‏ Numbers 32

Iordan dáryasınıń shıǵıs tárepinde ornalasqan urıwlar

1Ruben hám Gad urıwlarınıń malları júdá kóp edi. Olar Yazer hám Gilad jerleriniń mal sharwashılıǵı ushın qolaylı jer ekenin kórip, 2Muwsa menen ruwxaniy Elazardıń hám jámiyet basshılarınıń aldına barıp, bılay dedi:

3– Atarot, Dibon, Yazer, Nimra, Xeshbon, Elale, Sebam, Nebo hám Beon qalaları 4jaylasqan eldi Jaratqan Iye Izrail xalqına jeńip berdi. Bul eldiń jeri mallar ushın qolaylı eken. Al qullarıńız bolǵan bizlerde mallarımız bar. 5Miyrim kórsetip, bizlerdi Iordan dáryasınıń arǵı tárepine ótkizbey, bul eldi bizlerge múlik etip ber.

6Muwsa olarǵa bılay dep juwap berdi:

– Tuwısqanlarıńız sawashqa baratırǵanda, sizler usı jerde qalajaqsız ba? 7Jaratqan Iyeniń berip atırǵan jerine kiriwge izraillılardı ne ushın aynıtıp atırsızlar? 8Men ákelerińizdi eldi kózden ótkeriwge Qadesh-Barniyadan jibergenimde, olar da tap usınday qılǵan edi. 9Olar Eshkol sayına deyin barıp, eldi kózden ótkergennen soń, Jaratqan Iyeniń ózlerine beretuǵın jerge barmawı ushın izraillılardı aynıtqan edi. 10Sol kúni Jaratqan Iyeniń ǵázebi qaynap, bılay dep ant ishken edi: 11«Mısır jerinen shıqqan jigirma hám onnan joqarı jastaǵı adamlardıń hesh biri Meniń Ibrayımǵa, Ísaqqa hám Yaqıpqa beremen dep ant ishken jerimdi kórmeydi. Óytkeni olar pútkil júregi menen Maǵan boysınbadı. 12Keniz tiyresinen bolǵan Efunne ulı Kaleb penen Nun ulı Eshuadan basqa hesh biri ol jerdi kórmeydi. Sebebi Kaleb hám Eshua pútkil júregi menen Maǵan sadıq qaldı». 13Jaratqan Iye izraillılarǵa qattı ǵázeplendi. Jaratqan Iyeniń názerinde jawız bolǵan islerdi islegen sol áwlad pútkilley joq bolıp ketkenshe, olardı qırıq jıl shólde alıp júrdi.

14Endi, mine, gúnakarlar áwladı bolǵan sizler ákelerińizdiń ornın basıp, Jaratqan Iyeniń Izrailǵa bolǵan lawlaǵan ǵázebin kúsheytip atırsızlar. 15Eger Onnan júz bursańız, Ol bul xalıqtı jáne shólge taslap ketedi. Solay etip, sizler pútkil xalıqtı joq qılajaqsızlar.

16Biraq Gad hám Ruben urıwı Muwsanıń qasına jaqınlap, bılay dedi:

– Bizlerdiń usı jerde mallarımız ushın qoralar soǵıp, bala-shaǵalarımız ushın qalalar qurıwımızǵa ruxsat ber. 17Al ózlerimiz bolsa qurallanıp, izraillılar menen birge barıp, olardıń mákan qılatuǵın jerin iyelep alǵanǵa deyin, olardıń aldında júremiz. Bala-shaǵalarımız eldiń turǵınlarınan qáwipsiz bolǵan qorǵan qalalarda jasay bersin. 18Hár bir izraillı óz múlkin iyelemegenshe, bizler úylerimizge qaytpaymız. 19Iordan dáryasınıń arǵı jaǵasında olar menen birge jer úlesten almaymız, sebebi bizlerdiń úlesimiz Iordan dáryasınıń shıǵıs jaǵasında boladı.

