Num 27 | KaaIBT22L | STEP | Yusup ulı Menashsheniń urıwınan bolǵan Maxirdiń shawlıǵı, Giladtıń aqlıǵı, Xeferdiń ulı bolǵan Selofexad degen adamnıń qızları bar edi. Olardıń atları Maxla, Noa, Xogla, Milka hám Tirsa edi.

‏ Numbers 27

Selofexadtıń qızları

1 Yusup ulı Menashsheniń urıwınan bolǵan Maxirdiń shawlıǵı, Giladtıń aqlıǵı, Xeferdiń ulı bolǵan Selofexad degen adamnıń qızları bar edi. Olardıń atları Maxla, Noa, Xogla, Milka hám Tirsa edi. 2 Bir kúni Selofexadtıń qızları Ushırasıw shatırınıń aldına, Muwsanıń, ruwxaniy Elazardıń, kósemlerdiń hám pútkil jámiyettiń aldına kelip, bılay dedi:

3 – Ákemiz shólde qaytıs bolǵan edi. Ol Jaratqan Iyege kóterilis qılǵan Qoraxtıń sheriklesleriniń arasında bolǵan joq edi, al óz gúnası sebepli qaytıs bolǵan edi. Onıń ul perzenti bolmadı. 4 Ul perzenti bolmaǵanı ushın ákemizdiń atı óz tiyresi arasınan óship qalıwı kerek pe? Ákemizdiń tuwısqanları menen qosa bizlerge de jer úles beriń.

5 Muwsa olardıń talabın Jaratqan Iyege jetkerdi. 6 Jaratqan Iye Muwsaǵa bılay dedi:

7 – Selofexadtıń qızları durıs aytıp atır. Olarǵa ákesiniń tuwısqanları menen bir qatar miyras qılıp, úles jer ber. Ákesiniń jer úlesi olarǵa berilsin. 8 Izraillılarǵa bılay dep ayt: Eger kim de kim ul perzenti bolmay qaytıs bolsa, onıń múlki qızına berilsin. 9 Eger qızı bolmasa, onıń múlki tuwısqanlarına berilsin. 10 Eger onıń tuwısqanları bolmasa, ákesiniń tuwısqanlarına berilsin. 11 Al eger ákesiniń tuwısqanları bolmasa, onıń múlki ózine eń jaqın bolǵan tiyreles aǵayinine berilsin. Sol aǵayini miyrasxor bolsın. Muwsaǵa buyırǵanımday, bul izraillılar ushın qaǵıyda bolıp qalsın.

Eshuanıń Muwsanıń ornına tayınlanıwı

(Nzm 31:1-8)

12 Sonnan soń, Jaratqan Iye Muwsaǵa:

– Abarim tawına shıǵıp, izraillılarǵa beretuǵın elge qara. 13 Sol eldi kórgenińnen soń, ájaǵań Xaron sıyaqlı sen de ólip, ata-babalarıńa qosılasań. 14 Sebebi Xaron ekewińiz de Zin shólinde buyrıǵıma qarsı shıqqan edińiz. Jámiyet suw boyında Maǵan kóterilis qılǵanda, sizler olardıń kóz aldında Meniń muxaddesligime húrmet kórsetpedińler, – dedi. Bul waqıya Zin shólinde, Qadeshtegi Meriba suwları boyında bolǵan edi.

15 Muwsa Jaratqan Iyege bılay dedi:

16 – Jaratqan Iye, pútkil adamzatqa jan bergen Quday, bul jámiyetke bir basshı tayınla. 17 Ol adam jámiyettiń aldında júrip, olarǵa basshılıq qılsın. Solay etip, Jaratqan Iyeniń, yaǵnıy Seniń jámiyetiń shopansız qoylarday bolıp qalmasın.

18 Sonda Jaratqan Iye bılay dedi:

– Ruwxıy kúshli adamdı – Nun ulı Eshuanı janıńa al hám oǵan qolıńdı qoy. 19 Sonnan keyin, onı ruwxaniy Elazar menen pútkil jámiyettiń aldına shıǵarıp, olardıń kóz aldında onı xızmetke tayınla. 20 Pútkil Izrail jámiyeti oǵan boysınıwı ushın, Eshuaǵa óz biyligińnen ber. 21 Biraq Eshua ruwxaniy Elazardıń aldına barıp, xabarlasatuǵın bolsın. Elazar Urim ^{▼▼ Urim – bul Qudaydıń erkin biliw ushın arnalǵan tas bolıp, onı shek taslaw jolı menen qollanǵan bolıwı múmkin.} arqalı Eshua ushın Meniń erkimdi bilip bersin. Usılay etip, Eshua hám pútkil Izrail jámiyeti barlıq jaǵdayda usıǵan qarap is tutsın.

22 Muwsa Jaratqan Iyeniń ózine buyırǵanınday etip orınladı. Ol Eshuanı ruwxaniy Elazardıń hám pútkil jámiyettiń aldına tik turǵızıp qoydı. 23 Keyin Jaratqan Iyeniń buyrıǵı boyınsha Muwsa Eshuanıń ústine qolların qoyıp, onı xızmetke tayınladı.