Num 19 | KaaIBT22L | STEP | Jaratqan Iye Muwsa menen Xaronǵa bılay dedi:

‏ Numbers 19

Gúnadan pákleniw rásimi

1 Jaratqan Iye Muwsa menen Xaronǵa bılay dedi:

2 – Jaratqan Iye buyırǵan nızamnıń talapları mınalar: izraillılarǵa minsiz, kemshiligi joq hám hesh qanday moyıntırıq salınbaǵan qızıl jas sıyır alıp keliwin aytıń. 3 Sıyır ruwxaniy Elazarǵa berilsin. Keyin onı ordanıń sırtına shıǵarıp, Elazardıń kóz aldında shalınsın. 4 Ruwxaniy Elazar barmaǵın sıyırdıń qanına batırıp, onı Ushırasıw shatırınıń aldınǵı tárepine jeti mártebe serpsin. 5 Sonnan keyin, Elazardıń kóz aldında sıyır, onıń terisi, góshi, qanı hám dárisi menen birge jandırıp jiberilsin. 6 Ruwxaniy kedr aǵashın, mayoran shóbin ^{▼▼ Mayoran shóbi – bul nazbaygúl shóbine tuqımlas ósimlik.} hám qırmızı jipti alıp, olardı janıp atırǵan sıyırdıń ústine taslasın. 7 Keyin ruwxaniy kiyimlerin juwıp, ózi suwǵa juwınıp alsın. Sonnan keyin, ol ordaǵa kiriwine boladı. Biraq ol keshke deyin haram sanaladı. 8 Sıyırdı jaqqan adam da kiyimlerin juwıp, ózi juwınıp alsın. Ol da keshke deyin haram sanaladı.

9 Sonnan keyin, pák sanalǵan bir adam sıyırdıń kúlin jıynap alıp, ordanıń sırtındaǵı taza bir jerge aparıp qoysın. Izrail jámiyeti bul kúldi pákleniw suwına qosıw ushın saqlap qoysın. Bul kúl adamlardıń gúnadan pákleniw rásimi ushın qollanıladı. 10 Sıyırdıń kúlin jıynaǵan adam kiyimlerin juwsın, ol keshke deyin haram sanaladı. Bul izraillılar ushın da, arańızda jasap atırǵan kelgindiler ushın da máńgi qaǵıyda bolsın.

Ólige bir jerin tiygizip alǵan adam tuwrısında

11 Adamnıń óligine bir jerin tiygizip alǵan hár bir adam jeti kún haram sanaladı. 12 Ol adam pákleniw suwı menen úshinshi hám jetinshi kúni ózin páklesin. Sonda ol pák boladı. Eger ol úshinshi hám jetinshi kúni ózin páklemese, onda ol pák sanalmaydı. 13 Adamnıń óligine bir jerin tiygizip, ózin páklemegen adam Jaratqan Iyeniń Shatırın haramlaǵan boladı. Onday adam Izrail xalqınıń arasınan joq qılınsın. Onıń ústine pákleniw suwı serpilmegeni ushın, ol haram sanaladı, haramlılıǵı ózinde qaladı.

14 Eger shatırdıń ishinde bir adam qaytıs bolsa, buǵan tiyisli qaǵıyda mınadan ibarat: sol waqıtta shatırda bolǵan hám shatırǵa kirgen hár bir adam jeti kún dawamında haram sanaladı. 15 Shatırdıń ishinde qaqpaǵı jabılmay, awzı ashıq qalǵan hár bir ıdıs haram sanaladı.

16 Dalada qılısh penen óltirilgen yamasa óz ájeli menen ólgen birewdiń óligine, súyegine yamasa qábirine bir jerin tiygizgen hár bir adam jeti kún dawamında haram sanaladı.

17 Haram sanalǵan adam ushın bir ıdıstıń ishine jandırılǵan gúna qurbanlıǵınıń kúlinen salıp, ústine aǵın suwdan quyıń. 18 Pák sanalǵan bir adam mayoran shóbin alıp, suwǵa batırsın. Keyin onı shatırǵa, onıń ishindegi barlıq buyımlardıń hám hár bir adamnıń ústine sebelesin. Ólgen adamnıń súyegine, óltirilgen yamasa óz ájeli menen ólgen adamǵa yamasa qábirge bir jerin tiygizgen adamnıń ústine de sol suwdan sebelensin. 19 Pák sanalǵan adam úshinshi hám jetinshi kúni haram sanalǵan adamnıń ústine suwdan sewip, onı jetinshi kúni páklesin. Páklengen adam kiyimlerin suwǵa juwıp, ózi de juwınsın, sonda ol keshte pák sanaladı. 20 Eger haram sanalǵan adam ózin páklemese, ol jámiyettiń arasınan joq qılınsın. Óytkeni ol Jaratqan Iyeniń Muxaddes mákanın haramlaǵan boladı. Pákleniw suwı onıń ústine serpilmegeni ushın, ol adam haram sanaladı. 21 Bul xalıq ushın máńgi qaǵıyda bolsın. Pákleniw suwın serpken adam da kiyimlerin juwsın. Pákleniw suwın uslaǵan adam keshke deyin haram sanaladı. 22 Haram adam jantasqan hár bir nárse haram sanaladı. Sol haramlanǵan zatqa jantasqan adam da keshke deyin haram sanaladı.