Num 25 | KaaIBT22L | STEP | Izraillılar Shittimde ornalasıp turǵanda, olardıń erkekleri moablı qızlar menen buzıqshılıq qıla basladı.

‏ Numbers 25

Izraillılardıń Peorda gúnaǵa batıwı

1 Izraillılar Shittimde ornalasıp turǵanda, olardıń erkekleri moablı qızlar menen buzıqshılıq qıla basladı. 2 Moablı hayallar izraillılardı óz qudaylarına arnap beretuǵın qurbanlıqqa mirát etti. Izrail xalqı olardıń qurbanlıq góshlerinen jedi hám olardıń qudaylarına tabındı. 3 Solay etip, Izrail xalqı Peordaǵı Baalǵa baylanıp qaldı. Sol sebepten Jaratqan Iyeniń olarǵa ǵázebi qaynadı.

4 Jaratqan Iye Muwsaǵa:

– Bul xalıqtıń barlıq basshıların ákelip, olardı kúndiz Meniń aldımda asıp qoy. Usılay etip, Meniń Izrail xalqına bolǵan lawlaǵan ǵázebim tússin, – dedi.

5 Sonda Muwsa Izrail basshılarına:

– Hár birińiz Peordaǵı Baalǵa baylanıp qalǵan adamlarıńızdı óltiriń, – dep buyrıq berdi.

6 Jámiyet Ushırasıw shatırınıń aldında jılap turǵanda, izraillı bir adam midyanlı bir hayaldı Muwsanıń hám Izrail jámiyetiniń kóz aldında óz shatırına alıp kirgen edi. 7 Bunı kórgen Xaronnıń aqlıǵı, Elazar ulı Pinexas jámiyet arasınan shıǵıp, qolına bir nayza aldı. 8 Pinexas izraillı sol adamnıń izinen barıp, shatırǵa kirdi de, nayzanı ekewine de qadadı. Nayza izraillı sol adamnıń denesin tesip ótip, midyanlı sol hayaldıń qarnına kirgen edi. Solay etip, Izrail xalqın joq etip atırǵan oba toqtadı. 9 Bul obadan ólgenlerdiń sanı 24 000 adam edi.

10 Jaratqan Iye Muwsaǵa bılay dedi:

11 – Ruwxaniy Xaronnıń aqlıǵı, Elazar ulı Pinexas Izrail xalqına bolǵan ǵázebimdi qaytardı. Óytkeni ol xalıqtıń arasında Meniń ushın ullı qızǵanıshtı kórsetti. Sol sebepli, Men Óz qızǵanıwshılıǵım menen olardı pútkilley joq qılmadım. 12 Sen oǵan bılay dep ayt: Men Pinexas penen tınıshlıq kelisimimdi dúzemen. 13 Bul kelisim boyınsha Pinexas hám onıń áwladı máńgi ruwxaniy boladı. Sebebi ol Qudayı ushın qızǵanıshtı kórsetip, Izrail xalqınan Meniń ǵázebimdi qaytardı.

14 Midyanlı hayal menen birge óltirilgen izraillı adamnıń atı Salu ulı Zimriy edi. Ol Shimon urıwındaǵı bir áwladtıń basshısı edi. 15 Al óltirilgen hayal bolsa, midyanlı bir tiyreniń basshısı bolǵan Surdıń qızı Kozbiy edi.

16 Jaratqan Iye Muwsaǵa:

17 – Midyan xalqın dushpan dep bil hám olardı qırıp tasla. 18 Óytkeni olar sizlerge qarsı sumlıq oylap, sizlerdi Peorda jalǵan qudaylarǵa tabındırdı hám ózleriniń tuwısqanı bolǵan midyanlı tiyre basshısınıń qızı Kozbiy arqalı azǵırıwǵa salıp, dushpanlıq qıldı. Bul hayal Peorda oba tarqalǵan waqıtta óltirilgen edi, – dedi.