Num 30 | KaaIBT22L | STEP | Solay etip, Muwsa Jaratqan Iyeniń ózine buyırǵan hár bir sózin izraillılarǵa jetkerdi.

‏ Numbers 30

1 Solay etip, Muwsa Jaratqan Iyeniń ózine buyırǵan hár bir sózin izraillılarǵa jetkerdi.

Wádelerge baylanıslı qaǵıydalar

2 Muwsa Izraildıń urıw basshılarına bılay dedi:

– Jaratqan Iye bılay dep buyırdı: 3 «Eger kim de kim Jaratqan Iyege wáde berse yamasa ózin bir nárseden tıyıw ushın ant ishse, ol óz wádesin buzbay, aytqan sózleriniń hámmesin orınlasın.

4 Eger bir qız ákesiniń úyinde jasap atırǵan waqtında, Jaratqan Iyege wáde berse yamasa ózin bir nárseden tıyıw ushın ant ishse, 5 ákesi onıń Jaratqan Iyege bergen wádesin yamasa ózin bir nárseden tıyıw ushın bergen antın esitip, oǵan qarsı shıqpasa, onda qızdıń bergen wádesi hám antı óz kúshinde qaladı. 6 Al eger qızdıń ákesi onıń bergen wádesin hám ózin bir nárseden tıyıw ushın bergen antın esitken kúni qadaǵan qılsa, qızdıń bergen wádesi hám antı óz kúshinde qalmaydı. Ákesi qızınıń antın qadaǵan qılǵanı ushın, Jaratqan Iye qızdı keshiredi.

7 Eger qız wáde bergennen soń yamasa oylanbastan ózin bir nárseden tıyıw ushın ant ishkennen keyin turmısqa shıqsa, 8 onıń kúyewi usı haqqında esitken kúni qarsı shıqpasa, onda qızdıń bergen wádesi hám antı óz kúshinde qaladı. 9 Al eger qızdıń kúyewi usı haqqında esitken kúni qadaǵan qılsa, qızdıń bergen wádesi hám antı óz kúshinde qalmaydı. Jaratqan Iye qızdı keshiredi.

10 Jesir yaki kúyewinen ayırılısqan hayaldıń bergen wádesi yamasa ózin bir nárseden tıyıw ushın bergen antı óz kúshinde qaladı.

11 Eger kúyewi menen birge jasap atırǵan hayal wáde berse yamasa bir nárseden ózin tıyıw ushın ant ishse, 12 onıń kúyewi bul haqqında esitip, oǵan qarsı shıqpasa, onda hayaldıń bergen wádesi hám ishken hár bir antı óz kúshinde qaladı. 13 Al eger onıń kúyewi bul haqqında esitken kúni bunı biykarlasa, hayaldıń bergen wádesi hám ishken antı óz kúshinde qalmaydı. Kúyewi bulardı biykarlaǵanı ushın, Jaratqan Iye hayaldı keshiredi. 14 Solay etip, kúyewi hayalınıń bergen wádesin yamasa bir nárseden ózin tıyıw ushın ishken antın orınlawına ruxsat beriwi de, onı biykar qılıwı da múmkin. 15 Eger kúyewi bir kún ishinde bul máselede hayalına qarsı shıqpasa, onda hayalınıń bergen barlıq wádelerin yamasa bir nárseden ózin tıyıwı ushın ishken antın tastıyıqlap, ruxsat bergen boladı. Sebebi ol bulardı esitken kúni hayalına qarsı shıqpay, onı maqullaǵan bolıp esaplanadı. 16 Biraq kúyewi bulardı esitkennen keyin erteńine biykarlasa, ol hayalınıń ayıbına ózi juwapker boladı».

17 Erli-zayıplılardıń hám ákesi menen úyinde jasap atırǵan qızdıń arasındaǵı qarım-qatnaslarǵa tiyisli Jaratqan Iyeniń Muwsaǵa buyırǵan qaǵıydaları usılardan ibarat.