‏ Numbers 16

Qorax, Datan hám Abiramnıń kóterilisi

1– 2Lebiy urıwınıń Qohat tiyresinen bolǵan Ishar ulı Qorax, Ruben urıwınan Eliabtıń ulları Datan menen Abiram hám Pelet ulı On birigip, Muwsaǵa qarsı kóterilis qıldı. Jámiyet saylaǵan Izrail xalqınıń abıraylı eki júz eliw basshısı da olarǵa qosıldı. 3Olar birgelikte Muwsa menen Xaronnıń aldına barıp:

– Sizler júdá háddińizden asıp kettińiz! Hámmemiz Jaratqan Iyeniń muxaddes jámiyetiniń aǵzaları emespiz be? Ol hámmemizdiń aramızda jasaydı. Solay eken, sizler ne ushın ózlerińizdi Jaratqan Iyeniń jámiyetinen ústem qoyasızlar? – dedi.

4Bunı esitken Muwsa Jaratqan Iyeniń aldında et betinen jerge jıǵıldı. 5Keyin ol Qorax hám onıń sheriklerine bılay dedi:

– Azanda Jaratqan Iye kimdi Ózine baǵıshlap alǵanın kórsetedi. Jaratqan Iye kimdi tańlaǵan bolsa, sol adamdı Óz dárgayına jaqınlastıradı. 6Háy, Qorax, sen óz sherikleriń menen birge tútetki tútetiletuǵın ıdıslarıńızdı alıń. 7Erteń Jaratqan Iyeniń aldında ıdıslarıńızǵa ot salıp, ústine tútetkińizdi qoyıń. Sonda Jaratqan Iye kimdi tańlasa, sol adamdı Ózine baǵıshlap alǵanı. Háy, lebiyliler, sizler háddińizden asıp kettińiz!

8Muwsa Qoraxqa aytıp atırǵan sózin bılay dep dawam etti:

– Háy, lebiyliler, maǵan qulaq salıń! 9Izraildıń Qudayı sizlerdi Izrail xalqı arasınan ayırıp alıp, Jaratqan Iyeniń Muxaddes shatırındaǵı xızmetti orınlawıńız ushın, Ózine jaqınlastırdı. Jáne de, jámiyettiń aldında turıp, olarǵa xızmet etiwińiz ushın sizlerdi tańlap aldı, bulardıń barlıǵı sizlerge azlıq qıldı ma? 10Qorax, Jaratqan Iye seni hám pútkil lebiyli tuwısqanlarıńdı Ózine jaqınlastırǵan bolsa, bul jetpegendey, endi sizler ruwxaniylikti de qálep atırsızlar ma? 11Háy, Qorax, seniń hám sheriklerińniń bunday etip jıynalıwı Xaronǵa emes, al Jaratqan Iyege qarsı shıǵıwıńızdı bildiredi.

12Sonnan keyin, Muwsa Eliabtıń ulları Datan menen Abiramdı shaqırttı. Biraq olar:

– Barmaymız. 13Sen bizlerdi shólde óltiriw ushın sút hám pal aǵıp turǵan elden alıp shıqtıń. Bul jetpegendey, bizlerdiń ústimizden biylik qılmaqshısań ba? 14Sen bizlerdi sút hám pal aǵıp turǵan jerge ákelmediń, bizlerge múlik etip atız hám júzim baǵların da bermediń. Bizlerdiń kózimizdi baylamaqshımısań? Yaq, seniń aldıńa barmaymız, – dedi.

15Muwsa qattı ashıwlanıp, Jaratqan Iyege:

– Olardıń sadaqaların qabıl etpe. Men olardan bir eshek te alǵan joqpan, olardıń hesh birine jamanlıq qılǵan joqpan, – dedi.

16Keyin Muwsa Qoraxqa:

– Erteń sen barlıq sherikleriń menen birge Jaratqan Iyeniń aldına kel. Xaron da usı jerde boladı. 17Hár birińiz bir tútetki tútetiletuǵın ıdıstan, barlıǵı bolıp eki júz eliw ıdıs alıp kelip, ishine xosh iyisli tútetki salıń. Sen de óz ıdısıńdı alıp kel, Xaron da ózinikin alıp keledi, – dedi.

18Solay etip, olardıń hár biri ishine ot hám tútetki salıp, óz ıdısların alıp keldi. Keyin olar Muwsa hám Xaron menen birge Ushırasıw shatırınıń aldına kelip turdı. 19Qorax pútkil jámiyetti Muwsa menen Xaronnıń qasına, Ushırasıw shatırınıń aldına jıynaǵanda, Jaratqan Iyeniń saltanatı hámmege kórindi. 20Jaratqan Iye Muwsa menen Xaronǵa bılay dedi:

21– Mına jámiyettiń arasınan shetke shıǵıń, Men olardı kózdi ashıp-jumǵansha joq qılıp jiberemen.

22Muwsa menen Xaron et betinen jerge jıǵılıp:

– Quday, pútkil tiri jannıń Qudayı! Bir adam gúna isledi dep, pútkil jámiyetke ǵázepleneseń be? – dedi.

23Jaratqan Iye Muwsaǵa bılay dedi:

24– Jámiyetke: «Qoraxtıń, Datannıń hám Abiramnıń shatırlarınan uzaqlasıń», – dep ayt.

