin belgilengen waqıtta alıp keliwdi jolǵa qoydım.

Qudayım, bulardı meniń iygiligim ushın eske ala gór!