‏ Numbers 18

Ruwxaniyler menen lebiylilerdiń wazıypası

1Jaratqan Iye Xaronǵa bılay dedi:

– Sen, ullarıń hám pútkil Lebiy urıwı Muxaddes mákanǵa qarsı islengen gúnaǵa juwapker bolasızlar. Al ruwxaniylik xızmetińizge baylanıslı gúna ushın tek ǵana sen hám ullarıń juwapker bolasızlar. 2Sen hám ullarıń buyrıqlar qoyılǵan shatırdıń aldında xızmet etkenińizde, babańız Lebiydiń áwladınan bolǵan tuwısqanlarıńız da sizlerge járdem beretuǵın bolsın. 3Olar seniń juwapkershiligiń astında Muxaddes shatırǵa tiyisli xızmetlerdi orınlasın. Biraq olar muxaddes jerdiń buyımlarına yamasa qurbanlıq orınǵa jaqınlamasın, bolmasa olar da, sizler de ólip qalasızlar. 4Olar seniń menen birge Ushırasıw shatırına baylanıslı barlıq wazıypalardı orınlasın. Lebiylilerden basqa hesh bir adam sizler menen birge xızmet qılmasın.

5Endigiden bılay, Izrail xalqına qáhárlenbewim ushın, Muxaddes jerde hám qurbanlıq orında tek ǵana sizler xızmet qılasızlar. 6Men izraillılar arasınan lebiyli tuwısqanlarıńızdı sizlerge járdemshi qılıp, tańlap aldım. Ushırasıw shatırına baylanıslı xızmetti orınlawı ushın, olar Maǵan baǵıshlanǵan. 7Degen menen, qurbanlıq orındaǵı hám perdeniń artındaǵı Eń muxaddes bólmege baylanıslı ruwxaniylik xızmetti tek ǵana sen óz ullarıń menen orınlaysań. Ruwxaniylik xızmetti saǵan sıy qılıp berdim. Sennen basqa kim de kim ol jerge jaqınlasa, ol óltirilsin.

Ruwxaniylerdiń payı

8Jaratqan Iye Xaron menen bolǵan sáwbetin bılay dep dawam etti:

– Izrail xalqınıń Maǵan ajıratqan muxaddes sıyların baqlawdı saǵan tapsırdım. Bulardı sizlerdiń ruwxaniylik xızmetińiz ushın saǵan hám ullarıńa máńgige pay qılıp berdim. 9Qurbanlıq orında Maǵan usınılǵan eń muxaddes sadaqalar, yaǵnıy ǵálle sadaqasınıń, gúna hám ayıp qurbanlıqlarınıń jandırılmaytuǵın bólekleri, saǵan hám seniń ullarıńa tiyisli boladı. 10Bulardı eń muxaddes zat sıpatında jewińiz tiyis, sebebi bular júdá muxaddes. Bul sadaqa hám qurbanlıqlardan tek ǵana erkek adamlardıń jewine boladı.

11Jáne de, mınalar da saǵan tiyisli boladı: izraillılardıń alıp kelgen joqarı kóterip usınatuǵın sıylarınan ajıratqan bóleklerin saǵan hám seniń ul-qızlarıńa máńgige pay qılıp berdim. Shańaraǵıńdaǵı hár bir pák adam bulardan jewine boladı.

12Olardıń Maǵan, Jaratqan Iyege alıp kelgen dáslepki ónimlerin – záytún mayınıń, taza sharaptıń hám ǵálleniń eń sapalı bólegin sizlerge berdim. 13Elde jetistirilgen dáslepki zúráátlerden Maǵan, Jaratqan Iyege alıp kelingenlerdiń hámmesi sizlerge tiyisli. Shańaraǵıńdaǵı hár bir pák bolǵan adam olardan jewine boladı.

14Izrailda Jaratqan Iyege tolıǵı menen baǵıshlanǵan hár bir zat sizlerdiki boladı. 15Izrail xalqınıń Maǵan alıp kelgen adamlardıń da, mallardıń da qarınnan birinshi shıqqanlardıń hámmesi sizlerdiki boladı. Biraq adamlardıń hám haram esaplanǵan haywanlardıń birinshi tuwılǵan balası ushın qun alıwıń kerek. 16Birinshi tuwılǵan ul bir aylıq bolǵanda, onıń qunı ushın bes shekel alasań. Hár bir shekel Muxaddes orın ólshemi menen jigirma geradan bolsın.

