‏ Numbers 26

Xalıqtıń ekinshi márte dizimge alınıwı

1Obadan keyin, Jaratqan Iye Muwsa menen ruwxaniy Xaronnıń ulı Elazarǵa bılay dedi:

2– Izrail jámiyetindegi sawashqa jaramlı jigirma hám onnan joqarı jastaǵı barlıq er adamlardı áwladları boyınsha sanap shıǵıń!

3Sol waqıtta Izrail xalqı oypatlıqtıń Moabqa tiyisli bóleginde, Erixonıń qarsısındaǵı Iordan dáryasınıń boyında edi. Muwsa menen ruwxaniy Elazar xalıqqa:

4– Jaratqan Iyeniń Muwsaǵa bergen buyrıǵı boyınsha, jigirma hám onnan joqarı jastaǵı er adamlardı sanap shıǵıń, – dedi.

Mısırdan shıqqan izraillılar mınalar edi:

5Izraildıń tuńǵıshı Ruben urıwınan taraǵan tiyreler: Xanoxtan Xanox tiyresi,
Palludan Pallu tiyresi,
6Xesronnan Xesron tiyresi,
Karmiyden Karmiy tiyresi.

7Rubennen taraǵan tiyreler usılardan ibarat bolıp, olardıń sanı 43 730 adam boldı.

8Palludıń Eliab degen ulı bar edi. 9Eliabtıń ulları Nemuel, Datan hám Abiram edi. Bular jámiyettiń saylandı adamları bolıp, Jaratqan Iyege boysınbay, Muwsa hám Xaronǵa qarsı shıqqan Qorax hám onıń sheriklerine qosılǵan Datan menen Abiram edi. 10Sol waqıtta jer jarılıp, Qorax penen birge olardı da jer jutıp jibergen edi. Sol kúni ot Qoraxtıń eki júz eliw sheriklerin jaǵıp joq qılǵan edi. Solay etip, bul basqalarǵa eskertiw bolıp qaldı. 11Biraq Qoraxtıń ulları aman qalǵan edi.

12Shimon urıwınan kelip shıqqan tiyreler mınalar: Nemuelden Nemuel tiyresi,
Yaminnen Yamin tiyresi,
Yaxinnen Yaxin tiyresi,
13Zeraxtan Zerax tiyresi,
Shauldan Shaul tiyresi.

14Shimon urıwınan taraǵan tiyreler usılardan ibarat bolıp, olardıń sanı 22 200 adam boldı.

15Gad urıwınan kelip shıqqan tiyreler mınalar: Sefonnan Sefon tiyresi,
Xaggiyden Xaggiy tiyresi,
Shuniyden Shuniy tiyresi,
16Ozniyden Ozniy tiyresi,
Eriyden Eriy tiyresi,
17Arodtan Arod tiyresi,
Areliyden Areliy tiyresi.

18Gad urıwınan taraǵan tiyreler usılardan ibarat bolıp, olardıń sanı 40 500 adam boldı.

19Yahudanıń Er hám Onan degen eki ulı Qanan elinde qaza bolǵan edi. 20Yahuda urıwınan kelip shıqqan tiyreler mınalar: Sheladan Shela tiyresi,
Peresten Peres tiyresi,
Zeraxtan Zerax tiyresi.

21Peresten taraǵan tiyreler mınalar: Xesronnan Xesron tiyresi,
Xamuldan Xamul tiyresi.

22Yahuda urıwınan taraǵan tiyreler usılardan ibarat bolıp, olardıń sanı 76 500 adam boldı.

23Issaxar urıwınan kelip shıqqan tiyreler mınalar: Toladan Tola tiyresi,
Puwadan Puwa tiyresi,
24Yashubtan Yashub tiyresi,
Shimronnan Shimron tiyresi.

25Issaxar urıwınan taraǵan tiyreler usılardan ibarat bolıp, olardıń sanı 64 300 adam boldı.

26Zebulon urıwınan kelip shıqqan tiyreler mınalar: Seredten Sered tiyresi,
Elonnan Elon tiyresi,
Yaxleelden Yaxleel tiyresi.

27Zebulon urıwınan taraǵan tiyreler usılardan ibarat bolıp, olardıń sanı 60 500 adam boldı.

28Yusuptiń ulları Menashshe hám Efrayımnan kelip shıqqan tiyreler mınalar:

29Menashshe urıwınan kelip shıqqan tiyreler mınalar: Maxirden Maxir tiyresi.

Maxir Giladtıń ákesi edi. Giladtan Gilad tiyresi.

30Giladtan taraǵan tiyreler: Iezerden Iezer tiyresi,
Xelekten Xelek tiyresi,
31Asrielden Asriel tiyresi,
Shexemnen Shexem tiyresi,
32Shemidadan Shemida tiyresi,
Xeferden Xefer tiyresi.

33Xeferdiń ulı Selofexadtıń ul perzentleri bolmadı, onıń tek ǵana Maxla, Noa, Xogla, Milka hám Tirsa degen qızları boldı. 34Menashshe urıwınan taraǵan tiyreler usılardan ibarat bolıp, olardıń sanı 52 700 adam boldı.

