‏ Numbers 12

Máriyam menen Xaronnıń jazalanıwı

1Muwsa Xabashstannan bolǵan hayalǵa úylengeni ushın, Máriyam menen Xaron oǵan qarsı sóyledi. 2Olar: «Jaratqan Iye tek ǵana Muwsa arqalı sóylegen be edi? Ol bizler arqalı da sóylegen joq pa edi?» – dedi. Jaratqan Iye olardıń bul sózlerin esitti.

3Muwsa jer júzinde jasaytuǵın barlıq adamlardıń ishinde eń kishipeyil adam edi.

4Jaratqan Iye kútilmegende Muwsa, Xaron hám Máriyamǵa:

– Úshewińiz Ushırasıw shatırına barıń, – dedi. Úshewi de shatırǵa bardı. 5Jaratqan Iye minara sıyaqlı bult ishinde túsip, shatırdıń kirer awzınıń aldında turdı hám Xaron menen Máriyamdı shaqırıp aldı. Olar ekewi aldıǵa qaray shıqqanda, 6Jaratqan Iye olarǵa bılay dedi:

– Meniń sózlerime qulaq salıń:

Eger arańızda bir payǵambar bar bolsa,
Men, Jaratqan Iye Ózimdi tanıtaman oǵan ayan arqalı,
Sóylesemen onıń menen túsinde.
 7Biraq qulım Muwsa menen bulay sóylespeymen,
Pútkil úyimdegilerge juwapker adam – Muwsadur.
 8Onıń menen jumbaqlı túrde emes,
Al júzbe-júz sóylesemen ashıq túrde.
Ol Meniń biynemdi kóredi.

Sonday bolsa da, qulım Muwsaǵa qarsı sóylewden qorqpadıńlar ma?

9Sonda Jaratqan Iye olarǵa ǵázepleniwi menen, ol jerden ketti.

10Bult Muxaddes shatırdan ketiwden-aq, Máriyam teri keselligine shalınıp, etleri qar sıyaqlı túlep ketti. Xaron Máriyamǵa burılıp qaraǵanda, onıń teri keselligine shalınǵanın kórdi. 11Xaron Muwsaǵa:

– Oh, mırzam, ótinish aqılsızlıq qılıp, islegen gúnamız ushın jazalama. 12Máriyam anasınıń qarnında-aq denesi shirip baslaǵan óli nárestege uqsap qalmasın, – dedi.

13Muwsa Jaratqan Iyege:

– O, Quday, Máriyamǵa shıpa ber! – dep jalbarındı.

14Jaratqan Iye Muwsaǵa:

– Eger onıń ákesi júzine túkirgende, ol jeti kún dawamında shermende bolıp qalmas pa edi? Onı jeti kún dawamında bóleklep, ordadan shıǵarıp jiberiń, sonnan keyin izine qaytıwına boladı, – dep juwap berdi. 15Solay etip, Máriyam jeti kún dawamında bóleklenip, ordadan shıǵarıp jiberildi, ol qaytıp kelgenshe, xalıq jolǵa shıqpadı.
Copyright information for KaaIBT22L