17Biraq sıyırdıń, qoydıń hám eshkiniń birinshi tuwılǵan tóli ushın qun almaysań. Olar Men ushın arnalǵan. Olardıń qanların qurbanlıq orınǵa serpip, mayların Jaratqan Iyege xosh iyisli sıy qılıp, tútetip jandırıp jibereseń. 18Bulardıń joqarı kóterip usınılǵan tósi hám oń sanı seniki bolǵanı sıyaqlı, góshi de seniki boladı. 19Izraillılardıń Maǵan ajıratıp usınǵan muxaddes sıylarınıń barlıǵın saǵan hám ul-qızlarıńa máńgige pay etip beremen. Bul sen hám seniń áwladıń ushın berilgen Meniń máńgi buzılmas kelisimim boladı.

20Keyin Jaratqan Iye Xaronǵa jáne bılay dedi:

– Xalıqtıń arasında sizlerdiń úles jerińiz bolmaydı, olardıń arasında hesh qanday payıńız bolmaydı. Sizlerdiń izraillılar arasındaǵı payıńız hám úlesińiz Men bolaman.

Lebiylilerdiń payı

21Lebiylilerdiń Ushırasıw shatırındaǵı jumısı ushın, Izrailda jıynalatuǵın barlıq onnan birlerdi olarǵa pay qılıp beremen. 22Bunnan bılay izraillılar Ushırasıw shatırına jaqın kelmesin. Bolmasa, olar sol gúnanıń jazasın tartıp óledi. 23Ushırasıw shatırına tiyisli jumıstı lebiyliler isleydi, shatırǵa qarsı islengen hár qanday ayıpqa olar juwapker boladı. Bul keleshek áwladlarıńız boyınsha máńgi qaǵıyda bolsın. Izraillılardıń arasında lebiylilerdiń jer úlesi bolmaydı. 24Bunıń ornına Men lebiylilerge izraillılardıń Maǵan, Jaratqan Iyege ajıratıp bergen onnan birlerin úles qılıp beremen. Sonıń ushın, Men: «Izraillılardıń arasında lebiylilerdiń úles jeri bolmaydı», – dep aytqan edim.

Lebiylilerdiń onnan birleri

25Jaratqan Iye Muwsaǵa bılay dedi:

26– Lebiylilerge mınanı ayt: «Men úles qılıp sizlerge bergen úsirlerdi izraillılardan alǵanıńızda, alǵan úsirlerdiń onnan birin shıǵarıp, Maǵan, Jaratqan Iyege sıy qılıp beriń. 27Men sizlerdiń bul sıyıńızdı qırmannan ákelingen ǵálle hám júzim sıǵatuǵın shuqırdan ákelingen sharap sıpatında qabıllayman. 28Usılay etip, sizler izraillılardan alǵan barlıq úsirlerden onnan birin shıǵarıp, Jaratqan Iyege sıy qılıp beresizler. Usı sıydı ruwxaniy Xaronǵa ákelip beriń. 29Sizlerge berilgen barlıq sıylardıń eń jaqsısın, eń muxaddesin ajıratıp, Jaratqan Iyege berińler».

30Lebiylilerge jáne bılay dep ayt: «Sıylardıń eń jaqsısın Jaratqan Iyege ajıratqanıńızdan keyin, qalǵanı óz qırmanıńızdan bolǵan ónim yamasa iskenjeden alınǵan sharap sıpatında ózlerińizge qaladı. 31Bunı sizler shańaraǵıńız benen qálegen jerde jewińizge boladı. Sebebi bul – sizlerdiń Ushırasıw shatırında islegen xızmetińiz ushın berilgen tólem. 32Eger onnan birden eń jaqsısın Maǵan, Jaratqan Iyege ajıratıp usınsańız, ózlerińizge gúna júklemeysizler. Ólip qalmawıńız ushın, izraillılardıń usınǵan muxaddes sadaqaların haramlamańlar».