‏ Numbers 22

Moab patshası Balaqtıń Bilamdı shaqırıwı

1Sonnan keyin, izraillılar jolın dawam etti. Olar oypatlıqtıń Moabqa tiyisli bólegine kelip, Iordan dáryasınıń shıǵısına, Erixo qalasınıń qarsı aldına ornalastı.

2Sippor ulı Balaqtıń izraillılardıń amor xalqına neler islegeninen xabarı bar edi. 3Izrail xalqı sonshelli kóp bolǵanlıqtan, moablılar olardan qattı qorqısıp, albırawshılıqqa túsken edi.

4Sonda moablılar Midyan aqsaqallarına: «Ógiz jaylawdaǵı ot-shópti jep joq qılǵanı sıyaqlı, bul xalıq ta dógeregimizdegi barlıq nárseni iship-jep joq qıladı», – dedi.

Sol waqıtları Sippor ulı Balaq Moab patshası edi. 5Balaq Beor ulı Bilamdı shaqırtıw ushın xabarshıların jiberdi. Bilam Evfrat dáryasınıń boyında, Ammaw úlkesindegi Petorda jasaytuǵın edi. Balaq Bilamǵa xabarshılarınan bılay dep aytıp jibergen edi:

«Mısır jerinen shıǵıp, jer júzin qaplaǵan bir xalıq meniń janıma kelip ornalastı. 6Ótinemen, siz kelip, mennen de kúshli bolǵan sol xalıqtı men ushın náletleń. Múmkin, sonda men olardı jeńip, elimnen quwıp shıǵara alarman. Óytkeni siziń pátiya bergen adamıńız jarılqanıp, náletlegen adamıńız náletlenetuǵının bilemen».

7Moab hám Midyan aqsaqalları Bilamǵa náletlewi ushın tólenetuǵın puldı alıp ketti. Olar Bilamǵa barıp, oǵan Balaqtıń sózlerin jetkerdi.

8Bilam olarǵa:

– Usı jerde qonıp qalıń. Jaratqan Iyeniń aytqanı boyınsha sizlerge juwap beremen, – dedi.

Solay etip, Moab basshıları Bilamnıń úyinde qonıp qaldı.

9Quday Bilamǵa kelip, onnan:

– Úyińde qalǵan mına adamlar kim? – dep soradı.

10Bilam Qudayǵa bılay dep juwap berdi:

– Moab patshası Sippor ulı Balaq maǵan mına xabardı jiberipti: 11«Mısır jerinen shıqqan bir xalıq jer júzin qaplap ketti. Siz kelip, men ushın sol xalıqtı náletleń. Sonda men olarǵa qarsı urısıwǵa kúshim jetip, olardı quwıp jibere alarman».

12Biraq Quday Bilamǵa:

– Olar menen birge barma! Sol xalıqtı náletleme, sebebi olar jarılqaw alǵan xalıq, – dedi.

13Azanda Bilam Balaqtıń jibergen basshılarına:

– Elińizge qayta beriń. Sebebi Jaratqan Iye sizler menen birge barıwıma ruxsat bermedi, – dedi.

14Moab basshıları izine qaytıp, Balaqqa: «Bilam bizler menen birge keliwge ırazı bolmadı», – dedi.

15Sonda Balaq aldınǵı jibergenlerinen de kóbirek hám olardan da abıraylılaw basshıların jiberdi. 16Olar Bilamnıń aldına barıp, bılay dep ayttı:

– Sippor ulı Balaq bılay dep aytıp jiberdi: «Ótinemen, meniń aldıma keliwińizge hesh bir nárse tosqınlıq qılıwına jol qoymań. 17Óytkeni sizge ayrıqsha húrmet kórsetemen, ne qáleseńiz, sonı isleymen. Ne bolsa da, keliń, men ushın bul xalıqtı náletleń».

18Bilam Balaqtıń xabarshılarına mınaday juwap qaytardı:

– Balaq sarayındaǵı barlıq gúmis hám altındı maǵan berse de, Qudayım Jaratqan Iyeniń buyrıǵısız hesh nárse qılmayman. 19Márhámat, búgin túnde usı jerde sizler de qonıp qalıń, Jaratqan Iyeniń maǵan basqa ne aytatuǵının bilip alayın.

20Sol túni Quday Bilamǵa kelip:

– Bul adamlar seni shaqırıw ushın kelgen eken, olar menen birge bar, biraq Men saǵan ne aytsam, sonı isleyseń, – dedi.

