Neh 3 | KaaIBT22L | STEP | Sonnan soń, bas ruwxaniy Elyashib hám onıń ruwxaniy tuwısqanları iske kirisip, Qoy dárwazasın qayta qurdı. Olar dárwazanı baǵıshlaw rásiminen ótkerip, qapıların ornına qurdı. Júzlik minarasına deyingi diywallardı tiklep, onı baǵıshlaw rásiminen ótkerdi. Jáne de, olar Xananel minarasına shekemgi diywallardı da tikledi.

‏ Nehemiah 3

Diywaldıń tikleniwi

1 Sonnan soń, bas ruwxaniy Elyashib hám onıń ruwxaniy tuwısqanları iske kirisip, Qoy dárwazasın qayta qurdı. Olar dárwazanı baǵıshlaw rásiminen ótkerip, qapıların ornına qurdı. Júzlik minarasına deyingi diywallardı tiklep, onı baǵıshlaw rásiminen ótkerdi. Jáne de, olar Xananel minarasına shekemgi diywallardı da tikledi. 2 Erixolılar onnan keyingi bólegin, al onnan keyingi bólekti Imriy ulı Zakkur qurdı.

3 Balıq dárwazasın Hassenanıń ulları qurdı. Olar dárwazanıń bórenelerin qoyıp, qapıların qurdı, qulıp hám támbilerin ornattı. 4 Onnan keyingi bólekte Haqqostıń aqlıǵı Uriyanıń ulı Meremot dúzetiw islerin alıp bardı. Onnan keyingi bólekti Meshezabeldiń aqlıǵı Berexiyanıń ulı Meshullam, al onnan keyingi bólekti Baana ulı Sadoq dúzetti. 5 Olardan keyingi bólekti teqoalılar dúzetti. Biraq olardıń aqsúyekleri óz qadaǵalawshılarınıń buyrıǵın orınlaw ushın qáddin búkpedi.

6 Eshana dárwazasın Paseax ulı Ioyada hám Besodiya ulı Meshullam dúzetti. Olar dárwazanıń bórenelerin qoyıp, qapıların qurdı, qulıp hám támbilerin ornattı. 7 Olardan keyingi bólekti gibonlı Melatiya hám meronotlı Yadon dáryanıń arǵı jaǵındaǵı hákimniń qol astındaǵı Gibon hám Mispa turǵınları menen birge dúzetti. 8 Olardan keyingi bólekti zerger Xarhaya ulı Uzziel, al onnan keyingi bólekti xosh iyisli zatlar tayarlawshı Xananiya dúzetti. Olar Erusalim diywallarınıń Keń diywalǵa deyingi aralıǵın qayta tikledi. 9 Olardıń janındaǵı bólekti Erusalim úlkesiniń yarımınıń basqarıwshısı Xur ulı Refaya dúzetti. 10 Olardan keyingi bólekti, óz úyiniń qarama-qarsısın Xarumaf ulı Edaya, al onnan keyingi bólekti Xashabniya ulı Xattush dúzetti. 11 Xarim ulı Malkiya menen Paxat-Moab ulı Xashshub basqa bir bólekti hám Tandırlar minarasın dúzetti. 12 Keyingi bólekti Erusalim úlkesiniń yarımınıń basqarıwshısı Halloxesh ulı Shallum óz qızları menen birge dúzetti.

13 Xanun hám Zanoax turǵınları Oypatlıq dárwazasın dúzetti. Olar dárwaza bórenelerin qoyıp, qapıların qurdı, qulıp hám támbilerin ornattı. Jáne de, olar diywaldıń Tezek dárwazasına shekemgi mıń shıǵanaq aralıǵın dúzetti.

14 Al Tezek dárwazasın Beyt-Hakkerem úlkesiniń basqarıwshısı Rexab ulı Malkiya dúzetti. Ol dárwazanı qurıp, qapıların, qulıp hám támbilerin ornattı.