35Efrayım urıwınan kelip shıqqan tiyreler mınalar: Shutelaxtan Shutelax tiyresi,
Bexerden Bexer tiyresi,
Taxannan Taxan tiyresi.

36Shutelaxtan taraǵan tiyre: Erannan Eran tiyresi.

37Efrayım urıwınan taraǵan tiyreler usılardan ibarat bolıp, olardıń sanı 32 500 adam boldı.

Tiyreleri boyınsha Yusuptiń urpaǵınan kelip shıqqan tiyreler usılar edi.

38Benyamin urıwınan kelip shıqqan tiyreler mınalar: Beladan Bela tiyresi,
Ashbelden Ashbel tiyresi,
Axiramnan Axiram tiyresi,
39Shefufamnan Shefufam tiyresi,
Xufamnan Xufam tiyresi.

40Belanıń ulları Ard hám Naamannan kelip shıqqan tiyreler: Ardtan Ard tiyresi,
Naamannan Naaman tiyresi.

41Benyamin urıwınan taraǵan tiyreler usılardan ibarat bolıp, olardıń sanı 45 600 adam boldı.

42Dan urıwınan kelip shıqqan tiyreler mınalar: Shuxamnan Shuxam tiyresi.

Dan urıwınan taraǵan tiyre usıdan ibarat edi. 43Dan urıwı Shuxam tiyresinen ibarat bolıp, olardıń sanı 64 400 adam boldı.

44Asher urıwınan kelip shıqqan tiyreler mınalar: Imnadan Imna tiyresi,
Ishwiyden Ishwiy tiyresi,
Beriadan Beria tiyresi.

45Beriadan kelip shıqqan tiyreler: Xeberden Xeber tiyresi,
Malkielden Malkiel tiyresi.

46Asherdiń Serax atlı bir qızı bar edi. 47Asher urıwınan taraǵan tiyreler usılardan ibarat bolıp, olardıń sanı 53 400 adam boldı.

48Naftaliy urıwınan kelip shıqqan tiyreler mınalar: Yaxsielden Yaxsiel tiyresi,
Guniyden Guniy tiyresi,
49Eserden Eser tiyresi,
Shillemnen Shillem tiyresi.

50Naftaliy urıwınan taraǵan tiyreler usılardan ibarat bolıp, olardıń sanı 45 400 adam boldı.

51Solay etip, esaptan ótken izraillı er adamlardıń barlıǵı 601 730 adam boldı.

52Jaratqan Iye Muwsaǵa bılay dedi:

53– Olarǵa adam sanı boyınsha jerdi úles etip bólip ber. 54Adam sanı kóp bolǵan urıwǵa úlken, sanı az bolǵan urıwǵa kishi úles jer bereseń. Hár bir urıwǵa esaptan ótken adam sanına qaray jer úlesi berilsin. 55Jer shek boyınsha bólistirip berilsin. Hár bir urıw óz úles jerin babasınıń atı boyınsha alıwı tiyis. 56Hár bir urıwdıń úlesi úlken-kishisine qarap, shek boyınsha bólistirip berilsin.

57Tiyreleri boyınsha esaptan ótken Lebiy urıwınıń urpaqları mınalar: Gershonnan Gershon tiyresi,
Qohattan Qohat tiyresi,
Merariyden Merariy tiyresi.

58Mınalar da Lebiyge tiyisli tiyreler: Libniy tiyresi, Xebron tiyresi, Maxliy tiyresi, Mushiy tiyresi, Qorax tiyresi.

Qohat Amramnıń ákesi edi. 59Amramnıń hayalı Ioxebed edi. Ol Lebiy urıwınan bolıp, Mısırda tuwılǵan edi. Ioxebed Amramǵa Xaron hám Muwsa degen eki ul hám Máriyam degen bir qız tuwıp bergen edi. 60Xaronnıń Nadab, Abihu, Elazar hám Itamar degen ulları bar edi. 61Nadab penen Abihu Jaratqan Iye buyırmaǵan ottı Onıń aldına alıp kelgeni ushın ólgen edi.

62Lebiy urıwındaǵı bir aylıq hám onnan joqarı jastaǵı barlıq er adamlardıń sanı 23 000 boldı. Olar basqa izraillılar menen birge esaptan ótpedi. Óytkeni olarǵa basqa izraillılar menen bir qatar úles jer berilmegen edi.

63Oypatlıqtıń Moabqa tiyisli bóleginde, Erixo qarsısındaǵı Iordan dáryasınıń boyında Muwsa menen ruwxaniy Elazardıń esaptan ótkergen Izrail xalqı usılardan ibarat edi. 64Biraq bul esaptan ótkenlerdiń arasında Muwsa menen ruwxaniy Xaronnıń Sinay shólinde esaptan ótkergen izraillılardan birewi de joq edi. 65Sebebi Jaratqan Iye sol waqıtta olardıń shólde pútkilley qırılıp ketetuǵının aytqan edi. Olardan Efunne ulı Kaleb penen Nun ulı Eshuadan basqa hesh kim aman qalmaǵan edi.