20Muwsa olarǵa bılay dep juwap berdi:

– Eger sizler aytqanlarıńızdı orınlaytuǵın bolsańız, Jaratqan Iyeniń aldında sawashqa barıw ushın qurallanıń. 21Jaratqan Iye dushpanların quwıp jibermegenshe, hámmeńiz Onıń aldında qurallanıp, Iordan dáryasınıń arǵı jaǵasına ótiń. 22Pútkil sol el Jaratqan Iye ushın basıp alınǵannan soń, sizler Jaratqan Iye hám Izrail xalqı aldındaǵı minnetińizden azat bolasızlar. Sonda sizler usı jerge qaytıp keliwińizge boladı hám bul jer Jaratqan Iyeniń aldında sizlerdiń múlkińiz bolıp qaladı.

23Biraq aytqanlarıńızdı orınlamasańız, Jaratqan Iyege qarsı gúna islegen bolasızlar hám bul gúnańız óz basıńızǵa jetedi. 24Bala-shaǵalarıńız ushın qalalar qurıp, mallarıńız ushın qoralar soǵıń. Degen menen, bergen wádeńizde turıń.

25Gad hám Ruben urıwlarınıń adamları Muwsaǵa bılay dedi:

– Mırzamız, siz ne buyırsańız, qullarıńız bolǵan bizler sonı orınlaymız. 26Bala-shaǵamız, mallarımız hám haywanlarımız usı jerde, Gilad qalalarında qaladı. 27Al qullarıńız bolǵan bizler siziń buyırǵanıńızday, hár birimiz qurallanıp, Jaratqan Iyeniń aldında sawashqa túsiw ushın dáryanıń arǵı jaǵasına ótemiz.

28Sonnan keyin, Muwsa Gad hám Ruben urıwları haqqında ruwxaniy Elazarǵa, Nun ulı Eshuaǵa hám Izrail urıwlarınıń áwlad basshılarına buyrıq berip, 29bılay dedi:

– Eger Gad hám Ruben urıwlarınan qurallanǵan adamlar Jaratqan Iyeniń aldında sizler menen birge Iordan dáryasınıń arǵı jaǵasına ótse hám sizler sol eldi qolǵa kirgizseńiz, onda Gilad úlkesin múlik qılıp, olarǵa beriń. 30Biraq, eger de olar qurallanıp, sizler menen birge dáryanıń arǵı jaǵasına ótpese, onda olar Qanan úlkesinen sizler menen birge úles jer aladı.

31Sonda Gad hám Ruben urıwlarınıń adamları:

– Jaratqan Iye qullarıńız bolǵan bizlerge qanday buyrıq bergen bolsa, sonıń hámmesin orınlaymız. 32Bizler qurallanıp, Jaratqan Iyeniń aldında Qanan úlkesine baramız. Al bizlerdiń alatuǵın jer úlesimiz Iordan dáryasınıń shıǵıs jaǵasında bolsın, – dedi.

33Solay etip, Muwsa Gad penen Ruben urıwlarına hám Yusup ulı Menashshe urıwınıń jartısına amor xalqınıń patshası Sixonnıń eli menen Bashan patshası Ogtıń elin hám olardıń qalaları menen qala dógeregindegi jerlerdi berdi.

34Gad urıwı Dibon, Atarot, Aroer, 35Atrot-Shofan, Yazer, Iogboha, 36Beyt-Nimra hám Beyt-Haran degen qorǵanlı qalaların jańadan qurdı, malları ushın qoralar soqtı. 37Ruben urıwı Xeshbon, Elale, Kiryatayım, 38atları ózgertilgen eki qala Nebo menen Baal-Meon hám Sibma qalaların qayta qurdı. Olar tiklegen qalalarına jańadan at qoydı.

39Menashsheniń ulı Maxirdiń áwladları Giladqa bardı hám onı iyelep alıp, ol jerde jasap atırǵan amor xalqın quwıp shıǵardı. 40Solay etip, Muwsa Giladtı Menashshe ulı Maxirdiń áwladına berdi. Olar sol jerge qonıs bastı. 41Menashsheniń ulı Yair bir neshe qalalarǵa hújim etip, olardı iyelep aldı. Sol jerlerdi Yairge tiyisli qalalar dep atadı. 42Nobax ta Kenat qalasın hám onıń dógeregindegi awıllardı iyelep alıp, ol jerdi óziniń atı menen Nobax dep atadı.