‏ Numbers 28

Kúndelikli qurbanlıqlar

1Jaratqan Iye Muwsaǵa bılay dedi:

2– Izraillılarǵa buyrıq berip, bılay dep ayt: «Maǵan usınatuǵın qurbanlıqtı, yaǵnıy awqattı xosh iyisli sıy retinde belgilengen waqıtta alıp keliń».

3Olarǵa jáne bılay dep ayt: «Jaratqan Iyege beretuǵın sıy mınadan ibarat: kúndelikli beriletuǵın jandırılatuǵın qurbanlıq ushın hár kúni bir jasar eki minsiz erkek toqlı alıp keliń. 4Toqlılardıń birewin azanda, ekinshisin keshte qurbanlıq qılıń. 5Hár bir toqlı menen birge ǵálle sadaqası etip tórtten bir hin sapalı záytún mayına aralastırılǵan onnan bir efa sapalı unnan usınıń. 6Bul – Sinay tawında buyırılǵan kúndelikli beriletuǵın jandırılatuǵın qurbanlıq, Jaratqan Iyege xosh iyisli sıy boladı. 7Hár bir toqlı menen birge ishimlik sadaqası ushın tórtten bir hin sharap usınıń. Ishimlik sadaqasın Jaratqan Iyege arnap Muxaddes jerde quyıń. 8Ekinshi toqlını keshte qurbanlıq qılıń. Azanǵı qurbanlıq sıyaqlı, bul qurbanlıqqa qosıp, belgilengen muǵdarda ǵálle hám ishimlik sadaqasın beriń. Bul qurbanlıqtı Jaratqan Iyege xosh iyisli sıy retinde usınıń».

Shabbat qurbanlıqları

9«Al Shabbat kúni bir jasar minsiz eki erkek toqlı menen birge ǵálle sadaqası etip záytún mayı aralastırılǵan onnan eki efa sapalı un hám ishimlik sadaqasın beriń. 10Kúndelikli beriletuǵın jandırılatuǵın qurbanlıq penen ishimlik sadaqasınan tısqarı hár Shabbat kúni beriletuǵın jandırılatuǵın qurbanlıq usıdan ibarat».

Jańa ay qurbanlıqları

11«Hár aydıń birinshi kúni Jaratqan Iyege arnap jandırılatuǵın qurbanlıq ushın hár biri minsiz bolǵan eki buǵa, bir qoshqar hám bir jasardan bolǵan jeti erkek toqlı usınıń. 12Bul qurbanlıqlarǵa qosıp belgilengen muǵdarda záytún mayı aralastırılǵan sapalı undı ǵálle sadaqası etip usınıń: hár bir buǵa menen onnan úsh efa un, qoshqar menen onnan eki efa un, 13hár bir toqlı menen onnan bir efa un. Bul – Jaratqan Iyege xosh iyisli sıy hám jandırılatuǵın qurbanlıq boladı. 14Hár bir buǵa menen birge ishimlik sadaqası etip yarım hin, hár bir qoshqar menen birge úshten bir hin, hár bir toqlı menen birge tórtten bir hin sharap usınıń. Bul jıl dawamında jańa ayda beriletuǵın jandırılatuǵın qurbanlıq boladı. 15Kúndelikli beriletuǵın jandırılatuǵın qurbanlıq penen ishimlik sadaqasınan tısqarı, Jaratqan Iyege gúna qurbanlıǵı ushın bir teke usınıń».

Qutqarılıw ası hám Ashıtqısız nan bayramı

16«Birinshi aydıń on tórtinshi kúni Jaratqan Iyege arnalǵan Qutqarılıw bayramı. 17On besinshi kúni jeti kúnlik bayram baslanadı, sizler usı jeti kún dawamında ashıtqısız nan jewińiz kerek. 18Bayramnıń birinshi kúni muxaddes jıynalıs bolsın, kúndelikli jumısıńızdı islemeń. 19Jaratqan Iye ushın jandırılatuǵın qurbanlıq etip eki buǵa, bir qoshqar hám bir jasardan bolǵan jeti erkek toqlı usınıń. Bul haywanlardıń hámmesi minsiz bolsın. 20Hár bir buǵa menen birge ǵálle sadaqası etip, záytún mayı aralastırılǵan onnan úsh efa sapalı un, hár bir qoshqar menen birge onnan eki efa sapalı un, 21hár bir toqlı menen birge onnan bir efa sapalı unnan alıp keliń. 22Ózlerińizdi gúnadan páklew ushın gúna qurbanlıǵı etip bir teke usınıń. 23Bulardı hár kúni azanda usınatuǵın jandırılatuǵın qurbanlıǵıńız benen birge usınıń. 24Solay etip, jeti kún dawamında hár kúni Jaratqan Iyege awqat sıpatında xosh iyisli sıy usınıń. Bunı kúndelikli jandırılatuǵın qurbanlıq penen ishimlik sadaqasınan tısqarı usınıń. 25Jetinshi kúni muxaddes jıynalıs qılıp, kúndelikli jumıslarıńızdı islemeńler».

Hápteler bayramınıń qurbanlıqları

26«Dáslepki ónimdi nıshanlaytuǵın Hápteler bayramında Jaratqan Iyege taza biyday zúráátinen sadaqa usınǵanıńızda, muxaddes jıynalıs qılıń. Sol kúni kúndelikli jumıslarıńızdı islemeńler. 27Jaratqan Iyege xosh iyisli sıy bolıwı ushın eki buǵa, bir qoshqar hám bir jasardan bolǵan jeti erkek toqlını jandırılatuǵın qurbanlıq etip usınıń. 28Bul qurbanlıqlarǵa qosıp belgilengen muǵdarda záytún mayı aralastırılǵan sapalı unnan ǵálle sadaqası etip usınıń: hár bir buǵa menen onnan úsh efa un, qoshqar menen onnan eki efa un, 29hár bir toqlı menen onnan bir efa un. 30Ózlerińizdi gúnadan páklewińiz ushın bir teke usınıń. 31Bul qurbanlıqlardı hám oǵan qosıp beriletuǵın ishimlik sadaqaların kúndelikli jandırılatuǵın qurbanlıq penen ǵálle sadaqasınan tısqarı usınıń. Qurbanlıqqa alıp keletuǵın haywanlarıńız minsiz bolsın».