‏ Numbers 31

Midyanlılardan ósh alıw

1Jaratqan Iye Muwsaǵa bılay dedi:

2– Midyanlılardan izraillılardıń óshin al, sonnan keyin bul dúnyadan kóz jumıp, óz ata-babalarıńa qosılasań.

3Sonnan keyin, Muwsa xalıqqa:

– Midyanlılarǵa barıp, olardan Jaratqan Iyeniń óshin alıw ushın óz adamlarıńızdı urısqa alıp shıǵıń. 4Izraildıń hár bir urıwınan mıń adamnan urısqa jiberiń, – dedi.

5Solay etip, Izraildıń hár bir urıwınan mıń adamnan, on eki mıń adam tańlap alınıp, urısqa tayar bolıp turdı. 6Muwsa olardı hám ruwxaniy Elazar ulı Pinexastı urısqa jiberdi. Pinexas ózi menen birge muxaddes orınǵa tiyisli bazı buyımlardı hám dabıl qaǵıp belgi beretuǵın kárnaylardı alıp ketti.

7Izraillılar Jaratqan Iyeniń Muwsaǵa bergen buyrıǵı boyınsha midyanlılarǵa qarsı sawash ashıp, olardıń barlıq erkeklerin qırıp tasladı. 8Óltirilgenlerdiń arasında Midyannıń bes patshası – Ewiy, Rekem, Sur, Xur hám Reba da bar edi. Olar Beor ulı Bilamdı da qılısh penen óltirdi. 9Izraillılar midyan xalqınıń hayalları menen balaların tutqın qılıp, barlıq malların, súriwlerin hám múliklerin olja qılıp aldı. 10Midyanlılardıń jasap atırǵan barlıq qalaları menen ordalarına ot berdi. 11Olar adamlardı, haywanlardı hám olja qılıp alǵan barlıq múliklerdi ózleri menen alıp ketti. 12Bul tutqınlardı hám olja qılıp alǵan mal-múliklerdi Iordan dáryasınıń boyına, Muwsa menen ruwxaniy Elazar hám Izrail jámiyeti jıynalǵan Erixo qalasınıń qarsısında jaylasqan oypatlıqtıń Moabqa tiyisli bólegindegi ordaǵa alıp keldi.

13Muwsa, ruwxaniy Elazar hám jámiyet basshıları olardı qarsı alıw ushın ordanıń sırtına shıqtı. 14Biraq Muwsa sawashtan qaytqan orda sárkárdalarına – mıńbasılarǵa hám júzbasılarǵa ǵázeplendi.

15Muwsa olarǵa bılay dedi:

– Ne ushın barlıq hayallardı aman qaldırdıńız?! 16Bul hayallar Bilamnıń bergen másláháti boyınsha Peor tawında izraillılardıń Jaratqan Iyege qıyanet etiwine sebep bolǵan edi. Sol sebepli Jaratqan Iyeniń jámiyeti arasında ólim obası háwij alǵan edi. 17Endi barlıq ul balalardı hám erkek kórgen hayallardı óltiriń. 18Tek ǵana erkekke jaqınlaspaǵan jas qızlardı ózlerińiz ushın aman qaldırıń.

19Sońınan arańızdaǵı adam óltirgen yamasa ólige jantasqan hár bir adam jeti kún dawamında ordanıń sırtında qalsın. Úshinshi hám jetinshi kúni ózlerińizdi de, tutqınlarıńızdı da pákleń. 20Jáne de, barlıq kiyimlerdi, teriden, eshki júninen hám aǵashtan islengen hámme zatlardı pákleń.

21Keyin ruwxaniy Elazar sawashtan qaytqan láshkerlerge bılay dedi:

– Jaratqan Iyeniń Muwsaǵa buyırǵan nızamınıń talapları mınalardan ibarat: 22altın, gúmis, mıs, temir, qalayı, qorǵasın – 23otqa janbaytuǵın barlıq zatlardı ottan ótkerip, hadallap alıń, sonda olar hadal sanaladı. Sonıń menen birge, olardı páklew suwı menen de hadallań. Otqa janatuǵın zatlardı suwdıń ózi menen hadallap alıń. 24Jetinshi kúni kiyimlerińizdi juwıń. Sonda sizler pák sanalasızlar. Keyin sizler ordaǵa qaytıp keliwińizge boladı.

