‏ Numbers 14

Xalıqtıń kóterilis qılıwı

1Sol túni pútkil jámiyet qattı dawıslap, dad salıp jıladı. 2Pútkil Izrail xalqı Muwsa menen Xaronǵa narazı bolıp, bılay dep tońqılday basladı: «Bunnan góre, Mısırda yamasa usı shólde ólip ketkenimiz jaqsı edi! 3Jaratqan Iye ne ushın bizlerdi usı elge alıp keldi? Bizlerdi qılıshtan ótkiziw ushın ba? Bala-shaǵalarımız tutqın boladı. Bunıń ornına Mısırǵa qaytıp ketkenimiz bizler ushın jaqsıraq emes pe?»

4Sonnan keyin, olar bir-birine: «Ózlerimizge bir basshı saylap alıp, Mısırǵa qaytayıq», – desti.

5Sonda Muwsa menen Xaron Izrail jámiyetiniń aldında et betinen jerge jıǵıldı. 6Eldi aralap qaytqanlardan Nun ulı Eshua menen Efunne ulı Kaleb qayǵırıp kiyimlerin jırttı da, 7pútkil Izrail jámiyetine bılay dedi:

– Bizler kórip kelgen el – júdá jaqsı jer. 8Eger Jaratqan Iyeniń bizlerge miyrimi tússe, Ol bizlerdi sút hám pal aǵıp turǵan sol jerge alıp baradı hám onı bizlerge beredi. 9Tek ǵana Jaratqan Iyege qarsı shıqpańlar! Ol jerde jasap atırǵan xalıqtan qorqpańlar! Olar bizlerge ańsat ǵana olja boladı. Qorǵawshıları olardı taslap ketti, al Jaratqan Iye bizler menen birge. Olardan qorqpańlar!

10Degen menen, pútkil jámiyet olardı tas boran qılıwdı niyet qıldı. Sonda Jaratqan Iyeniń saltanatı Ushırasıw shatırında pútkil Izrail xalqına kórindi.

Muwsanıń xalıq ushın duwa etiwi

11Jaratqan Iye Muwsaǵa bılay dedi:

– Qashanǵa deyin bul xalıq Maǵan húrmetsizlik qıladı? Olardıń arasında qanshelli káramat kórsetkenime qaramay, qashanǵa deyin Maǵan isenbey júredi? 12Men olardı illet penen jazalayman, miyrastan mahrum qılaman. Al sennen olardan ullıraq hám kúshlirek bir xalıq dóretemen.

13Biraq Muwsa Jaratqan Iyege bılay dedi:

– Onda mısırlılar bul haqqında esitedi. Bul xalıqtı Óz kúshiń menen olardıń arasınan alıp shıqqan ediń. 14Olar Qanan jerinde jasaytuǵın xalıqqa bul haqqında aytadı. Jaratqan Iye, bul xalıqtıń arasında bolıp, olar menen júzbe-júz kóriskenińnen xabarı bar. Seniń bultıń olardıń ústinde hámme waqıt turǵanın, kúndiz minara sıyaqlı bult ishinde, túnde minara sıyaqlı ot ishinde olarǵa jol kórsetkenińdi biledi. 15– 16Eger bul xalıqtı bir adam sıyaqlı etip óltirseń, Sen haqqında esitken xalıqlar: «Jaratqan Iye ant ishken bul jerge Óz xalqın alıp kele almaǵanı ushın, olardı shólde qırıp jiberdi», – dep aytadı.

17Endi Óz kúshińdi kórset, o, Iyem! Sen Óziń bılay dep aytqan ediń: 18«Jaratqan Iye bolǵan Men sabır-taqatlıman, súyispenshiligim ullı, ayıp hám jınayattı keshiremen. Biraq ayıplını jazasız qaldırmayman, ákesiniń islegen ayıbınıń jazasın úshinshi hám tórtinshi áwladlarınan talap qılaman». 19Mısırdan shıqqannan baslap, búgingi kúnge deyin bul xalıqtı keshirip keldiń. Endi Ózińniń ullı súyispenshiligińe say olardıń ayıpların keshire gór.

20Jaratqan Iye oǵan bılay dep juwap berdi:

– Seniń tilegińe bola olardı keshiremen. 21Degen menen, máńgi bar bolǵan Men jer júzin toltırıp turǵan ullılıǵım menen ant ishemen: 22ullılıǵımdı, Mısırda hám shólde kórsetken káramatlarımdı kórse de, Meni on márte sınaǵan, sózime qulaq aspaǵan bul adamlardıń hesh biri 23Men ata-babalarına beremen dep ant ishken jerdi kórmeydi. Maǵan húrmetsizlik qılǵanlardıń hesh biri ol jerdi kórmeydi.

