Neh 5 | KaaIBT22L | STEP | Sol waqıtları xalıq ishinde, erkekler hám olardıń hayalları arasında óz tuwısqanları bolǵan yahudiylerge degen kúshli narazılıq júzege keldi.

‏ Nehemiah 5

Nexemiyanıń jarlılarǵa járdem beriwi

1 Sol waqıtları xalıq ishinde, erkekler hám olardıń hayalları arasında óz tuwısqanları bolǵan yahudiylerge degen kúshli narazılıq júzege keldi. 2 Olardıń bazıları: «Bizler kópshilikpiz, ul-qızlarımız kóp. Nan tawıp jep, tirishilik etiwimiz ushın bizlerge biyday kerek», – dedi.

3 Al bazıları bolsa: «Ashlıq waqıtta nanımızdı tabıw ushın, atızlarımızdı, júzimzarlarımızdı hám úylerimizdi girewge berip atırmız», – dedi.

4 Jáne basqaları bolsa: «Patshaǵa salıq tólew ushın atızlarımız hám júzimzarlarımız ústinen ústeme pul aldıq. 5 Bizlerdiń yahudiy tuwısqanlarımız benen qanımız bir, balalarımızdıń da olardıń balalarınan ayırmashılıǵı joq. Biraq bizler ul-qızlarımızdı qul etip satıwǵa májbúr bolıp atırmız, qızlarımızdıń ayırımları álle qashan shorılıqqa satıldı. Atız hám júzimzarlarımız endi basqalardıń qolına ótkenlikten, bizler sharasız qaldıq», – dedi.

6 Men olardıń narazılıǵı menen usınday sózlerin esitkenimde, qattı ashıwlandım. 7 Biraz oylandım, keyin aqsúyekler menen basshılarǵa keyip:

– Sizler óz tuwısqanlarıńızdan ústeme alıp atırsızlar ma? – dedim. Men usı máselege baylanıslı úlken jıyın topladım. 8 Sońınan jıynalǵanlarǵa:

– Bizler basqa xalıqlarǵa satılǵan yahudiy tuwısqanlarımızdı kúshimiz jetkenshe qaytarıp satıp aldıq. Al sizler bolsańız, óz tuwısqanlarıńızdı satıp atırsızlar. Olardı jáne satıp alıwımız ushın ba? – dedim. Olar juwap tappay, únsiz turdı.

9 Men olarǵa jáne bılay dedim:

– Islep atırǵanıńız jaqsı is emes. Bizge dushpan bolǵan xalıqlarǵa masqara bolmaw ushın, Qudaydan qorqıp jasaw kerek emes pe edi? 10 Meniń ózim, tuwısqanlarım hám xızmetkerlerim menen birge xalıqqa qarızǵa gúmis hám biyday berip atırmız. Biraq endigiden bılay ol ushın ústeme alıwdı toqtatayıq! 11 Házirden-aq olarǵa ózlerińiz tartıp alǵan atızların, júzim hám záytún baǵların, úylerin, ústeme ushın tólegen gúmislerin, biydayın, sharap hám mayların qaytarıp berińler.

12 Olar:

– Qaytarıp beremiz, olardan hesh nárse talap etpeymiz. Siziń aytqanıńızday qılamız, – dedi. Sonda men ruwxaniylerdi shaqırtıp, ruwxaniylerdiń aldında aqsúyekler menen basshılarǵa bergen wádesinde turatuǵını tuwralı olarǵa ant ishtirdim. 13 Sońınan shapanımnıń belbewligin sheship qaǵıp:

– Óz wádesinde turmaǵan adamdı Quday úy-jayınan hám iyeliginen ayırıp, dımsız qaldırsın, – dedim. Pútkil jıynalǵanlar:

– Awmiyin, – dedi hám Jaratqan Iyege alǵıs-maqtawlar ayttı. Xalıq bergen wádesinde turdı.

14 Jáne de, ózim Yahuda jerine hákim bolıp tayınlanǵan kúnnen baslap on eki jıl dawamında, yaǵnıy Artakserkstiń patshalıǵınıń jigirmalanshı jılınan otız ekinshi jılına shekem men de, tuwısqanlarım da hákimge arnalǵan azıq-awqattan jemedik. 15 Mennen burınǵı hákimler xalıqqa awırmanlıq júklep, nan menen sharaptan tısqarı olardan qırıq shekel ^{▼▼ Qırıq shekel – bir shekel shama menen 11 gr.} gúmis te alǵan eken. Hátte, olardıń xızmetshileri de xalıqqa óz húkimin ótkergen eken. Biraq men Qudaydan qorqqanlıqtan, bulay islemedim. 16 Onıń ornına men bar kúshimdi diywaldıń qurılısına baǵıshladım. Xızmetkerlerimniń hámmesi istiń basına jıynaldı. Bizler birde bir atız satıp almadıq.

17 Aylanamızdaǵı basqa xalıqlardan kelgenlerdi esapqa almaǵannıń ózinde, yahudiylerden hám lawazımlı adamlardan bir júz eliw adam meniń dasturxanımnan awqatlanatuǵın edi. 18 Bir kúnlik awqat ushın bir ógiz, altı semiz qoy hám bir qansha tawıqlar pisiriletuǵın, jáne hár on kúnde bir ret mol etip, túrli-túrli sharaplardan beriletuǵın edi. Degen menen, men úlke hákimine tiyisli awqattı talap etpedim, onısız da xalıqtıń júgi awır edi.

19 Qudayım, bul xalıq ushın islegen islerimdi meniń iygiligim ushın eske ala gór!