Neh 9 | KaaIBT22L | STEP | Jetinshi aydıń jigirma tórtinshi kúni pútkil Izrail xalqı oraza tutıp, aza kiyimin kiygen hám baslarına topıraq shashqan halda jıynaldı.

‏ Nehemiah 9

Xalıqtıń gúnaları ushın táwbe qılıwı

1 Jetinshi aydıń jigirma tórtinshi kúni pútkil Izrail xalqı oraza tutıp, aza kiyimin kiygen hám baslarına topıraq shashqan halda jıynaldı. 2 Sol waqıtta Izrail urpaqları barlıq basqa xalıqlardan ayırılıp shıqtı. Olar ózleriniń gúnaların hám ata-babaları islegen jaman islerdi ashıq moyınladı. 3 Olar óz orınlarında turıp, úsh saattı ózleriniń Qudayı Jaratqan Iyeniń Nızam kitabın oqıw menen, al úsh saattı gúnanı ashıq moyınlaw hám ózleriniń Qudayı Jaratqan Iyege sıyınıw menen ótkizdi. 4 Eshua, Baniy, Qadmiel, Shebaniya, Bunniy, Sherebiya, Baniy hám Kenaniy lebiyliler ushın ajıratılǵan sıpanıń ústine shıǵıp, Qudayı Jaratqan Iyege qattı dawıslap jalbarındı.

5 Keyin lebiyliler Eshua, Qadmiel, Baniy, Xashabniya, Sherebiya, Hodiya, Shebaniya hám Petaxiya bılay dedi: «Turıp, máńgige bar bolǵan Qudayıńız Jaratqan Iyege alǵıs-maqtawlar aytıńlar». Olar bılay dep duwa etti:

«Bizlerdiń táriyiplewlerimizden de, alǵıs-maqtawlarımızdan da ullı bolǵan Onıń dańqlı atına alǵıs-maqtawlar aytıńlar!

6 Jaratqan Iye, Sen jalǵızsań. Sen aspandı, aspannıń aspanın, olardaǵı pútkil barlıqtı, jerdi hám ondaǵı barlıq nárseni, teńizlerdi hám olardıń ishindegi barlıq nárseni jarattıń. Hámmesine Sen jan berdiń, pútkil aspan deneleri saǵan sıyınadı.

7 Quday Iye, Sen Óziń Ibramdı tańlap alıp, kaldeylerdiń Ur qalasınan alıp shıqtıń hám oǵan Ibrayım degen jańa at berdiń. 8 Onı aldıńda sadıq dep taptıń hám onıń urpaqlarına qanan, xet, amor, periz, ebus hám girgash xalıqlarınıń jerlerin beriw ushın, onıń menen kelisim dúzdiń. Sen wádeńdi orınladıń, sebebi Sen ádilseń.

9 Sen ata-babalarımızdıń Mısırda shekken azapların kórdiń hám Qızıl teńiz janındaǵı olardıń dad-páriyadın esittiń. 10 Menmensip, ata-babalarımızǵa jábir kórsetkeni ushın, Sen faraonǵa, onıń barlıq xızmetkerlerine hám sol jerdegi onıń pútkil xalqına káramatlı belgiler hám tań qalarlıq isler kórsettiń. Sol sebepli búginge deyin Ózińniń dańqlı atıńdı saqlap qaldıń. 11 Sen ata-babalarımızdıń kóz aldında teńizdi ekige ayırdıń hám olar teńizdi qurǵaq jer arqalı kesip ótti. Al olardı quwǵanlardı bolsa, tereń suwǵa ılaqtırılǵan tas kibi teńiz túbine batırıp jiberdiń. 12 Kúndiz minara sıyaqlı bult bolıp, túnde olardıń júretuǵın jollarına jaqtı túsiriw ushın minara sıyaqlı ot bolıp, ata-babalarımızǵa jol kórsettiń.

13 Sen Sinay tawına túsip, aspannan olar menen sóylestiń hám olarǵa ádil nızamlar, durıs kórsetpeler, iygilikli qaǵıydalar hám buyrıqlar berdiń. 14 Olarǵa Ózińniń muxaddes Shabbat kúnińdi bildirdiń. Qulıń Muwsa arqalı buyrıqlar, qaǵıydalar hám nızamlar berdiń. 15 Ash bolǵanında, aspannan nan jawdırdıń, shóllegeninde, jartastan suw shıǵarıp berdiń. Sen olarǵa Óziń beremen dep ant ishken jerge barıwdı hám sol jerdi iyelewdi buyırdıń.

16 Biraq ata-babalarımız tákabbirlik hám qaysarlıq qılıp, buyrıqlarıńa boysınbadı. 17 Olar boysınıwdan bas tartıp, Seniń ózleriniń kóz aldında islegen káramatlarıńdı umıttı. Olar menmenlik etti hám Mısırdaǵı qullıqqa qaytıw ushın ózlerine bir basshı qoyıp alıp, Saǵan qarsı bas kóterdi. Biraq Sen keshiretuǵın, miyrimli, rehimli, sabır-taqatlı hám súyispenshiligi ullı Quday bolǵanlıqtan, olardı taslap ketpediń. 18 Hátte, ata-babalarımız ózlerine tananıń músinin islep alıp: „Mine, bizlerdi Mısırdan alıp shıqqan qudayımız“, – dep Seni qattı xorladı.

