Num 13 | KaaIBT22L | STEP | Sonnan keyin, xalıq Xaserottan shıǵıp, Paran shóline barıp, qonıs bastı.

‏ Numbers 13

Qanan jerine jansızlardıń jiberiliwi

1 Sonnan keyin, xalıq Xaserottan shıǵıp, Paran shóline barıp, qonıs bastı. 2 Jaratqan Iye Muwsaǵa bılay dedi:

3 – Men Izrail xalqına berip atırǵan Qanan jerin kózden ótkeriw ushın adamlar jiber. Atalarınan taraǵan hár bir urıwdan bir basshıdan jiber.

4 Muwsa Jaratqan Iyeniń buyrıǵı boyınsha Paran shólinen adamlardı jiberdi. Bulardıń hámmesi Izrail xalqınıń basshıları edi. 5 Olardıń atları mınaday edi: Ruben urıwınan Zakkur ulı Shammua,
6 Shimon urıwınan Xoriy ulı Shafat,
7 Yahuda urıwınan Efunne ulı Kaleb,
8 Issaxar urıwınan Yusup ulı Igal,
9 Efrayım urıwınan Nun ulı Hoshea,
10 Benyamin urıwınan Rafu ulı Paltiy,
11 Zebulon urıwınan Sodiy ulı Gaddiel,
12 Yusup urıwınan, yaǵnıy Menashshe urıwınan Susiy ulı Gaddiy,
13 Dan urıwınan Gemalliy ulı Ammiel,
14 Asher urıwınan Mixail ulı Setur,
15 Naftaliy urıwınan Wofsiy ulı Naxbiy,
16 Gad urıwınan Maxiy ulı Geuel.

17 Eldi kózden ótkeriw ushın Muwsanıń jibergen adamları usılar edi. Sol waqıtta Muwsa Nun ulı Hosheaǵa Eshua, dep at berdi ^{▼▼ Hoshea – «qutqaradı», al Eshua – «Jaratqan Iye qutqaradı» degendi bildiredi.}.

18 Muwsa olardı Qanan jerin kózden ótkeriw ushın jiberip atırıp, olarǵa bılay dedi:

– Negeb arqalı júrip, tawlı jerlerge barıń. 19 Ol jerler qanday ekenin, ol jerde jasap atırǵan xalıq kúshli me, yamasa hálsiz be, olar kóp pe, yamasa az ba, bilip alıń. 20 Olardıń jasap atırǵan jeri jaqsı ma, yamasa jaman ba, qalaları qorǵansız ba, yamasa qorǵanlı ma, kóriń. 21 Topıraǵı ónimdarlı ma, yamasa ónimsiz be, dógeregi terekli me, yamasa joq pa, bilip keliń. Qolıńızdan kelgeninshe, ol jerdiń jetistirgen miywelerinen alıp keliń!

Sol waqıtta júzim pisigi endi baslanıp atırǵan edi.

22 Solay etip, sol adamlar jolǵa shıǵıp, eldi Zin shólinen baslap, Lebo-Xamatqa jaqın bolǵan Rexobqa deyin kózden ótkerdi. 23 Olar Negebti kesip ótip, anaqlardıń Aximan, Sheshay hám Talmay degen tiyreleri jasap atırǵan Xebron qalasına bardı. Xebron Mısırdaǵı Soan qalasınan jeti jıl aldın qurılǵan edi. 24 Jansızlar Eshkol sayına jetip barǵanda, ol jerden bir solqım júzimdi kesip aldı. Olardan ekewi bir qada aǵashqa júzimdi ildirip alıp júrdi. Sonıń menen birge, anar hám ánjir miywesin de aldı. 25 Izraillılardıń kesip alǵan júzim solqımı sebepli, sol say Eshkol ^{▼▼ Eshkol – «solqım» degendi bildiredi.} dep ataldı.

26 Jansızlar qırıq kún jerdi aralap shıqqannan keyin izlerine qayttı. 27 Olar Paran shólindegi Qadeshke ^{▼▼ Qadesh – yaǵnıy Qadesh-Barniya.}, Muwsa menen Xaronnıń hám Izrail jámiyetiniń janına keldi. Olarǵa hám pútkil jámiyetke kórgen-bilgenlerin aytıp, sol jerdiń miywelerin kórsetti. 28 Olar Muwsaǵa bılay dep bayanladı:

– Bizlerdi jibergen jerge bardıq. Ol jerde shınında da sút hám pal aǵıp turǵan eken! Mine, mınaw sol jerdiń miywelerinen! 29 Biraq ol jerde jasap atırǵan xalıq kúshli, qalaları da qorǵanlı hám júdá úlken eken. Hátteki, ol jerde Anaq áwladınan shıqqan dáw adamlardı da kórdik. 30 Amalek xalqı Negebte, xet, ebus hám amor xalıqları tawlı úlkede, qanan xalqı teńizdiń boyında hám Iordan dáryasınıń jaǵasında jasaydı eken.

31 Kaleb Muwsanıń aldında xalıqtı tınıshlandırıp:

– Ol jerge barıp, eldi qolǵa kirgizeyik. Álbette, buǵan jeterli kúshimiz bar, – dedi.

32 Degen menen, onıń menen birge barǵan adamlar:

– Bul xalıqqa qarsı gúrese almaymız, olar bizlerden góre kúshlirek, – dedi. 33 Olar ózleri kózden ótkerip kelgen el haqqında izraillılardıń arasında mınaday jaman mısh-mıshlar tarqatıp júrdi:

– Bizler kózden ótkerip kelgen el, ishine mákan basatuǵınlardı jep pitiretuǵın el eken. Sol elde jasap atırǵan hár bir adam boyshań hám iri. 34 Dáwlerdi, dáwlerdiń áwladınan bolǵan anaqlardı kórdik. Olardıń qasında ózlerimizdi shegirtke sıyaqlı sezdik, olarǵa da sonday bolıp kórindik.