25Muwsa Datan menen Abiramnıń qasına bardı. Izrail aqsaqalları da Muwsanıń izine erdi. 26Muwsa jámiyetke qarata:

– Bul jaman adamlardıń shatırlarınan uzaqlasıń! Olardıń hesh bir zatına qol tiygizbeń. Bolmasa, olardıń gúnası sebepli, sizler de joq bolasızlar, – dedi. 27Solay etip, jámiyet Qorax, Datan hám Abiramnıń shatırlarınan uzaqlasıp turdı. Datan menen Abiram hayalları hám balaları menen birge sırtqa shıǵıp, shatırlarınıń aldında turǵan edi.

28Sonda Muwsa bılay dedi:

– Bulardıń barlıǵın islewim ushın Jaratqan Iyeniń meni jibergenin, men ózligimnen bir nárse de islemegenimdi mınadan bilip alasızlar: 29eger de bul adamlar óz ájeli menen, hámme adamlardıń basına túsetuǵın ólim menen ólse, onda bilip qoyıń, Jaratqan Iye meni jibermegen boladı. 30Biraq Jaratqan Iye ádetten tıs bir nárse islese, jer jarılıp, olardı hám olarǵa tiyisli hár bir zattı jutsa hám olar óliler mákanına tiriley kirip ketse, onda bul adamlardıń Jaratqan Iyege húrmetsizlik qılǵanın bilip alasızlar.

31Muwsa usı sózlerin aytıp bolar-bolmastan, Datan hám Abiramnıń ayaq astındaǵı jer jarılıp ketti. 32Jer jarılıp, olardı, olardıń shańaraqların, Qoraxtıń sherikleri menen mal-múliklerin jutıp jiberdi. 33Solay etip, olar bar mal-múlki menen birge tiriley óliler mákanına kirip ketti. Jer jawılıp, olardıń ústin qaplap tasladı hám olar jámiyettiń arasınan joq qılındı. 34Olardıń baqırısqan dawısların esitken átiraptaǵı izraillılar: «Jer bizlerdi de jutıp jibermesin!» – dep ján-jaqqa qashıp ketti.

35Sol waqıtta Jaratqan Iyeniń jibergen otı xosh iyisli zatlardı tútetip turǵan eki júz eliw adamdı jaǵıp, joq qılıp jiberdi.

Tútetki tútetiletuǵın ıdıslar

36Jaratqan Iye Muwsaǵa jáne bılay dedi:

37– Xaronnıń ulı ruwxaniy Elazarǵa tútetki tútetiletuǵın ıdıslardı kúldiń ishinen alıp shıǵıwın hám ishindegi shoqlardı ordanıń bir shetine tógiwin ayt. Sebebi tútetki ıdıslar muxaddes. 38Islegen gúnaları ushın óltirilgen bul adamlardıń tútetki ıdısların shókkishlep jalpaytıń da, qurbanlıq orındı usılar menen qaplań. Ídıslar Jaratqan Iyege usınılǵanı ushın muxaddes. Bular izraillılar ushın eskertetuǵın bir belgi bolsın.

39Solay etip, ruwxaniy Elazar janıp ólgen adamlardıń alıp kelgen tútetki tútetiletuǵın qola ıdısların jıynap aldı. Olar ıdıslardı qurbanlıq orındı qaplaw ushın shókkishlep jalpaytıp shıqtı. 40Bul izraillılarǵa Xaronnıń áwladınan basqa hesh kimniń Jaratqan Iyeniń aldına shıǵıp, xosh iyisli tútetki tútetiwge bolmaytuǵının, bolmasa sonday islegen adam Qorax penen onıń sherikleri sıyaqlı bolatuǵının eskertip turatuǵın edi. Solay etip, Jaratqan Iyeniń Muwsa arqalı aytqanınday etip islendi.

Izraillılardıń kóterilisi hám jazalanıwı

41Erteńine pútkil Izrail jámiyeti Muwsa menen Xaronǵa narazı bolıp: «Jaratqan Iyeniń xalqın sizler óltirdińler», – dep tońqılday basladı.

42Izrail jámiyeti Muwsa menen Xaronǵa qarsı jıynalıp, Ushırasıw shatırına qaray tuwrı burılıp qaraǵanda, shatırdı bult qapladı hám Jaratqan Iyeniń saltanatı kórindi. 43Sonda Muwsa menen Xaron Ushırasıw shatırınıń aldına keldi. 44Jaratqan Iye Muwsaǵa:

45– Bul jámiyettiń arasınan shetke shıǵıń hám Men olardı kózdi ashıp-jumǵansha joq qılıp jiberemen, – dedi. Sonda Muwsa menen Xaron et betinen jerge jıǵıldı.

46Sonnan keyin, Muwsa Xaronǵa:

– Tútetki ıdısın alıp, ishine qurbanlıq orınnan shoq sal, ottıń ústine xosh iyisli tútetki qoy. Qunın ótew ushın dárhal jámiyetke bar. Sebebi Jaratqan Iye ǵázebin shashıp atır. Al xalıqqa óltiretuǵın oba tarqalıp basladı, – dedi.

47Xaron Muwsanıń aytqanların orınlap, tútetki ıdısın aldı da, jámiyettiń ortasına juwırıp bardı. Xalıqtıń arasında nabıt qılatuǵın kesellik baslanǵan edi. Xaron xosh iyisli tútetki usınıp, jámiyettiń qunın ótedi. 48Ol tiriler menen ólilerdiń arasında turǵanda, nabıt qılatuǵın kesellik toqtadı. 49Al Qorax sebepli ólgenlerden tısqarı, nabıt qılatuǵın kesellikten ólgenlerdiń sanı on tórt mıń jeti júz adam boldı. 50Nabıt qılatuǵın kesellik toqtaǵannan keyin, Xaron Ushırasıw shatırınıń aldında turǵan Muwsanıń janına qayttı.