19 Biraq Seniń rehimliligiń ullı bolǵanlıǵı sebepli, olardı shólde taslap ketpediń. Kúndiz olarǵa jol kórsetiwshi minara sıyaqlı bult ta, túnde olardıń júretuǵın jollarına jaqtı túsiriwshi minara sıyaqlı ot ta olardı tárk etpedi. 20 Sen olarǵa tálim beriw ushın, Ózińniń iygilikli Ruwxıńdı berdiń. Awızlarınan mannanı ^{▼▼ Manna – Izrail xalqı Mısırdan shıǵıp shólde júrgende, Quday aspannan bergen azıq. Shıǵ 16:1-36.} tartıp almadıń, shólin qandırıw ushın suw da berdiń. 21 Shólde Sen olardı qırıq jıl baqtıń: olar hesh nárseden kemlik kórmedi, kiyimleri de tozbadı, ayaqları da qabarmadı.

22 Sen olarǵa patshalıqlar menen xalıqlardı táslim etip, olardıń barlıq jerlerin bólistirip berdiń. Olar Xeshbon patshası Sixonnıń hám Bashan patshası Ogtıń jerlerine iyelik etti. 23 Sen olardıń urpaqların aspandaǵı juldızlarday etip kóbeyttiń hám olardı ata-babalarına: „Kirip, iyelik etińler“, degen jerge alıp keldiń. 24 Olardıń urpaqları sol jerge kirip, onı iyeledi. Sen olarǵa sol jerdiń turǵınları bolǵan qananlılardı boysındırdıń hám qálegenin qılıw ushın, qananlılardıń patshaları menen xalqın olarǵa táslim ettiń. 25 Olar qorǵan qalalardı, ónimdar jerlerdi basıp aldı hám túrli jaqsı zatlar menen toltırılǵan úylerdi, qazılǵan suw saqlaǵıshlardı, júzimzarlardı, záytún baǵların hám kóp sanlı miywe aǵashların iyeledi. Olar jep toydı, semirdi hám Seniń ullı iygiligińnen ráhátlendi.

26 Biraq olar boysınbay, Saǵan qarsı bas kóterdi. Olar Seniń Nızamıńa arqasın burıp, Saǵan qaytıwǵa shaqırǵan payǵambarlarıńdı óltirdi. Usılay olar Saǵan qattı til tiygizdi. 27 Sonlıqtan Sen olardı dushpanlarınıń qolına berdiń, dushpanları olardı ezdi. Olar azap shekken waqıtlarında, Saǵan jalbarındı. Sen olardı aspannan esittiń hám Ózińniń ullı rehimiń menen olarǵa qutqarıwshılardı jiberdiń. Qutqarıwshılar olardı dushpanlarınıń qolınan qutqardı.

28 Biraq olar tınıshlıqqa eriskennen soń, jáne Seniń kóz aldıńda jaman islerdi isledi. Sol sebepli Sen olardı qaytadan dushpanlarınıń qolına berdiń hám dushpanları olardıń ústinen húkimdarlıq etti. Olar jáne Saǵan jalbarınǵanda, Sen olardı aspannan esittiń hám Ózińniń ullı rehimiń menen olardı kóp márte qutqarıp aldıń.

29 Sen olardı Óz Nızamıńa qaytarıw ushın eskertseń de, qaysarlıq etip, buyrıqlarıńa boysınbadı hám qaǵıydalarıńnan júz burıp, gúna isledi. Eger olardı orınlaǵanda, ómirge eriser edi. Biraq olar Saǵan teris qaradı hám menmensip, boysınıwdan bas tarttı. 30 Jıllar boyı olardı shıdamlılıq penen kúttiń. Óz Ruwxıń menen payǵambarlarıń arqalı olarǵa eskerttiń. Biraq olar tıńlamadı. Sonlıqtan Sen olardı aynalasındaǵı xalıqlarǵa táslim ettiń. 31 Biraq Ózińniń ullı rehimliligiń sebepli, olardı tolıq joq qılmadıń hám tárk etpediń. Sebebi Sen miyrimli hám rehimli Qudaysań.

32 Qudayımız, Óz kelisimine hám súyispenshiligine sadıq bolǵan miyrimli, ullı, qúdiretli hám aybatlı Qudaysań! Assiriya patshalarınıń dáwirinen búginge deyin bizler shekken azaplar, patshalarımız, basshılarımız, ruwxaniylerimiz, payǵambarlarımız, ata-babalarımız hám pútkil xalqımız shekken azaplar Seniń názerińde az bolıp kórinbegey. 33 Basımızǵa túsken hár bir iste Sen ádil boldıń. Óytkeni Sen sadıqlıq penen is tutsań da, bizler jawızlıq isley berdik. 34 Patshalarımız, basshılarımız, ruwxaniylerimiz hám ata-babalarımız Seniń Nızamıń boyınsha jasamadı, Sen bergen buyrıq hám eskertiwlerge qulaq aspadı. 35 Olar óz patshalıǵında, Sen bergen ullı jaqsılıq ishinde jasasa da, keń hám ónimdar jerlerdi ajıratıp berseń de, olar Saǵan qulaq aspadı hám ózleriniń jawız islerinen qaytpadı.

36 Mine, búgin bizler qulmız. Miywelerinen jep, iygiliginen tatsın dep ata-babalarımızǵa bergen jerińde qul bolıp jasap atırmız. 37 Gúnalarımız sebepli, jerimizdiń mol hasılın ústimizden Óziń qoyǵan patshalarǵa beremiz. Olar ózlerimizdi de, mallarımızdı da qálegeninshe basqaradı. Bizler qattı azap shegip atırmız».

Xalıqtıń minnetleme alıwı

38 «Usı isler sebepli bizler jazba túrde qatal minnetleme alamız. Oǵan basshılarımız, lebiylilerimiz hám ruwxaniylerimiz qol qoyıp, mór basadı».