Num 11 | KaaIBT22L | STEP | Sol waqıtları xalıq qattı nalıy basladı. Jaratqan Iye bunı esitip, ǵázeplendi hám olarǵa ot jiberip, ordanıń shetlerin jaǵıp joq qılıp jiberdi.

‏ Numbers 11

Xalıqtıń nalıwı

1 Sol waqıtları xalıq qattı nalıy basladı. Jaratqan Iye bunı esitip, ǵázeplendi hám olarǵa ot jiberip, ordanıń shetlerin jaǵıp joq qılıp jiberdi. 2 Sonda xalıq Muwsaǵa jalbarındı. Muwsa Jaratqan Iyege duwa etkende, ot sóndi. 3 Jaratqan Iyeniń jibergen otı olardıń arasında janǵanı ushın, sol jer Tabera ^{▼▼ Tabera – «jandırılıw» degendi bildiredi.} dep ataldı.

4 Izrail xalqınıń arasındaǵı basqa milletlerden toplanǵan tártipsiz adamlar nápsiqawlıqqa berile basladı. Izraillılar da olarǵa qosılıp, bılay dep zarlay basladı: «Qáne endi, jewge gósh bolǵanda ma edi! 5 Mısırda teginge jegen balıq, qıyar, ǵarbız, kók piyaz, domalaq piyaz hám sarımsaqlar ele yadımızda. 6 Endi bolsa, dińkemiz qurıǵan. Mına mannadan ^{▼▼ Shıǵ 16:31.} basqa jeytuǵın hesh nárse kórgenimiz joq».

7 Manna kinza tuqımınday bolıp, reńi aqshıl sarı edi. 8 Xalıq dalaǵa shıǵıp, onı jıynap alatuǵın edi hám onı digirmanǵa tartıp yamasa kelige túyetuǵın edi. Onı qazanda qaynatıp, nan pisiretuǵın edi. Bunıń dámi záytún mayı qosılǵan nanǵa uqsas edi. 9 Túnde ordaǵa shıq túskende, manna da birge jawatuǵın edi.

10 Muwsa xalıqtıń, hár bir tiyredegi adamlardıń óz shatırlarınıń aldında turıp, dad salıp atırǵanın esitti. Jaratqan Iye buǵan qattı ǵázeplendi. Muwsa da buǵan qapa bolǵan edi. 11 Sonda Muwsa Jaratqan Iyege bılay dedi:

– Qulıńa ne ushın bunday jamanlıqtı rawa kórdiń? Ne ushın Óz miyrimińdi mennen ayap, bul xalıqtıń júgin maǵan júklediń? 12 Usı xalıqtıń hámmesine júkli bolǵan men be edim? Olardı men tuwǵan ba edim? Bolmasa, ne sebepten Sen maǵan: «Bala baǵıwshınıń emiziwli balanı alıp júrgenindey, olardı ata-babalarına beremen dep ant ishken jerge qollarıńda kóterip alıp bar», – dep aytıp atırsań? 13 Bul xalıq maǵan: «Bizlerge jeytuǵın gósh ber», – dep qoymay atır. Olardıń barlıǵına beretuǵın góshti qay jerden alaman? 14 Bul xalıqtıń barlıǵın bir ózim jetelep alıp júre almayman, sebebi olar men ushın awır júk boladı. 15 Eger maǵan usılay islemekshi bolsań, onda meni óltir. Eger de Seniń miyrimińe erisken bolsam, onda basıma túsken bul awırmanlıqtı kórmeyin.

Jetpis aqsaqaldıń tańlanıwı

16 Jaratqan Iye Muwsaǵa bılay dedi:

– Maǵan Izrail aqsaqallarınan jetpis adamdı jıynap ber. Olar óziń basshı hám qadaǵalawshı dep tán alǵanlarıńnan bolsın. Olardı Ushırasıw shatırına alıp kelip, ózińniń qasıńa turǵız. 17 Men tómen túsip, seniń menen sóylesemen. Seniń ústińdegi Ruwxtan alıp, olarǵa da beremen. Xalıqtıń júgin tek ǵana sen kótermewiń ushın, olar saǵan járdem beredi.