24Biraq qulım Kaleb basqalarǵa uqsamaydı, ol pútkil júregi menen Maǵan erdi. Sonıń ushın, Men onı ózi aralap, kózden ótkerip qaytqan elge alıp baraman. Onıń áwladı sol jerdi iyelep aladı. 25Amalek penen qanan xalıqları usı oypatlıqlarda jasaydı. Sonıń ushın, sizler erteń artıńızǵa qaytıp, Qızıl teńizge qaray júrińler, shólge barıńlar.

Izraillılardıń narazılıǵı ushın jazalanıwı

26Jaratqan Iye Muwsa menen Xaronǵa bılay dedi:

27– Mına jawız jámiyet qashanǵa deyin Maǵan narazı bolıp, tońqıldaydı? Maǵan qarsı sóylegen Izrail xalqınıń nalıwın esittim. 28Olarǵa Meniń mına sózlerimdi jetkiz: «Tiriligim haqı ant ishemen: aytqan sózlerińizdi sózsiz ózlerińizdiń basıńızǵa salaman. 29Óliklerińiz usı shólde qaladı. Maǵan narazı bolıp, tońqıldaǵanlardıń hámmesi – esaptan ótken jigirma hám onnan joqarı jastaǵılar usı shólde óledi. 30Sizlerdi qonıslandıraman dep ant ishken elge Efunne ulı Kaleb penen Nun ulı Eshuadan basqa hesh kim kirmeydi. 31Biraq sizlerdiń tutqın boladı, dep aytqan balalarıńızdı sol jerge kirgizemen. Sizler bas tartqan sol eldi balalarıńız kóretuǵın boladı. 32Sizlerdiń óliklerińiz bolsa usı shólde qalıp ketedi. 33Hámmeńiz ólip ketemen degenshe, balalarıńız shólde qırıq jıl shopanlıq qıladı hám sizlerdiń opasızlıǵıńız sebepli, olar azap shegedi. 34Sizler eldi qırıq kún dawamında aralap shıqqan edińler. Endi hár bir kún ushın bir jıldan qırıq jıl ayıbıńızdıń jazasın tartasızlar. Sonda Meniń sizlerden júz burǵanımdı bilip alasızlar!» 35Men, Jaratqan Iye aytqanımday, Maǵan qarsı jıynalǵan bul jawız jámiyetke bulardı sózsiz isleymen. Olar usı shólde qırılıp, ólip ketedi.

36Muwsanıń eldi kózden ótkerip qaytıwǵa jibergen adamları qaytıp kelip, el haqqında jaman xabar tarqatıwı pútkil jámiyettiń Jaratqan Iyege narazı bolıwına sebep bolǵan edi. 37Sol el haqqında jaman xabar taratqan bul adamlar Jaratqan Iyeniń aldında oba keselligine shalınıp qaytıs boldı. 38Eldi aralaw ushın ketken jansızlardan tek ǵana Nun ulı Eshua menen Efunne ulı Kaleb tiri qaldı.

Izraillılardıń Qanandı basıp alıwǵa urınıwı

39Muwsa Jaratqan Iyeniń sózlerin pútkil Izrail xalqına aytqanda, xalıq tereń qayǵıǵa battı. 40Erteńine azanda olar tawlı úlkeniń joqarısına shıǵıp baratırıp, bılay dedi:

– Awa, bizler gúna islegenimizdi moyınlaymız. Mine, endi Jaratqan Iyeniń wáde qılǵan jerine barıwǵa tayarmız.

41Degen menen, Muwsa:

– Ne ushın Jaratqan Iyeniń buyrıǵına jáne qarsı shıǵıp atırsızlar? Bunıń menen hesh nársege erise almaysızlar. 42Sawashqa shıqpańlar, óytkeni Jaratqan Iye sizler menen birge emes. Dushpanlarıńızdıń aldında jeńiliske ushıraysızlar. 43Amalek hám qanan xalıqları ol jerde sizlerge qarsılıq kórsetedi hám sizlerdi qılısh júzinen ótkeredi. Óytkeni Jaratqan Iyeniń izinen júriwden bas tarttıńlar. Jaratqan Iye de sizler menen birge bolmaydı.

44Solay bolsa da, izraillılar ózleriniń aytqanınan qalmay, tawlı úlkeniń joqarısına shıqtı. Jaratqan Iyeniń Kelisim sandıǵı menen Muwsa ordada qaldı. 45Tawlı úlkede jasaytuǵın amalek penen qanan xalıqları olarǵa qarsı hújim qıldı hám olardı Xorma qalasına deyin qıyratıp, tas-talqan qıldı.