Num 17 | KaaIBT22L | STEP | Jaratqan Iye Muwsaǵa bılay dedi:

‏ Numbers 17

Xaronnıń tayaǵı

1 Jaratqan Iye Muwsaǵa bılay dedi:

2 – Izrail xalqına hár bir urıw kósemi ushın bir danadan on eki tayaq alıp keliwdi buyır. Hár bir urıw basshısınıń atın óz tayaǵınıń ústine jaz. 3 Lebiy urıwına tiyisli tayaqtıń ústine Xaronnıń atın jaz. Hár bir urıw basshısı ushın bir tayaqtan bolıwı tiyis. 4 Tayaqlardı Ushırasıw shatırındaǵı Men sizler menen ushırasatuǵın orınnıń, Kelisim sandıǵınıń aldına qoy. 5 Men tańlap alatuǵın adamnıń tayaǵı bórtik shıǵaradı. Solay etip, Izrail xalqınıń sizlerge qarsı shıǵıp, narazı bolıp, tońqıldawlarına shek qoyaman.

6 Muwsa aytılǵanlardı Izrail xalqına jetkerdi. Xalıqtıń kósemleri hár bir urıw ushın bir danadan on eki tayaq alıp keldi. Xaronnıń tayaǵı da solardıń ishinde edi. 7 Muwsa tayaqlardı buyrıqlar qoyılǵan shatırǵa, Jaratqan Iyeniń aldına qoydı.

8 Muwsa erteńine shatırǵa kirip qarasa, Lebiy urıwı ushın alıp kelingen Xaronnıń tayaǵı bórtik shıǵarıp ǵana qoymay, ol gúllep, badam jemisin de bergen eken. 9 Muwsa barlıq tayaqlardı Jaratqan Iyeniń aldınan alıp shıǵıp, Izrail xalqına kórsetti. Xalıq tayaqlardı qarastırıp, hár biri ózlerine tiyisli tayaqtı aldı.

10 Jaratqan Iye Muwsaǵa:

– Kóterilisshilerge eskertiw bolıwı ushın, Xaronnıń tayaǵın Kelisim sandıǵınıń aldına qaytadan aparıp qoy. Usılayınsha, sen kóterilislerin toqtatıp, olardıń ólip ketiwine jol qoymaysań, – dedi. 11 Muwsa Jaratqan Iyeniń buyırǵanınday etip orınladı.

12 Izraillılar Muwsaǵa:

– Ólip ketemiz! Qırılıp ketemiz! Hámmemiz qırılıp ketemiz! 13 Jaratqan Iyeniń Muxaddes shatırına jaqınlasqan hár bir adam óledi. Endi hámmemiz qırılıp ketemiz be? – dedi.