Num 20 | KaaIBT22L | STEP | Birinshi ayda Izrail xalqınıń pútkil jámiyeti Zin shóline jetip barıp, Qadeshke ornalastı. Máriyam sol jerde qaytıs bolıp, jerlendi.

‏ Numbers 20

Jartastan aqqan suw

1 Birinshi ayda Izrail xalqınıń pútkil jámiyeti Zin shóline jetip barıp, Qadeshke ornalastı. Máriyam sol jerde qaytıs bolıp, jerlendi.

2 Ol jerde xalıq ushın ishetuǵın suw joq edi. Sol sebepli olar Muwsa menen Xaronǵa qarsı jıynalıp, 3 Muwsaǵa bılay dep urıstı:

– Tuwısqanlarımız Jaratqan Iyeniń aldında ólgen waqıtta, bizler de olar menen birge ólip ketkenimiz jaqsı edi! 4 Jaratqan Iyeniń jámiyetin bul shólge ne ushın alıp keldiń? Bizler mallarımız benen birge óliwimiz ushın ba? 5 Ne ushın bizlerdi usı jaman jerge alıp keliw ushın Mısırdan alıp shıqtıń? Bul jerdiń egisligi de, ánjiri de, júzimi de, anarı da joq. Hátteki, ishetuǵın suwı da joq!

6 Muwsa menen Xaron jámiyettiń aldınan ketip, Ushırasıw shatırınıń aldına bardı da, ol jerde et betinen jerge jıǵıldı. Sonda Jaratqan Iyeniń saltanatı olarǵa kórindi. 7 – 8 Jaratqan Iye Muwsaǵa:

– Tayaǵıńdı al. Ájaǵań Xaron menen birge jámiyetti bir jerge jıynań. Keyin jámiyettiń kóz aldında suw atlıǵıp shıǵıwı ushın, jartasqa buyrıq beriń. Sonda sen jartastan suw shıǵarıp, olarǵa da, haywanlarına da suw bereseń, – dedi.

9 Muwsa ózine berilgen buyrıq boyınsha Jaratqan Iyeniń dárgayındaǵı tayaqtı alıp, 10 Xaron menen birge jámiyetti jartastıń aldına jıynadı. Muwsa olarǵa:

– Háy, kóterilisshiler, maǵan qulaq salıńlar! Mına jartastan sizlerge suw shıǵarıp bereyik pe? – dedi. 11 Sonnan keyin, Muwsa qolındaǵı tayaǵın kóterip, jartasqa eki márte urdı. Sonda jartastan suw atlıǵıp shıqtı hám pútkil jámiyet te, haywanları da onnan suw ishti.

12 Jaratqan Iye Muwsa menen Xaronǵa bılay dedi:

– Maǵan tolıq isenbey, izraillılardıń kóz aldında Meniń muxaddesligimdi tán almadıńlar. Sonıń ushın, Men bul jámiyetke beretuǵın elge olardı sizler alıp barmaysızlar.

13 Izrail xalqı Jaratqan Iyege qarsı shıǵıp, dawlasqan sol jer Meriba ^{▼▼ Meriba – «daw» degendi bildiredi.} suwları dep ataldı. Usı jerde Jaratqan Iye olarǵa Óz muxaddesligin kórsetti.

Edom patshasınıń óz jeri arqalı izraillılardı ótkizbewi

14 Muwsa Qadeshten Edom patshasına elshiler arqalı mınaday xabar jiberdi: «Tuwısqanıń bolǵan Izrail xalqı bılay dep aytıp atır: Basımızǵa túsken barlıq qıyınshılıqlardan xabarıń bar. 15 Ata-babalarımız Mısır jerine barıp qonıs bastı hám sol jerde uzaq waqıt dawamında jasadıq. Mısırlılar ata-babalarımızǵa da, bizlerge de zulımlıq qıldı. 16 Biraq bizler Jaratqan Iyege jalbarınǵanımızda, Ol perishtesin jiberip, bizlerdi Mısırdan alıp shıqtı. Mine, endi bizler seniń shegarańa jaqın jerdegi Qadesh qalasında turıppız. 17 Bizlerge eliń arqalı ótip ketiwimizge ruxsat berseńiz. Sizlerdiń egin atızlarıńızǵa, júzim baǵlarıńızǵa kirmeymiz hám qudıqlarıńızdan suw ishpeymiz. Elińiz arqalı ótkende, ońǵa da, shepke de burılmay, tek ǵana Patsha jolı degen úlken joldan júrip, jolımızdı dawam etemiz».

18 Biraq Edom patshası: «Elim arqalı ótpeysizler! Bolmasa, sizlerge qarsı qılısh kóteremiz», – dep juwap berdi.

19 Sonda izraillılar oǵan: «Bizler úlken joldan júrip, ótip ketemiz. Eger bizler yamasa mallarımız suwıńnan ishsek, onıń haqısın tóleymiz. Bizler tek barı-joǵı elińiz arqalı ótip ketemiz», – dep ótinish qıldı.

20 Degen menen, Edom patshası olarǵa jáne: «Ótpeysizler!» – dep juwap berdi. Sonnan keyin, edomlılar izraillılarǵa qarsı júris qılıw ushın, kóp sanlı hám kúshli láshkerleri menen jolǵa shıqtı. 21 Edom patshası elinen ótiwine ruxsat bermegennen soń, izraillılar artqa burılıp, aylanıp ótiw ushın, onnan uzaqlastı.

Xaronnıń ólimi

22 Pútkil Izrail jámiyeti Qadeshten shıǵıp, Hor tawına keldi. 23 Jaratqan Iye Edom shegarasındaǵı Hor tawında Muwsa menen Xaronǵa bılay dedi:

24 – Xaron ólip, óz ata-babalarına qosıladı. Ol Men Izrail xalqına beretuǵın elge kirmeydi. Óytkeni ekewińiz Meriba suwları janında Meniń buyrıǵıma qarsı shıqtıńlar. 25 Endi sen Xaron menen onıń ulı Elazardı Hor tawına alıp shıq. 26 Xaronnıń ruwxaniylik kiyimlerin sheship alıp, olardı ulı Elazarǵa kiygiz. Xaron ol jerde ólip, ata-babalarına qosıladı.

27 Muwsa Jaratqan Iyeniń buyırǵanınday qıldı. Olar úshewi de pútkil jámiyettiń kóz aldında Hor tawına kóterildi. 28 Muwsa Xaronnıń ruwxaniylik kiyimlerin ústinen sheship aldı da, olardı ulı Elazarǵa kiygizdi. Xaron sol jerde, tawdıń joqarısında óldi. Keyin, Muwsa menen Elazar tawdan tústi. 29 Pútkil Izrail jámiyeti Xaronnıń ólgenin bilgende, ol ushın otız kún aza tuttı.