Neh 4 | KaaIBT22L | STEP | Sanballat bizlerdiń diywaldı qayta qurıp atırǵanımızdı esitkende, qanı qaynap, ǵázepke mindi hám yahudiylerdi masqaralay basladı.

‏ Nehemiah 4

Qayta qurıw isine qarsı shıqqanlar

1 Sanballat bizlerdiń diywaldı qayta qurıp atırǵanımızdı esitkende, qanı qaynap, ǵázepke mindi hám yahudiylerdi masqaralay basladı. 2 Ol óz sherikleri menen Samariya láshkerleri aldında bılay dedi: «Mına biyshara yahudiyler ne islep atır? Írasında da, olar óz diywalın qayta tiklemekshi me? Írasında da, olar qurbanlıq bermekshi me? Bular ne, bir kún ishinde qurılıstı pitkermekshi me? Írasında da, olar janıp, úyilgen shıǵındıǵa aylanǵan taslardı janlandırmaqshı ma?»

3 Sanballattıń janında turǵan ammon xalqınan bolǵan Tobiya da: «Qurıp atırǵan diywalına qarańlar! Eger bir túlki kelip ústine minse, tas diywalı tas-talqan boladı», – dedi.

4 Sonda men bılay dep duwa ettim: «Qudayımız, bizlerge qulaq sal! Bizler xorlanıp atırmız. Olardıń bizlerge kórsetken xorlıǵın ózleriniń basına jawdır hám olar da tutqın bolıp, jat elde talanatuǵın bolsın. 5 Olardıń ayıpların jawıp, gúnaların keshirip, kóz aldıńnan óshirip taslay górme! Sebebi olar qurılısshılardıń arına tiydi».

6 Degen menen, bizler diywal qurılısın dawam ettik. Xalıq bar ıqlası menen islegenlikten, pútkil diywaldı onıń yarımına deyin tikledik.

7 Biraq Sanballat, Tobiya, arablar, ammonlar hám ashdodlılar Erusalim diywallarınıń tikleniw isleriniń alǵa ilgerilep, buzılǵan jerleriniń pitelip atırǵanın esitkende, qattı ashıwlandı. 8 Olar hámmesi birge kelip, Erusalimge qarsı urıs ashıwǵa hám ol jerde tártipsizlikti keltirip shıǵarıwǵa kelisip aldı. 9 Sonda bizler Qudayımızǵa duwa etip, olardan qorǵanıw ushın kúni-túni saqshılar qoydıq.

10 Biraq yahudalılar tońqıldap: «Júk tasıwshılar haldan taydı,
Shıǵındı bolsa júdá kóp.
Sonlıqtan óz kúshimiz benen,
Diywaldı qayta qura almaymız», –

dedi.

11 Al dushpanlarımız bolsa: «Bizlerdi bilip, kórip qoymasınan burın aralarına kirip alıp, olardı óltireyik hám isti toqtatayıq», – dep atır.

12 Olardıń janında jasaytuǵın yahudiyler kelip, bizlerge: «Olar hár tárepten sizlerge bastırıp kelmekshi», – dep on mártelep ayttı.

13 Sol sebepli diywaldıń eń pás, ashıq jerleriniń artına qılısh, nayza hám oq jay menen qurallanǵan adamlardı tiyreleri boyınsha ornalastırdım. 14 Bulardı kórip shıqqannan soń, aqsúyeklerge, basshılarǵa hám pútkil xalıqqa: «Olardan qorqpańlar. Ullı hám aybatlı Iyemizdi eske alıńlar. Tuwısqanlarıńız, ul-qızlarıńız, hayallarıńız hám úylerińiz ushın urısıńlar», – dedim.

15 Ózleriniń niyetlerinen xabardar ekenimiz hám Quday olardı pushqa shıǵarǵanı dushpanlarımızdıń qulaǵına jetip bardı. Sonda bizler hámmemiz diywalǵa, hár birimiz óz isimizge qayttıq.

16 – 17 Sol kúnnen baslap, adamlarımnıń yarımı qurılısta isledi, yarımı nayza, qalqan, oq jay uslap, sawıt kiydi. Al basshılar diywal qurıp atırǵan pútkil Yahuda xalqınıń artında turdı. Diywal qurıwshılar hám júk tasıwshılar bir qolı menen jumıs islep, ekinshi qolına quralın alıp júrdi. 18 Hár bir qurılısshı beline qılıshın baylap alıp, jumıs isledi. Kárnay shertetuǵınlar meniń janımda júrdi. 19 Men aqsúyeklerge, basshılarǵa hám pútkil xalıqqa bılay dedim: «Jumıs kólemi úlken hám keń. Bizler diywal boylap jayılıp ketip, bir-birimizden uzaqlasıp baratırmız. 20 Sonlıqtan qay jerden kárnay sestin esitseńiz, sol jerge, qasımızǵa jıynalıńlar. Qudayımız bizler ushın urısadı».

21 Bizler jumıstı azanda erte, kún shıqqanda baslap, keshte kesh, juldızlar shıqqanda tamamladıq. Adamlardıń yarımı bárqulla saqshılıqta turdı. 22 Sol waqıtları men xalıqqa jáne: «Hár bir adam óz xızmetshileri menen birge Erusalimde túnesin. Olar túnde qarawıllıqta turıp, kúndiz jumıs islesin», – dedim.

23 Men de, tuwısqanlarım da, xızmetshilerim de, janımdaǵı qarawıllar da, hesh birimiz kiyimlerimizdi sheshpedik. Hár bir adamnıń quralı qolında boldı.