‏ Numbers 1

Izrail xalqınıń birinshi márte dizimge alınıwı

1Izraillılar Mısırdan shıqqannan keyingi ekinshi jıldıń ekinshi ayınıń birinshi kúni Jaratqan Iye Sinay shólinde, Ushırasıw shatırında Muwsaǵa bılay dedi:

2– 3– Sen Xaron menen birge pútkil Izrail jámiyetin tiyreleri hám áwladları boyınsha sanap shıq. Sawashqa jaramlı bolǵan jigirma hám onnan joqarı jastaǵı barlıq erkeklerdi bólimlerge bólip, birme-bir atların jazıp dizimge alıń. 4Sizlerge járdem beriwi ushın janıńızda hár bir urıwdan bir adamnan bolsın. Olar áwlad basshılarınan bolsın. 5Sizlerge járdem beretuǵın adamlardıń atları mınalar: Ruben urıwınan Shedeur ulı Elisur,
6Shimon urıwınan Surishadday ulı Shelumiel,
7Yahuda urıwınan Amminadab ulı Naxshon,
8Issaxar urıwınan Suar ulı Netanel,
9Zebulon urıwınan Xelon ulı Eliab,
10Yusup urpaǵınan bolǵan Efrayım urıwınan Ammihud ulı Elishama,
Yusup urpaǵınan bolǵan Menashshe urıwınan Pedasur ulı Gamaliel,
11Benyamin urıwınan Gidoniy ulı Abidan,
12Dan urıwınan Ammishadday ulı Axiezer,
13Asher urıwınan Oxran ulı Pagiel,
14Gad urıwınan Dewel ulı Elyasaf,
15Naftaliy urıwınan Enan ulı Axira.

16Xalıq arasınan tańlap alınǵan bul adamlar óz urıwınıń kósemleri bolıp, Izraildıń tiyre basshıları edi. 17Muwsa menen Xaron atları atalǵan usı adamlardı shaqırtıp aldı. 18– 19Olar Jaratqan Iyeniń buyrıǵı boyınsha ekinshi aydıń birinshi kúni pútkil xalıqtı jıynadı. Jigirma hám onnan joqarı jastaǵı er adamlardı tiyreleri, áwladları boyınsha atların birme-bir dizimge aldı. Solay etip, Muwsa Sinay shólinde xalıqtı sanap shıqtı.

20– 21Tiyre hám áwladları boyınsha birme-bir atları dizimge alınǵan jigirma hám onnan joqarı jastaǵı urısqa jaramlı er adamlardıń sanı tómendegidey edi: Izraildıń ▼

▼ Izrail – Yaqıptıń basqa atı. Jar 32:27-28 qarań.

tuńǵısh ulı Ruben urıwınan – 46 500 adam,
22– 23Shimon urıwınan – 59 300 adam,
24– 25Gad urıwınan – 45 650 adam,
26– 27Yahuda urıwınan – 74 600 adam,
28– 29Issaxar urıwınan – 54 400 adam,
30– 31Zebulon urıwınan – 57 400 adam,
32– 33Yusup ulı Efrayım urıwınan – 40 500 adam,
34– 35Yusup ulı Menashshe urıwınan – 32 200 adam,
36– 37Benyamin urıwınan – 35 400 adam,
38– 39Dan urıwınan – 62 700 adam,
40– 41Asher urıwınan – 41 500 adam,
42– 43Naftaliy urıwınan – 53 400 adam.

44Muwsa, Xaron hám Izraildıń on eki urıwınıń kósemleri tárepinen dizimge alınǵanlar usılar edi. Hár bir kósem óz urıwınıń wákili edi. 45Izrailda jigirma hám onnan joqarı jastaǵı urısqa jaramlı barlıq izraillılar ózleriniń áwladları boyınsha esapqa alındı. 46Esapqa alınǵanlardıń barlıǵı 603 550 adam boldı.

47Biraq Lebiy urıwı basqalar menen birge dizimge alınbadı. 48Sebebi Jaratqan Iye Muwsaǵa bılay degen edi: 49«Tek Lebiy urıwınıń esabın alma hám olardı basqa izraillılar menen birge dizimge kirgizbe. 50Lebiylilerdi ishinde buyrıqlar jazılǵan eki tas turǵan Muxaddes shatırǵa, oǵan tiyisli hár bir buyım hám zatlarǵa juwapker qılıp qoy. Olar Shatırdı hám onıń barlıq buyımların kóterip alıp júrsin hám abaylap qarap júrsin. Onıń dógeregine óz shatırların qursın. 51Muxaddes shatır kóshirilgende, onı lebiyliler jıynasın, toqtaǵan waqıtta da, onı lebiyliler qursın. Lebiylilerden basqa Shatırǵa jaqınlasqan hár bir adam óltirilsin. 52Izraillılar bólimlerge bólinip, shatırların qursın. Hár bir adam óz ordasında hám óz bayraǵı astında ornalassın. 53Al Izrail jámiyeti Jaratqan Iyeniń ǵázebine ushıramawı ushın, lebiyliler buyrıqlar qoyılǵan Shatırdıń dógeregine óz shatırların qursın hám onı qarawıllasın».

54Izraillılar bulardıń barlıǵın Jaratqan Iye Muwsaǵa qalay buyırǵan bolsa, anıq sonday etip orınladı.