Neh 2 | KaaIBT22L | STEP | Patsha Artakserkstiń húkimdarlıǵınıń jigirmalanshı jılı, nisan ayı edi. Men patshanıń aldına ákelingen sharaptı oǵan usındım. Burın hesh qashan patsha meni túskin awhalda kórgen joq edi.

‏ Nehemiah 2

Nexemiyanıń Erusalimge qaytıwı

1 Patsha Artakserkstiń húkimdarlıǵınıń jigirmalanshı jılı, nisan ayı edi. Men patshanıń aldına ákelingen sharaptı oǵan usındım. Burın hesh qashan patsha meni túskin awhalda kórgen joq edi. 2 Sonlıqtan patsha maǵan:

– Nege qapa kórineseń? Bilemen, kesel emesseń. Júregińde bir dártiń bar ma deymen? – dedi. Men qattı qorqıp kettim. 3 Sonda da patshaǵa:

– Taqsır, ómirińiz uzaq bolsın! Ata-babalarımız jerlengen qala qańırap, dárwazaları órtelgen bolsa, men qalay qapa bolmayın? – dedim.

4 Patsha maǵan:

– Ne tileyseń? – dedi. Sonda men ishimnen aspannıń Qudayına duwa ettim, 5 keyin patshaǵa bılay dedim:

– Taqsır, eger maqul dep tapsańız hám mendey qulıńızǵa kewlińiz tolǵan bolsa, onda meni Yahudaǵa, ata-babalarım jerlengen qalaǵa jiberseńiz. Men bul qalanı qayta qurmaqshıman.

6 Sonda xanbiyke de patshanıń janında otırǵan edi. Patsha mennen:

– Saparıń qansha waqıtqa sozıladı, qashan qaytıp keleseń? – dep soradı. Patsha meni jiberiwge ırazı boldı. Sońınan men waqıttı belgilep ayttım.

7 Men patshaǵa jáne bılay dedim:

– Taqsır, eger sizge maqul bolsa, Yahudaǵa jetip barǵanımsha, óz jerlerinen ótiwime ruxsat beriwi ushın, dáryanıń arǵı jaǵınıń hákimlerine xat jazıp berilsin. 8 Jáne de, patsha toǵaylarınıń bajbanı Asafqa da xat jazdırıp berseńiz. Ol maǵan Qudaydıń Ibadatxanası janındaǵı qorǵannıń dárwazaların, qala diywalların soqtırıwım hám ózime úy saldırıwım ushın kerek bolatuǵın aǵashlardı bersin.

Qudaydıń miyrimli qolı meniń ústimde bolǵanlıǵı sebepli, patsha soraǵanımnıń hámmesin berdi.

9 Patsha meniń menen birge bir neshe áskerbasılar hám atlılar jibergen edi. Men dáryanıń arǵı jaǵınıń hákimlerine kelip, olarǵa patshanıń xatların berdim. 10 Xoronlı Sanballat hám ammon xalqınan bolǵan xızmetshi Tobiya Izrail xalqınıń iygiligi ushın ǵamxorlıq etiwge bir adamnıń kelgenin esitkende, qattı ǵázeplendi.

11 Men Erusalimge kelip, ol jerde úsh kún boldım. 12 Men Erusalim ushın isleytuǵın islerimdi Qudayımnıń júregime salǵanın hesh kimge aytpadım. Túnde turıp, janımdaǵı adamlardan bir neshewin ertip, jolǵa shıqtım. Janıma ózim minip júrgen janıwardan basqa hesh qanday janıwar alǵan joq edim.

13 Túnde Oypatlıq dárwazası arqalı shıǵıp, Aydarha bulaǵına, ol jerden Tezek dárwazasına bardım. Men wayran etilgen Erusalim diywalların hám onıń jaǵıp jiberilgen dárwazaların kózden keshirdim. 14 Sońınan Bulaq dárwazasına hám Patsha háwizine bardım. Biraq astımdaǵı janıwarım ótiwge jol taba almadı. 15 Sonlıqtan túnde say boylap kóterilip, diywaldı kózden keshirdim. Aqırında, keri aylanıp, Oypatlıq dárwazası arqalı izge qayttım.

16 Húkimet basshıları meniń qay jerge barıp, ne islep júrgenimdi bilmedi. Sebebi men yahudiylerge de, ruwxaniylerge de, aqsúyeklerge de, basshılarǵa da, usı iske qatnası bar basqa jumıs alıp barıwshılarǵa da ele hesh nárse aytpaǵan edim.

17 Sońınan men olarǵa:

– Qanday apatshılıqqa ushıraǵanımızdı kórip tursız ba? Erusalim bosap qalǵan, al onıń dárwazaları bolsa, jandırıp jiberilgen. Júrińler, Erusalimniń diywalların qayta tikleyik. Bunnan bılay ayaq astı bolıwǵa shek qoyayıq, – dedim. 18 Men olarǵa Qudaydıń miyrimli qolınıń meniń ústimde ekenin hám patshanıń ózime aytqan sózlerin aytıp berdim.

Sonda olar:

– Qurılıstı baslaymız, – dedi hám qayırlı iske bar kúshin jumsawǵa tayar turdı.

19 Biraq xoronlı Sanballat, ammon xalqınan bolǵan xızmetshi Tobiya hám arab xalqınan bolǵan Geshem bulardı esitkende, ústimizden kúldi hám:

– Ne islep atırsız ózi? Yamasa patshaǵa qarsı bas kóterip atırsızlar ma? – dep bizlerdi kemsitip sóyledi.

20 Sonda men olarǵa:

– Aspannıń Qudayı isimizdi sátli qıladı, al Onıń qulları bolǵan bizler qurılıstı baslaymız. Sizlerdiń Erusalimde úlesińiz de, haqıńız da, tariyxıy deregińiz de joq, – dep juwap berdim.