Num 10 | KaaIBT22L | STEP | Jaratqan Iye Muwsaǵa bılay dedi:

‏ Numbers 10

Gúmis kárnaylar

1 Jaratqan Iye Muwsaǵa bılay dedi:

2 – Gúmisten eki kárnaydı shókkishlep soqtır, bulardı jámiyetti jıynaw ushın hám hár bir ordanıń jolǵa shıǵıwı ushın qollanasań. 3 Eki kárnay birge shertilgen waqıtta, barlıq jámiyet seniń qasıńa, Ushırasıw shatırınıń aldına jıynalsın. 4 Tek ǵana bir kárnay shertilse, onda kósemler, yaǵnıy Izraildıń tiyre basshıları seniń janıńa jıynalsın. 5 Kárnay qısqa-qısqa etip shertilgen waqıtta, shıǵıs tárepte qonıs basqanlar jolǵa shıqsın. 6 Ekinshi márte qısqa-qısqa etip shertilgen waqıtta, qubla tárepte qonıs basqanlar jolǵa shıqsın. Kárnaydıń qısqa-qısqa etip shertiliwi urıwlardıń jolǵa shıǵıwı kerekligin bildiredi. 7 Jámiyetti jıynaw ushın kárnaydı uzaq waqıt ápiwayı dawıs penen sherttir. 8 Kárnaylardı Xaronnıń ruwxaniy ulları shertsin. Bul sizler hám keleshek áwladlarıńız ushın máńgi qaǵıyda bolıp qalsın.

9 Úlkeńizde sizlerge hújim qılǵan dushpanǵa qarsı sawashqa shıqqanıńızda, kárnay shertip, belgi beriń. Sonda Qudayıńız Jaratqan Iye bolǵan Men sizlerdi eslep, dushpanlarıńızdan qutqaraman. 10 Shadlı kúnlerińizde – bayramlarıńızda, Jańa ay bayramlarıńızda, jandırılatuǵın qurbanlıqlar hám tatıwlıq qurbanlıqlar bergenińizde kárnay shertiń. Usılay etip, Qudayıńız bolǵan Men sizlerdi esleymen. Men – Qudayıńız Jaratqan Iyemen.

Izraillılardıń Sinaydan ketiwi

11 Izrail xalqı Mısırdan shıqqannan keyin ekinshi jıldıń ekinshi ayınıń jigirmalanshı kúni bult buyrıqlar qoyılǵan shatırdan joqarı kóterildi. 12 Sonda izraillılar da Sinay shólinen jolǵa shıǵıp, bult Paran shólinde toqtaǵansha kóship-qonıp júrdi. 13 Olar Jaratqan Iyeniń Muwsa arqalı bergen buyrıǵı boyınsha jolǵa birinshi márte shıqtı.

14 Olar hár saparı jolǵa shıqqanda, hár bir orda óz bayraǵı astında bir tártipte júretuǵın edi. Birinshi bolıp, Amminadab ulı Naxshon basshılıǵındaǵı Yahuda ordası bólimleri menen birge óz ordasınıń bayraǵı astında kóshti baslap júrdi. 15 Issaxar urıwı bólimine Suar ulı Netanel, 16 Zebulon urıwı bólimine Xelon ulı Eliab basshılıq qılatuǵın edi. 17 Sonnan keyin, Muxaddes shatır jıynastırılıp, onı kóterip, alıp júretuǵın Gershon urpaǵı menen Merariy urpaǵı jolǵa shıqtı.

18 Olardan soń Shedeur ulı Elisur basshılıǵındaǵı Ruben ordası bólimleri menen birge óz ordasınıń bayraǵı astında jolǵa shıqtı. 19 Shimon urıwı bólimine Surishadday ulı Shelumiel, 20 Gad urıwı bólimine Dewel ulı Elyasaf basshılıq qılatuǵın edi. 21 Onnan keyin Qohat urpaǵı muxaddes buyımlardı kóterip, jolǵa shıqtı. Olar belgilengen jerge jetip baraman degenshe, Muxaddes shatır qurılıp bolınıwı tiyis edi.

22 Ammihud ulı Elishama basshılıǵındaǵı Efrayım ordası bólimleri menen birge óz ordasınıń bayraǵı astında jolǵa shıqtı. 23 Menashshe urıwı bólimine Pedasur ulı Gamaliel, 24 Benyamin urıwı bólimine Gidoniy ulı Abidan basshılıq qılatuǵın edi.

25 Kóshtiń eń aqırında Ammishadday ulı Axiezer basshılıǵındaǵı Dan ordası bólimleri menen birge óz ordasınıń bayraǵı astında jolǵa shıqtı. Olar Izrail ordalarınıń artqı saqshıları edi. 26 Asher urıwı bólimine Oxran ulı Pagiel, 27 Naftaliy urıwı bólimine Enan ulı Axira basshılıq qılatuǵın edi. 28 Izraillılar bólimlerge bólinip, usı tártipte jolǵa shıǵatuǵın edi.

29 Muwsa midyanlı qáyin atası Reueldiń ^{▼▼ Reuel – Itronıń basqa atı. Shıǵ 3:1 qarań.} balası Xobabqa bılay dedi:

– Jaratqan Iyeniń: «Sizlerge beremen», – degen jerine baratırmız. Siz de bizler menen birge barıń, sizge jaqsı qatnasta bolamız. Óytkeni Jaratqan Iye Izrailǵa jaqsılıq etiwdi wáde qıldı.

30 Xobab oǵan:

– Yaq, barmayman. Óz elime, aǵayin-tuwǵanlarımnıń janına qaytaman, – dep juwap berdi.

31 Muwsa oǵan bılay dedi:

– Iltimas, bizlerdi taslap ketpeń. Sebebi siz shólde qonıslaytuǵın jerlerdi bilesiz. Bizlerge jol kórsetesiz. 32 Eger bizler menen birge barsańız, Jaratqan Iyeniń isleytuǵın barlıq jaqsılıqların siz benen de bólisemiz.

33 Izraillılar Jaratqan Iyeniń tawınan shıǵıp, úsh kúnlik jol júrdi. Qonıslaytuǵın jerdi tabıw ushın Jaratqan Iyeniń Kelisim sandıǵı olardıń aldında júrip bardı. 34 Qonıs basqan jerden jolǵa shıqqanda, Jaratqan Iyeniń bultı kún boyı olardıń ústinde boldı.

35 Kelisim sandıǵı jolǵa shıqqanda, Muwsa bılay dep aytatuǵın edi:

«Tur, Jaratqan Iye!
Tarqalıp ketsin dushpanlarıń,
Seni jek kórgenler aldıńnan qashıp ketsin!»

36 Kelisim sandıǵı toqtaǵanda bolsa, Muwsa bılay dep aytatuǵın edi:

«Qayt, mıń-mıńlaǵan Izrail xalqınıń Jaratqan Iyesi!»