‏ Numbers 23

Bilamnıń birinshi aytqan sózleri

1Bilam Balaqqa:

– Usı jerde men ushın jeti qurbanlıq orın qurıp, jeti buǵa menen jeti qoshqar tayarlań, – dedi.

2Balaq onıń aytqanların isledi. Balaq penen Bilam ekewi hár bir qurbanlıq orınnıń ústinde bir buǵa hám bir qoshqardan jandırılatuǵın qurbanlıq qıldı.

3Keyin Bilam Balaqqa:

– Siz qurbanlıqlarıńızdıń qasında turıń, men sál armanlaw barıp kóreyin. Bálkim, Jaratqan Iye meniń menen ushırasıwǵa keler. Ol maǵan ne dese, sizge sonı aytaman, – dedi de, tóbeshikke shıqtı.

4Quday Bilamǵa kóringende, Bilam Qudayǵa:

– Jeti qurbanlıq orın qurdırdım, hár bir qurbanlıq orınnıń ústinde bir buǵa hám bir qoshqardan qurbanlıq qıldım, – dedi.

5Jaratqan Iye Bilamnıń awzına aytatuǵın sózlerin salıp, oǵan:

– Balaqtıń aldına bar hám oǵan Meniń aytqan sózlerimdi jetkiz, – dedi.

6Solay etip, Bilam Balaqtıń qasına qaytıp bardı. Ol Balaqtıń Moab basshıları menen birge jandırılǵan qurbanlıqtıń janında turǵanın kórdi. 7Sonda Bilam mına sózlerdi ayttı:

«Moab patshası Balaq meni Aramnan,
Shıǵıs tawlarınan alıp keldi.
Ol: „Kelip, meniń ushın Yaqıp urpaǵın náletle,
Kelip, Izrailǵa jamanlıq tile!“– dedi.
8Quday náletlemegendi
Men qalay náletleymen?
Jaratqan Iye jamanlıq tilemegenge,
Men qalay jamanlıq tileymen?
9Jartaslardıń tóbesinde turıp, kórip turman olardı,
Tóbelerden qarap turman olarǵa.
Óz aldına jasaytuǵın,
Basqa xalıqlardan ózlerin bólek uslaytuǵın,
Bir xalıqtı kórip turman.
10Yaqıptıń qum sıyaqlı kóp urpaǵın kim sanay aladı?
Kóterilgen shań kibi sansız Izraildı kim esaplay aladı?
Haq adamlarday bolıp men de óleyin,
Aqıretim olardiki kibi bolsın!»

11Balaq Bilamǵa:

– Maǵan ne islep atırsız ózi? Men sizdi dushpanlarımdı náletlesin dep alıp kelgen edim, al siz bolsańız, olarǵa pátiya berip atırsız-ǵo! – dedi.

12Bilam:

– Men Jaratqan Iye awzıma salǵan sózdi abaylap aytıwım kerek emes pe? – dep juwap berdi.

Bilamnıń aytqan ekinshi sózi

13Sonnan soń, Balaq oǵan bılay dedi:

– Meniń menen birge olardı kóre alatuǵın basqa jerge júriń. Biraq ol jerden olardıń hámmesin emes, al tek ǵana bir bólegin kóresiz. Sol jerde turıp, Izrail xalqın meniń ushın náletleń. 14Solay etip, Balaq Bilamdı Pisga tawınıń tóbesindegi gúzetiw ornına alıp bardı. Balaq ol jerde de jeti qurbanlıq orın qurıp, hár bir qurbanlıq orınnıń ústinde bir buǵa hám bir qoshqardan qurbanlıq berdi.

15Bilam Balaqqa:

– Sen usı jerde, jandırılatuǵın qurbanlıqtıń qasında tur, al men ana jerge barıp, Jaratqan Iye menen ushırasıp kelemen, – dedi.

16Jaratqan Iye Bilam menen ushırastı hám onıń awzına aytatuǵın sózlerin salıp:

– Balaqtıń aldına barıp, oǵan mına sózlerdi jetkiz, – dedi.

17Solay etip, Bilam Balaqtıń qasına qaytıp bardı. Ol Balaqtıń Moab basshıları menen birge jandırılǵan qurbanlıqtıń qasında turǵanın kórdi.

Balaq:

– Jaratqan Iye ne dedi? – dep soradı.

18Bilam oǵan mına sózlerdi jetkerdi:

«Balaq, tıńlap túsinip alıń,
Sippor ulı, maǵan qulaq salıń.
19Quday insan emes jalǵan sóyleytuǵın,
Ol adamzat emes Óz pikirin ózgertetuǵın.
Ol Ózi aytqan sózin ámelge asırar,
Wáde bergende, sózsiz orınlar.
20Jarılqaw ushın maǵan buyrıq berdi,
Ózgerte almaspan men Onıń jarılqawın.
21Yaqıp urpaǵında apat kórinbeydi,
Baxıtsızlıq ta kórinbes Izrailda,
Qudayı Jaratqan Iye olar menen birge,
Ol Patshasıdur olardıń arasında,
Patshalıq kárnay shertiler arnalıp Onıń atına.
22Quday olardı Mısırdan alıp shıqtı,
Jabayı buǵa sıyaqlı Onıń kúshi bar.
23Yaqıptıń urpaǵında jorıwshılıq joq,
Izrailda palkerlik qılınbas.
Endi bolsa, Yaqıptıń urpaǵı Izrail ushın,
„Quday nelerdi isledi!“– dep aytılıp atır.
24Mine, xalıq ana arıslan kibi oyanar,
Arıslan yańlı oljasın jep tawıspaǵansha,
Óltirgen oljasınıń qanın iship bolmaǵansha jatpas».

25Sonda Balaq:

– Eger Izrail xalqın náletlemeydi ekensiz, onda olardı jarılqamań da! – dedi.

26Bilam oǵan:

– Saǵan Jaratqan Iye ne aytsa, sonı aytaman dep aytqan joq pa edim? – dep juwap berdi.

Bilamnıń aytqan úshinshi sózi

27Balaq Bilamǵa:

– Ne bolsa da, júriń, endi sizdi basqa jerge alıp barayın. Bálkim, Qudayǵa maqul bolıp, ol jerden olardı náletlewińizge jol qoyar, – dedi. 28Solay etip, ol Bilamdı Peor tawınıń tóbesine alıp bardı. Ol jerden shól dala kórinetuǵın edi.

29Bilam oǵan:

– Bul jerde de jeti qurbanlıq orın qurıp, jeti buǵa hám jeti qoshqar tayarlań, – dedi. 30Balaq onıń aytqanların isledi hám hár bir qurbanlıq orınnıń ústinde bir buǵa hám bir qoshqardan qurbanlıq berdi.