‏ Numbers 2

Izrail urıwlarınıń ornalasıw tártibi

1Jaratqan Iye Muwsa hám Xaronǵa bılay dedi:

2– Izraillılardıń hár biri óz áwladınıń belgisi bolǵan bayraqlarınıń astında ornalassın. Olar óz shatırların Ushırasıw shatırınıń dógeregine, onnan biraz qashıqlaw jerge tiksin.

3Ushırasıw shatırınıń kúnshıǵıs tárepinde ornalasatuǵın urıwlar Yahuda ordasınıń bayraǵı astında bólimlerge bólinip ornalassın. Yahuda urıwınıń kósemi Amminadab ulı Naxshon. 4Onıń dizimnen ótken láshkerleriniń sanı 74 600.

5Onıń qasına Issaxar urıwı shatırların tiksin. Issaxar urıwınıń kósemi Suar ulı Netanel. 6Onıń dizimnen ótken láshkerleriniń sanı 54 400.

7Zebulon urıwı da Yahuda urıwınıń janına shatırların tiksin. Zebulon urıwınıń kósemi Xelon ulı Eliab. 8Onıń dizimnen ótken láshkerleriniń sanı 57 400.

9Yahuda ordasınıń esabına kirgen bólimlerdegi barlıq láshkerlerdiń sanı 186 400. Jolǵa shıqqanda, usı úsh urıwdan ibarat bolǵan bólim birinshi bolıp aldında júrsin.

10Ushırasıw shatırınıń qubla tárepinde ornalasatuǵın urıwlar Ruben ordasınıń bayraǵı astında bólimlerge bólinip ornalassın. Ruben urıwınıń kósemi Shedeur ulı Elisur. 11Onıń dizimnen ótken láshkerleriniń sanı 46 500.

12Onıń qasına Shimon urıwı óz shatırların tiksin. Shimon urıwınıń kósemi Surishadday ulı Shelumiel. 13Onıń dizimnen ótken láshkerleriniń sanı 59 300.

14Gad urıwı da Ruben urıwınıń janına óz shatırların tiksin. Gad urıwınıń kósemi Dewel ▼

▼ Dewel – Kóp qoljazbalarda «Rewel».

ulı Elyasaf. 15Onıń dizimnen ótken láshkerleriniń sanı 45 650.

16Ruben ordasınıń esabına kirgen bólimlerdegi barlıq láshkerlerdiń sanı 151 450. Jolǵa shıqqanda, usı úsh urıwdan ibarat bolǵan bólim ekinshi bolıp júrsin.

17Aldınǵı eki orda menen keyingi eki ordanıń ortasında Ushırasıw shatırı hám lebiylilerdiń ordası jolǵa shıqsın. Hár bir urıwdıń ornalasıw tártibi qanday bolsa, jolǵa shıqqanda da sonday bolsın. Hár biri óz bayraǵı astında óz ornında júrsin.

18Ushırasıw shatırınıń batıs tárepinde ornalasatuǵın urıwlar Efrayım ordasınıń bayraǵı astında bólimlerge bólinip ornalassın. Efrayım urıwınıń kósemi Ammihud ulı Elishama. 19Onıń dizimnen ótken láshkerleriniń sanı 40 500.

20Onıń qasına Menashshe urıwı óz shatırların tiksin. Menashshe urıwınıń kósemi Pedasur ulı Gamaliel. 21Onıń dizimnen ótken láshkerleriniń sanı 32 200.

22Benyamin urıwı da Efrayım urıwınıń janına óz shatırların tiksin. Benyamin urıwınıń kósemi Gidoniy ulı Abidan. 23Onıń dizimnen ótken láshkerleriniń sanı 35 400.

24Efrayım ordasınıń esabına kirgen bólimlerdegi barlıq láshkerlerdiń sanı 108 100. Úshinshi bolıp usılar jolǵa shıqsın.

25Ushırasıw shatırınıń arqa tárepinde ornalasatuǵın urıwlar Dan urıwınıń bayraǵı astında bólimlerge bólinip ornalassın. Dan urıwınıń kósemi Ammishadday ulı Axiezer. 26Onıń dizimnen ótken láshkerleriniń sanı 62 700.

27Onıń qasına Asher urıwı óz shatırların tiksin. Asher urıwınıń kósemi Oxran ulı Pagiel. 28Onıń dizimnen ótken láshkerleriniń sanı 41 500.

29Naftaliy urıwı da Dan urıwınıń janına óz shatırların tiksin. Naftaliy urıwınıń kósemi Enan ulı Axira. 30Onıń dizimnen ótken láshkerleriniń sanı 53 400.

31Dan ordasınıń esabına kirgen barlıq láshkerlerdiń sanı 157 600. Olar óz bayraqları astında eń aqırında jolǵa shıqsın.

32Solay etip, óz áwladları boyınsha esaptan ótken pútkil Izrail xalqı usılar edi. Hár bir ordanıń bólimlerge bólinip, esaptan ótken barlıq láshkerlerdiń sanı 603 550. 33Jaratqan Iyeniń Muwsaǵa bergen buyrıǵı boyınsha Lebiy urıwı basqa izraillılar menen birge esaptan ótkerilmedi.

34Solay etip, izraillılar Jaratqan Iyeniń Muwsaǵa buyırǵanınday etip isledi. Olar óz bayraqları astında ordaların qurdı. Olardıń hár biri tiyre hám áwladları boyınsha ornalasıp, sol tártipte jolǵa shıǵatuǵın edi.