Num 3 | KaaIBT22L | STEP | Jaratqan Iye Sinay tawında Muwsa menen sóyleskende, Xaron menen Muwsanıń urpaqları mınalardan ibarat edi:

‏ Numbers 3

Xaronnıń ulları

1 Jaratqan Iye Sinay tawında Muwsa menen sóyleskende, Xaron menen Muwsanıń urpaqları mınalardan ibarat edi:

2 Xaronnıń ulları: tuńǵıshı Nadab, onnan keyingisi Abihu, Elazar hám Itamar. 3 May quyılıp, ruwxaniylik xızmetke tayınlanǵan Xaronnıń ulları usılar edi. 4 Biraq Nadab penen Abihu Sinay shólinde Jaratqan Iyeniń aldında buyırılmaǵan ot usınǵanı ushın ólgen edi. Olardıń ekewi de perzentsiz edi. Sonlıqtan Elazar menen Itamar ákesi Xaronnıń qasında ruwxaniylik xızmetin atqardı.

Lebiylilerdiń xızmetleri

5 Jaratqan Iye Muwsaǵa bılay dedi:

6 – Ruwxaniy Xaronǵa járdem beriwi ushın Lebiy urıwın shaqırıp, olardı xızmetke qoy. 7 Olar Xaron hám pútkil jámiyet ushın Ushırasıw shatırında qarawıllıq qılsın hám ondaǵı barlıq xızmetti alıp barsın. 8 Olar izraillılar ushın Ushırasıw shatırında xızmet qılıp, ondaǵı barlıq buyımlarǵa juwapker bolsın. 9 Lebiylilerdi Xaron hám onıń ullarınıń xızmetine tapsır. Lebiyliler Izrail xalqınıń ishinde pútkilley Xaronnıń xızmetine arnaladı. 10 Ruwxaniylik xızmetin atqarıwı ushın Xaron menen ulların xızmetke qoy. Olardan basqa Muxaddes orınǵa jaqınlaǵan hár bir adam óltirilsin.

11 Jaratqan Iye Muwsaǵa jáne bılay dedi:

12 – Mine, Izrail xalqınıń qarınnan birinshi shıqqan ullarınıń ornına lebiylilerdi tańladım. Olar Maǵan tiyisli. 13 Óytkeni barlıq tuńǵıshlar Maǵan tiyisli. Men Mısırda tuńǵıshlardıń hámmesin joq qılǵan kúni, Izraildıń barlıq tuńǵıshların – adamnıń tuńǵıshın, haywannıń birinshi tólin Ózime ayırıp aldım. Olar Maǵan tiyisli. Sebebi Men – Jaratqan Iyemen.

Lebiy urıwınıń dizimge alınıwı

14 Jaratqan Iye Muwsaǵa Sinay shólinde bılay dedi:

15 – Lebiy urıwın sanaqtan ótkiz. Bir aylıq hám onnan joqarı jastaǵı barlıq er adamlardı áwladları hám tiyreleri boyınsha esaplap shıq.

16 Solay etip, Muwsa Jaratqan Iyeniń buyrıǵı boyınsha olardı sanap shıqtı.

17 Lebiydiń ullarınıń atları mınalar: Gershon, Qohat hám Merariy. 18 Gershonnıń tiyre basshıları bolǵan ulları mınalar: Libniy hám Shimey. 19 Qohattıń tiyre basshıları bolǵan ulları: Amram, Ishar, Xebron hám Uzziel. 20 Merariydiń tiyre basshıları bolǵan ulları: Maxliy hám Mushiy. Áwladları boyınsha Lebiy tiyreleri usılar.

21 Gershonnan Libniy hám Shimey tiyreleri kelip shıqtı. 22 Olardıń bir aylıq hám onnan joqarı jastaǵı esaptan ótken barlıq erkekleriniń sanı 7500. 23 Gershon tiyreleri batısta, Shatırdıń artqı tárepinde ornalasıwı kerek edi. 24 Gershon áwladınıń basshısı Lael ulı Elyasaf edi. 25 Gershonnıń urpaǵı Ushırasıw shatırınıń mına zatları ushın juwapker edi: shatırdıń ishki bólimi menen japqıshlarına, shatırdıń kirer awzındaǵı perdege, 26 háwli hám qurbanlıq orındı qorshap turǵan perdelerge, háwliniń kirer awzındaǵı perdege, arqanlarǵa hám bularǵa tiyisli barlıq xızmetlerge.