Bilamnıń eshegi

21Solay etip, azanda Bilam eshegin ertledi de, Moab basshıları menen birge ketti. 22Bilam jolǵa shıqqanda, Quday oǵan ǵázeplendi. Jaratqan Iyeniń perishtesi oǵan qarsılıq qılıw ushın, onıń jolında turıp aldı. Sonda Bilam eshegine minip, ketip baratır edi. Onıń qasında eki xızmetkeri bar edi. 23Eshek qılıshın jalańashlap turǵan Jaratqan Iyeniń perishtesin kórgende, joldan shıǵınıp, atızdıń ishine kirip ketti. Al Bilam bolsa, eshegin jolǵa qaytarıw ushın, onı sabay basladı.

24Sonnan soń, Jaratqan Iyeniń perishtesi júzimzarlardıń arasındaǵı tar soqpaqta turıp aldı. Soqpaqtıń eki tárepi de diywallar menen qorshalǵan edi. 25Eshek Jaratqan Iyeniń perishtesin kórip, diywalǵa tıǵılıp, Bilamnıń ayaǵın qısıp tasladı. Bilam eshegin jáne sabay basladı.

26Jaratqan Iyeniń perishtesi aldıǵa jıljıp, tar jerde turıp aldı. Endi eshek ońǵa da, solǵa da burılıp kete almaytuǵın edi. 27Jaratqan Iyeniń perishtesin kórgen eshek Bilamnıń astına jatıp aldı. Bilamnıń buǵan ǵázebi qaynap, tayaǵı menen eshekti jáne sabay basladı. 28Sonda Jaratqan Iyeniń qúdireti menen eshekke til pitip, Bilamǵa:

– Meni úsh márte urıp sabaǵanday, men saǵan ne qıldım? – dep soradı.

29Bilam:

– Sen meni mazaq qılıp atırsań. Eger qolımda qılıshım bolǵanda, seni óltirip taslaǵan bolar edim! – dep baqırdı.

30Eshek oǵan:

– Usı kúnge deyin minip júrgen eshegiń men emespen be? Burın saǵan usınday qılıq shıǵarǵan ba edim? – dedi.

Bilam:

– Yaq, – dedi.

31Sonnan soń, Jaratqan Iye Bilamnıń kózin ashtı. Sonda Bilam qılıshın jalańashlap, jolda turǵan Jaratqan Iyeniń perishtesin kórip, et betinen jerge jıǵıldı.

32Jaratqan Iyeniń perishtesi Bilamǵa:

– Ne ushın eshegińdi úsh márte urıp, sabadıń? Saǵan qarsılıq qılıw ushın keldim. Sebebi tutqan jolıń seni bálege duwshar qıladı. 33Al eshegiń bolsa Meni kórip, úsh márte ózin joldan shetke alıp qashtı. Eger ol joldan shetke shıqpaǵanda, seni óltirip, onı aman qaldırǵan bolar edim, – dedi.

34Bilam Jaratqan Iyeniń perishtesine:

– Gúna qıldım. Maǵan qarsı shıǵıw ushın, jolda turǵanıńdı bilmeppen. Eger bul tutqan jolım Saǵan maqul bolmasa, onda úyime qaytayın, – dedi.

35Jaratqan Iyeniń perishtesi oǵan:

– Mına adamlar menen birge kete ber. Biraq Men saǵan ne aytsam, tek ǵana sonı aytasań, – dedi. Solay etip, Bilam Balaqtıń basshıları menen birge ketti.

Patsha Balaqtıń Bilam menen ushırasıwı

36Balaq Bilamnıń kiyatırǵanın esitiwden, onı kútip alıw ushın Arnon boyındaǵı, Moab eliniń shegarasında jaylasqan Ir qalasına ketti. 37Balaq Bilamǵa:

– Sizdi shaqırıw ushın jibergen aldınǵı adamlarım menen ne ushın kelmedińiz? Yamasa meni sawǵa menen sıylawǵa kúshi jetpeydi, dep oylap pa edińiz? – dedi.

38Bilam Balaqqa:

– Mine, endi siziń aldıńızǵa keldim. Quday meniń awzıma qanday sóz salsa, sonı aytaman, ózligimnen ne aytıwım múmkin? – dep juwap berdi.

39Sonnan keyin, Bilam Balaq penen birge jolǵa túsip, Kiryat-Xusot qalasına ketti. 40Sol jerde Balaq buǵa hám qoylardı qurbanlıqqa shaldı. Qurbanlıqtıń góshinen Bilam menen onıń qasındaǵı basshılarǵa da berdi.

41Erteńine azanda Balaq Bilamdı Bamot-Baal tóbeshigine alıp shıqtı. Bilam ol jerden Izrail xalqınıń bir bólegin kórdi.