15 Bulaq dárwazasın Mispa úlkesiniń basqarıwshısı Kol-Xoze ulı Shallun dúzetti. Ol dárwazanı qurıp, ústin jawdı, qapıların, qulıp hám támbilerin ornattı. Ol patsha baǵınıń qasındaǵı Shelax háwiziniń diywalın da Dawıttıń qalasınan tómenge túsetuǵın tekshege shekem dúzetti. 16 Onıń janındaǵı bólekti, yaǵnıy Dawıttıń mazarınıń qarama-qarsısına shekemgi orınnan háwizge hám Batırlar úyine deyingi aralıqtı Beyt-Sur úlkesiniń yarımınıń basqarıwshısı Azbuq ulı Nexemiya dúzetti.

17 Onıń janındaǵı bólekti Baniy ulı Rexumnıń basshılıǵında lebiyliler dúzetti. Onnan keyingi bólekte Keila úlkesiniń yarımınıń basqarıwshısı Xashabiya óz úlkesi atınan dúzetiw islerin alıp bardı. 18 Onnan keyingi bólekti Xashabiyanıń tuwısqanları Keila úlkesiniń qalǵan yarımınıń basqarıwshısı Xenadad ulı Binnuy ^{▼▼ Binnuy – basqa nusqada Bawway.} basshılıǵında dúzetti. 19 Onnan keyin Mispanıń basshısı Eshua ulı Ezer qural-jaraq saqlaw bólmesine kóteriletuǵın joldıń aldınan diywaldıń múyeshine shekemgi aralıqtı dúzetti. 20 Onnan keyin múyeshten baslap, bas ruwxaniy Elyashibtiń úyiniń qapısınıń kirer awzına deyingi aralıqtı Zabbay ulı Barux ıqlas penen dúzetti. 21 Onıń janındaǵı Elyashibtiń úyiniń qapısınıń kirer awzınan baslap, onıń úyiniń aqırına shekemgi aralıqtı Haqqostıń aqlıǵı Uriyanıń ulı Meremot dúzetti.

22 Onnan keyingi bólekti dógerektegi aymaqlardan kelgen ruwxaniyler dúzetti. 23 Olardan keyin Benyamin hám Xashshub óz úyleriniń qarsı aldındaǵı bólekti, al olardan keyin Ananiyanıń aqlıǵı Maaseyanıń ulı Azariya óz úyiniń janındaǵı bólekti dúzetti. 24 Onnan keyin Azariyanıń úyinen diywaldıń múyeshine hám aylanbasına shekemgi aralıqtı Xenadad ulı Binnuy dúzetti. 25 Múyeshtiń hám saqshılar háwlisindegi patshanıń joqarǵı sarayına shıǵatuǵın minaranıń qarsısın Uzay ulı Palal dúzetti. Onnan keyin Parosh ulı Pedaya 26 Ofel tóbeshiginde jasaytuǵın Ibadatxana xızmetshileri menen birge shıǵıs táreptegi Suw dárwazasınıń qarsı aldına hám Shıǵıńqı minarasına shekemgi aralıqtı dúzetti.

27 Shıǵıńqı minarasınıń qarsısınan Ofel tóbeshigindegi diywalǵa shekemgi basqa bólekti teqoalılar dúzetti. 28 Ruwxaniyler At dárwazasınıń joqarısın, hár biri óz úyiniń qarsı aldın dúzetti. 29 Olardan keyin Immer ulı Sadoq óz úyiniń qarsısın, onnan keyingi bólekti Shıǵıs dárwazasınıń qarawılı Shekaniya ulı Shemaya dúzetti. 30 Onnan keyingi basqa bir bólekti Shelemiya ulı Xananiya hám Salaftıń altınshı ulı Xanun dúzetti. Olardan keyin Berexiya ulı Meshullam óz bólmesiniń qarsı aldın dúzetti. 31 Onnan keyin Sap tartıw dárwazasına qarsı turǵan Ibadatxana xızmetshileri menen sawdagerlerdiń úyine hám múyeshtegi joqarǵı bólmege shekemgi aralıqtı zerger Malkiya dúzetti. 32 Al múyeshtegi joqarǵı bólmeden Qoy dárwazasına shekemgi aralıqtı zergerler hám sawdagerler dúzetti.