27 Qohattan Amram, Ishar, Xebron hám Uzziel tiyreleri kelip shıqtı. 28 Olardaǵı bir aylıq hám onnan joqarı jastaǵı barlıq er adamlardıń sanı 8600 edi. Olar Muxaddes shatırdıń xızmetine juwapker boldı. 29 Qohattan kelip shıqqan tiyreler shatırdıń qubla tárepinde ornalasıwı kerek edi. 30 Qohat áwladınıń basshısı Uzziel ulı Elisafan edi. 31 Qohat urpaǵı Kelisim sandıǵına, stolǵa, shıra qoyǵıshqa, qurbanlıq orın menen tútetki tútetiletuǵın orınǵa, Muxaddes shatırdıń buyımlarına, Eń muxaddes bólme menen Muxaddes bólmeni bólip turǵan perdege hám usılarǵa tiyisli xızmetlerge juwapker edi. 32 Lebiy urıwınıń basshılarınıń ústinen ruwxaniy Xaronnıń ulı Elazar basshılıq qılatuǵın edi. Muxaddes shatırǵa juwapker adamlar onıń baqlawı astında boldı.

33 Merariyden Maxliy hám Mushiy tiyreleri kelip shıqtı. 34 Olardıń bir aylıq hám onnan joqarı jastaǵı esaptan ótken barlıq erkekleriniń sanı 6200. 35 Merariy áwladınıń basshısı Abixayıl ulı Suriel edi. Merariy tiyreleri shatırdıń arqa tárepinde ornalasıwı kerek edi. 36 – 37 Merariy urpaqları shatırdıń mına zatları ushın juwapker edi: shatırdıń taxtaylarına, qadalarına, baqanlarına, ultanlarına hám bularǵa tiyisli barlıq zatlarǵa, shatırdıń háwlisiniń átirapındaǵı baqanları menen ultanlarına hám qazıqları menen arqanlarına hám bularǵa tiyisli barlıq xızmetke.

38 Muwsa, Xaron hám onıń ulları shatırdıń shıǵısqa qaraǵan aldınǵı tárepine, Ushırasıw shatırınıń aldında ornalasatuǵın edi. Olar izraillılar atınan Muxaddes mákanda xızmet qılıw ushın qoyılǵan edi. Olardan basqa sol xızmetti atqarıwǵa Muxaddes mákanǵa jaqınlaǵan hár bir adam óltiriletuǵın edi.

39 Muwsa menen Xaron Jaratqan Iyeniń buyrıǵına muwapıq Lebiy urıwın tiyreleri boyınsha bir aylıq hám onnan joqarı jastaǵı barlıq er adamlardı sanap shıqqanda, olardıń ulıwma sanı 22 000 boldı.

Lebiy urıwınıń tuńǵısh ullardıń ornın basıwı

40 Sonnan keyin, Jaratqan Iye Muwsaǵa:

– Izraillılardıń bir aylıq hám onnan joqarı jastaǵı erkek tuńǵıshların sanap shıǵıp, olardı atpa-at dizimge al. 41 Izraillılardıń barlıq tuńǵısh ullarınıń ornına lebiylilerdi, jáne de, izraillılardıń haywanlarınıń birinshi tólleriniń ornına lebiylilerdiń haywanların Maǵan ayırıp ber. Men – Jaratqan Iyemen, – dedi.

42 Solay etip, Muwsa Jaratqan Iyeniń buyırǵanınday etip, izraillılardıń barlıq tuńǵısh ulların sanap shıqtı. 43 Atpa-at esapqa alınǵan bir aylıq hám onnan joqarı jastaǵı tuńǵısh er adamlar barlıǵı bolıp 22 273 boldı.

44 Jaratqan Iye Muwsaǵa jáne bılay dedi:

45 – Izraillılardıń tuńǵısh ullarınıń ornına lebiylilerdi, haywanlarınıń ornına da lebiylilerdiń haywanların ayırıp shıǵar. Lebiyliler Meniki boladı. Men – Jaratqan Iyemen. 46 Lebiylilerdiń sanınan artıq shıqqan 273 izraillı tuńǵısh er adamlar ushın qun tólep qaytıp alıwı tiyis. 47 Hár bir artıq shıqqan adam ushın bes shekel ^{▼▼ Bes shekel – bir shekel shama menen 11 gr.} gúmisten al. Hár bir shekel gúmis bólekleri Muxaddes orın ólshemi menen jigirma geradan ^{▼▼ Jigirma gera – bir gera shama menen 0,5 gr.} bolsın. 48 Lebiylilerdiń sanınan artıq shıqqanlardan qun sıpatında alınatuǵın gúmisti Xaron menen ullarına ber.

49 Muwsa lebiylilerden artıq shıqqan izraillıllardan qun tólemi sıpatında pul alǵanda, 50 bul Muxaddes orın ólshemi menen 1365 shekel gúmis boldı. 51 Muwsa Jaratqan Iyeniń ózine buyırǵanınday, qunnıń tólemlerin Xaron hám onıń ullarına berdi.