Neh 6 | KaaIBT22L | STEP | Diywallardı qurıp, buzılǵan jerleriniń birde birewin qaldırmay, tolıq ońlap bolǵanım Sanballat, Tobiya, arab xalqınan bolǵan Geshem hám basqa dushpanlarımnıń qulaǵına jetip bardı. Biraq ol waqıtta, men ele dárwazalardıń qapıların ornatıp bolmaǵan edim.

‏ Nehemiah 6

Nexemiyaǵa qarsı til biriktiriw

1 Diywallardı qurıp, buzılǵan jerleriniń birde birewin qaldırmay, tolıq ońlap bolǵanım Sanballat, Tobiya, arab xalqınan bolǵan Geshem hám basqa dushpanlarımnıń qulaǵına jetip bardı. Biraq ol waqıtta, men ele dárwazalardıń qapıların ornatıp bolmaǵan edim. 2 Sonda Sanballat penen Geshem maǵan adam jiberip: «Ono tegisligindegi awıllardıń birinde ushırasayıq», – dedi. Olar maǵan zıyan keltiriw niyetinde edi. 3 Sonlıqtan men de olarǵa xabarshılar jiberip: «Men úlken bir is penen bántpen. Sonlıqtan bara almayman. Ne ushın men isti taslap, sizlerge barıwım hám jumıstı toqtatıwım kerek?» – dedim. 4 Olar tórt márte sol xabardı jiberdi, men de tórt márte solay juwap qaytardım.

5 Sonda besinshi ret Sanballat maǵan óz xızmetshisin jiberdi. Onıń qolında mórlenbegen ashıq xat bar edi. 6 Xatta bılay dep jazılǵan edi:

«Basqa xalıqlar arasında xabarlar taraǵan, Geshem de bunı tastıyıqlaydı. Sen hám yahudiyler qozǵalań kóteriwdi oylap atırsızlar. Sol sebepten sizler diywallardı qayta tiklep atırǵan ekensiz. Usı xabarlarǵa qaraǵanda, sen olarǵa patsha bolmaqshı ekenseń. 7 Jáne de, óziń haqqında: „Yahudanıń óz patshası bar!“dep járiyalawı ushın, sen payǵambarlardı da tayınlapsań. Bul sózler, álbette, patshanıń qulaǵına jetip baradı. Sonlıqtan kel, birge keńesip alayıq».

8 Men oǵan adam jiberip: «Aytqanlarıńnıń hámmesi jalǵan, bulardı sen óziń oylap shıǵarǵansań», – dep juwap berdim.

9 Olardıń hámmesi bizlerdi qorqıtpaqshı bolıp: «Qolların isten suwıtsaq, is toqtaydı», – dep oylaǵan edi. Buǵan qarsı, men Qudaydan qollarıma kúsh beriwin soradım.

10 Bir kúni men Mehetabeldiń aqlıǵı Delaya ulı Shemayanıń úyine bardım. Ol úyine tıǵılıp alǵan edi. Ol maǵan:

– Kel, Qudaydıń Úyinde, Ibadatxananıń ishinde ushırasıp, esiklerin tas qılıp, ildirip alayıq. Sebebi olar seni óltiriw ushın kelejaq, túnde seni óltiriwge keledi, – dedi.

11 Biraq men oǵan:

– Men qashıp ketetuǵın adamǵa uqsayman ba? Yaki tiri qalıw ushın, Ibadatxanaǵa jasırınatuǵın adamǵa uqsayman ba? Barmayman, – dedim. 12 Men onı Qudaydıń jibermegenin, biraq onı Tobiya menen Sanballat paraǵa satıp alǵanlıqtan, ol maǵan qarsı usınday jalǵan payǵambarshılıq sózlerin aytqanın túsinip jettim. 13 Olar meni qorqıtıw ushın hám qorqqanımnan onıń aytqanın qılıp, gúna islewim ushın, Shemayanı jallaǵan edi. Sonda meni jamanlap, abırayımdı tógiw ushın sebep tabılar edi.

14 Men bılay dep duwa ettim: «Qudayım, Tobiya menen Sanballattıń islegen islerin umıta górme! Sonday-aq meni qorqıtpaqshı bolǵan payǵambar hayal Noadiyanı hám basqa payǵambarlardı da esińde saqlay gór!»

Diywal qurılısınıń juwmaqlanıwı

15 Diywal elul ayınıń jigirma besinshi sánesinde, eliw eki kúnde pitkerildi. 16 Barlıq dushpanlarımız bul haqqında esitkende, átirapımızdaǵı xalıqlardıń hámmesi qorqıp ketti hám olardıń qattı eńsesi tústi. Sebebi olar bul istiń Qudayımızdıń járdeminde islengenin túsindi.

17 Bunnan tısqarı, sol kúnleri Yahuda aqsúyekleri Tobiyaǵa kóp xatlar jazǵan bolıp, Tobiyadan da olarǵa xatlar kelip turdı. 18 Tobiya Arax ulı Shekaniyanıń kúyew balası bolǵanlıqtan hám Tobiyanıń ulı Ehoxanan Berexiya ulı Meshullamnıń qızına úylengenlikten, Yahudadaǵı kóp adamlar onıń menen nan sındırısıp, ant ishisken edi. 19 Hátte, olar Tobiyanıń jaqsı isleri haqqında maǵan aytatuǵın, meniń aytqanlarımdı da oǵan jetkerip turatuǵın edi. Tobiya da meni qorqıtıw ushın xatlar jiberip turatuǵın edi.