Neh 8 | KaaIBT22L | STEP | Izraillılar qalalarına ornalasıp bolǵannan soń, jetinshi ayda pútkil xalıq bir adamday bolıp Suw dárwazasınıń aldındaǵı maydanǵa jıynaldı. Olar ulama Ezradan Jaratqan Iyeniń Muwsa arqalı Izrail xalqına bergen buyrıqları jazılǵan Nızam kitabın alıp keliwdi soradı.

‏ Nehemiah 8

Ezranıń Nızam kitabın xalıqqa oqıp beriwi

1 Izraillılar qalalarına ornalasıp bolǵannan soń, jetinshi ayda pútkil xalıq bir adamday bolıp Suw dárwazasınıń aldındaǵı maydanǵa jıynaldı. Olar ulama Ezradan Jaratqan Iyeniń Muwsa arqalı Izrail xalqına bergen buyrıqları jazılǵan Nızam kitabın alıp keliwdi soradı. 2 Sonda jetinshi aydıń birinshi kúni ruwxaniy Ezra Nızam kitabın xalıq jıynalǵan jerge alıp keldi. Erkekler, hayallar hám tıńlap, oqılǵandı túsine alatuǵın balalardıń hámmesi sol jerde edi. 3 Ezra Suw dárwazası aldındaǵı maydanda erkeklerdiń, hayallardıń hám túsine alatuǵın hár bir adamnıń aldında kún shıqqannan túske shekem Nızam kitabın dawıslap oqıdı. Hámme oqılǵan sózdi dıqqat penen tıńladı.

4 Ulama Ezra usı is ushın aldın ala tayarlanǵan aǵash minber ústinde turdı. Onıń oń tárepinde Mattitiya, Shema, Anaya, Uriya, Xilkiya hám Maaseya, al shep tárepinde Pedaya, Mishael, Malkiya, Xashum, Xashbaddana, Zexariya hám Meshullam turdı.

5 Biyik minberde turǵan Ezra pútkil xalıqtıń kóz aldında kitaptı ashtı. Sonda pútkil xalıq ornınan turdı. 6 Ezra ullı Qudayǵa, Jaratqan Iyege alǵıs-maqtawlar ayttı. Pútkil xalıq qolların kóterip: «Awmiyin, awmiyin», – dep juwap berdi hám et betinen jerge jıǵılıp, Jaratqan Iyege sıyındı.

7 Lebiyliler – Eshua, Baniy, Sherebiya, Yamin, Aqqub, Shabbetay, Hodiya, Maaseya, Kelita, Azariya, Iozabad, Xanan, Pelaya óz orınlarında tik turǵan xalıqqa Nızamdı túsindirdi. 8 Olar Qudaydıń Nızam kitabın anıq oqıp, mánisin túsindirip berdi hám xalıq oqılǵandı túsindi.

9 Nızam sózlerin esitkende, pútkil xalıq jıladı. Sonlıqtan hákim Nexemiya, ulama hám ruwxaniy bolǵan Ezra, jáne xalıqqa úyretip turǵan lebiyliler xalıqqa: «Búgin Qudayıńız Jaratqan Iye ushın muxaddes kún. Aza tutıp, kóz jas tókpeńler», – dedi.

10 Keyin Nexemiya xalıqqa bılay dedi: «Endi úylerińizge qaytıp, maylı awqatlardan jep, mazalı ishimliklerden ishińler. Awqat tayarlamaǵanlarǵa da sol nárselerden pay berip jiberińler. Sebebi búgin Iyemiz ushın muxaddes kún. Qayǵırmańlar, sebebi Jaratqan Iye beretuǵın quwanısh sizlerdi kúshli qıladı».

11 Lebiyliler de: «Tınıshlanıńlar, búgin muxaddes kún, qayǵırmańlar», – dep xalıqtı tınıshlandırdı. 12 Solay etip, pútkil xalıq jep-ishiw, basqalarǵa payların beriw hám ullı quwanısh penen bayramlaw ushın ketti. Óytkeni olar ózlerine aytılǵanlardı túsingen edi.

13 Erteńine pútkil xalıqtıń áwlad basshıları, ruwxaniyler hám lebiyliler Nızam sózlerin úyreniw ushın ulama Ezranıń janına jıynaldı. 14 Olar Nızamda jazılǵan Jaratqan Iyeniń Muwsa arqalı bergen mına buyrıǵın ^{▼▼ Leb 23:33-43.} taptı: «Izrail xalqı jetinshi aydaǵı bayram kúnleri qoslarda jasasın. 15 Sonlıqtan barlıq qalalarda hám Erusalimde: „Jazılǵanǵa muwapıq, tawlarǵa shıǵıp, záytún, jabayı záytún, mirta, palma hám basqa da japıraqlı aǵashlardıń shaqaların alıp kelip, qos qurıńlar“, – dep jar salıp, járiyalansın».

16 Solay etip, xalıq barıp, shaqalar alıp keldi hám hár bir adam óz tamlarınıń basına, sharbaqlarına, Qudaydıń Úyiniń sharbaǵına, Suw dárwazası aldındaǵı maydanǵa hám Efrayım dárwazasınıń aldındaǵı maydanǵa ózleri ushın qoslar qurıp aldı. 17 Súrginnen qaytıp kelgenlerdiń hámmesi qoslar qurıp, qoslarda jasadı. Nun ulı Eshuanıń dáwirinen usı kúnge deyin izraillılar bulay islemegen edi. Olar sheksiz quwanıshqa bólengen edi. 18 Ezra birinshi kúnnen sońǵı kúnge deyin, hár kúni Qudaydıń Nızam kitabın oqıdı. Olar jeti kún bayramladı, al segizinshi kúni qaǵıydaǵa muwapıq saltanatlı jıynalıs boldı.