18 Xalıqqa bılay dep ayt: «Erteńgi kún ushın ózlerińizdi pákleń, gósh jeysizler. Sizlerdiń: „Qáne endi, jewge gósh bolǵanda ma edi, Mısırda bolǵan waqtımızda jaqsı edi“, – dep nalıp, dad salǵanıńızdı Jaratqan Iye esitti. Endi gósh jewińiz ushın, Jaratqan Iye sizlerge gósh beredi. 19 Góshti tek ǵana bir kún, eki kún, bes kún, on kún yamasa jigirma kún emes, 20 al bir ay dawamında alqımıńızǵa kelgenshe, kewlińiz aynıǵansha jeysizler. Sebebi sizler arańızda bolıp atırǵan Jaratqan Iyeden júz burdıńlar. Onıń aldında Mısırdan ne ushın shıǵıp kettik, dep nalıp, jıladıńlar».

21 Sonda Muwsa:

– Qasımdaǵı bul xalıq altı júz mıń er adamnan ibarat. Al Sen: «Bul xalıqqa bir ay dawamında jewi ushın gósh beremen», – dep atırsań. 22 Barlıq qoy-eshki, sıyırlar soyılsa da, teńizdegi barlıq balıqlar awlansa da, olarǵa jeter me eken? – dedi.

23 Jaratqan Iye oǵan:

– Meniń qolım kelte me? Saǵan aytqanlarım orınlanatuǵının yamasa orınlanbaytuǵının óz kóziń menen kóreseń, – dedi.

24 Sonnan keyin, Muwsa sırtqa shıǵıp, Jaratqan Iyeniń ózine aytqanların xalıqqa jetkerdi. Xalıqtıń jetpis aqsaqalın jıynap, Muxaddes shatırdıń dógeregine jaylastırdı. 25 Sonda Jaratqan Iye bult ishinde túsip, Muwsa menen sóylesti hám Muwsanıń ústindegi Ruwxtan alıp, jetpis aqsaqalǵa berdi. Olar Ruwxtı alǵan waqıtta, ózgeshe awhalǵa tústi. Biraq bunnan soń, bul jaǵday basqa tákirarlanbadı.

26 Saylanǵan jetpis aqsaqaldıń ishinde bolǵan Eldad penen Medad degen eki adam ordada qalıp, Muxaddes shatırǵa kelmey qalǵan edi. Biraq Ruwx olardıń ústine túsip kelip, olar da ordada ózgeshe awhalǵa túse baslaǵan edi. 27 Bunı kórgen bir jas bala Muwsaǵa juwırıp kelip: «Eldad penen Medad ordada ózgeshe awhalǵa túsip qaldı», – dep xabar jetkerdi.

28 Jas waqtınan Muwsaǵa járdemshi bolıp kiyatırǵan Nun ulı Eshua:

– Mırzam Muwsa, olardı tıyıp qoy! – dedi.

29 Biraq Muwsa:

– Sen meniń ushın qızǵanıp atırsań ba? Qáne endi, Jaratqan Iyeniń pútkil xalqı payǵambar bolsa, Jaratqan Iye olardıń ústine Óz Ruwxın jiberse edi! – dedi. 30 Sonnan soń, Muwsa menen Izraildıń aqsaqalları ordaǵa qaytıp keldi.

Jaratqan Iyeniń bódenelerdi jiberiwi

31 Jaratqan Iye dawıl jiberdi. Dawıl teńiz tárepten bódenelerdi ushırıp ákelip, ordanıń hár tárepine úyip tasladı. Bódeneler ordadan bir kúnlik jol uzaqlıqqa deyin, jerden eki shıǵanaq biyiklikke túsip, ushıp júrgen edi. 32 Sol kúni xalıq kúni menen, túni menen hám erteńine keshke deyin bódene jıynadı. Olardıń hesh biri on xomerden ^{▼▼ On xomer – bir xomer shama menen 220 l.} az jıynamadı. Bódenelerdi keptiriw ushın, olardı shatırlarınıń dógeregine jayıp qoydı. 33 Biraq xalıq góshti ele awzına alıp, jewge úlgermey-aq, Jaratqan Iye ǵázeplenip, olardı kúshli bir oba menen jazaladı. 34 Sonlıqtan sol jerge Kibrot-Hattaawa ^{▼▼ Kibrot-Hattaawa – «nápsi qábirleri» degendi bildiredi.} atı berildi. Óytkeni ol jerde nápsin tıya almaǵan adamlar jerlengen edi.

35 Xalıq Kibrot-Hattaawadan Xaserotqa kóship, sol jerde qaldı.