Oljaǵa túsken múliklerdiń úlestiriliwi

25Jaratqan Iye Muwsaǵa bılay dedi:

26– Sen, ruwxaniy Elazar hám jámiyettiń áwlad basshıları qolǵa túsken tutqınlar menen oljaǵa túsken mallardı esaplap shıǵıń. 27Qolǵa kirgizgenlerińizdi teńdey ekige bólip, sawashqa qatnasqan láshkerler menen jámiyettiń qalǵan adamlarına bólistirip beriń. 28Sawashqa qatnasqan láshkerlerdiń payına túsken tutqınlardan, mal, eshek hám mayda maldan Jaratqan Iyege, Maǵan bes júzden birewin pay qılıp ayırıp beriń. 29Áskerlerden alınǵan usı paydı Maǵan ajıratılǵan túrde ruwxaniy Elazarǵa beriń. 30Izraillılarǵa túsken jartı paydan – adamlardan, mal, eshek hám mayda maldan, yaǵnıy barlıq haywanlardan eliwden birewin alıp, Meniń Muxaddes shatırımnıń jumısına juwapker bolǵan lebiylilerge beriń.

31Muwsa menen ruwxaniy Elazar Jaratqan Iyeniń Muwsaǵa buyırǵanınday etip isledi.

32Sawashqa qatnasqan láshkerlerdiń qolǵa kirgizgenlerinen qalǵan oljalar mınalar edi: 675 000 mayda mal, 3372 000 iri mal, 3461 000 eshek, 35erkekke jaqınlaspaǵan 32 000 qız.

36Sawashqa qatnasqan láshkerlerge túsken jartı pay mınalar: 337 500 mayda mal, 37bulardan Jaratqan Iyege 675 iri mal pay qılıp berildi, 3836 000 iri mal, bulardan Jaratqan Iyege 72 iri mal pay qılıp berildi, 3930 500 eshek, bulardan Jaratqan Iyege 61 eshek pay qılıp berildi, 4016 000 qız, bulardan Jaratqan Iyege 32 qız pay qılıp berildi.

41Muwsa Jaratqan Iyeniń ózine buyırǵanınday Jaratqan Iyege ajıratılǵan paydı ruwxaniy Elazarǵa berdi.

42Muwsanıń sawashqa qatnasqan láshkerlerden alıp, izraillılarǵa ajıratıp bergen jartı payı mınalar: 43337 500 mayda mal, 4436 000 iri mal, 4530 500 eshek, 4616 000 qız.

47Jaratqan Iyeniń ózine buyırǵanınday, Muwsa izraillılarǵa túsken jartı paydan hár eliw adamnan hám hár eliw haywannan birewin alıp, Jaratqan Iyeniń Muxaddes shatırınıń xızmetine juwapker bolǵan lebiylilerge berdi.

48Sonnan keyin, orda sárkárdaları – mıńbasılar menen júzbasılar Muwsanıń aldına barıp:

49– Mırza, qol astımızdaǵı láshkerlerdi sanap shıqtıq, birde bir láshkerimizdi joytpappız. 50Mine, qolǵa kirgizgen altın buyımlarımızdı – qolǵa taǵılatuǵın shınjır, bilezik, júzik, sırǵa hám háykellerimizdi alıp keldik. Janımızdıń qunı sıpatında usılardı Jaratqan Iyege beremiz, – dedi.

51Muwsa menen ruwxaniy Elazar olar alıp kelgen barlıq altın buyımlardı aldı. 52Mıńbası menen júzbasılar Jaratqan Iyege bergen altınnıń awırlıǵı barlıǵı bolıp 16 750 shekel. 53Sawashqa qatnasqan hár bir láshker bolsa, oljaların ózlerine qaldırǵan edi.

54Muwsa menen ruwxaniy Elazar mıńbası hám júzbasılardıń usınǵan altınların qabıllap aldı. Olardı Jaratqan Iyeniń Izrail xalqın eslep turıwı ushın Ushırasıw shatırına alıp keldi.