‏ Numbers 33

Mısırdan Moabqa deyingi basıp ótilgen jol

1Muwsa hám Xaronnıń jetekshiligi astında top-tobı menen Mısırdan shıqqan izraillılar tómendegi jollar menen júrip ótti. 2Muwsa Jaratqan Iyeniń buyrıǵı boyınsha kóship-qonıp júrgen jollarında qonıs basqan jerleriniń atların jazıp bardı. Bul jerler mınalar edi:

3Izraillılar Qutqarılıw asınan keyingi kúni, birinshi aydıń on besinshi kúni mısırlılardıń kóz aldında nıq qádem atıp, Ramses qalasınan jolǵa shıqtı. 4Sol waqıtta mısırlılar Jaratqan Iyeniń óltirgen tuńǵısh ulların jerlep atırǵan edi. Sebebi Jaratqan Iye olardıń qudayların jazalaǵan edi.

5Solay etip, izraillılar Ramsesten jolǵa shıǵıp ketkennen keyin, olar Sukkotqa ornalastı.

6Keyin olar Sukkottan shıǵıp, shóldiń shetindegi Etamǵa ornalastı.

7Etamnan shıǵıp, olar Baal-Sefonnıń shıǵısındaǵı Piy-Haxirotqa qaray burılıp, Migdolǵa jaqın jerge ornalastı.

8Piy-Haxirottan shıǵıp, teńiz arqalı ótip, shólge qaray jol aldı. Etam shólinde úsh kún jol júrgennen soń, olar Maraǵa ornalastı.

9Maradan shıǵıp, olar on eki suw bulaǵı hám jetpis palma aǵashı bolǵan Elimge barıp, sol jerge ornalastı.

10Olar Elimnen shıǵıp, Qızıl teńizdiń boyına ornalastı.

11Qızıl teńizdiń boyınan shıǵıp, Sin shóline ornalastı.

12Sin shólinen shıǵıp, olar Dofqaǵa ornalastı.

13Dofqadan shıǵıp, Alushqa ornalastı.

14Alushtan shıǵıp, Refidimge ornalastı. Biraq ol jerde xalıq ushın ishetuǵın suw joq edi.

15Refidimnen shıǵıp, Sinay shóline ornalastı.

16Sinay shólinen shıǵıp, Kibrot-Hattaawaǵa ornalastı.

17Kibrot-Hattaawadan shıǵıp, Xaserotqa ornalastı.

18Xaserottan shıǵıp, Ritmaǵa ornalastı.

19Ritmadan shıǵıp, Rimmon-Pereske ornalastı.

20Rimmon-Peresten shıǵıp, Libnaǵa ornalastı.

21Libnadan shıǵıp, Rissaǵa ornalastı.

22Rissadan shıǵıp, Kehelataǵa ornalastı.

23Kehelatadan shıǵıp, Shefer tawına ornalastı.

24Shefer tawınan shıǵıp, Xaradaǵa ornalastı.

25Xaradadan shıǵıp, Maqhelotqa ornalastı.

26Maqhelottan shıǵıp, Taxatqa ornalastı.

27Taxattan shıǵıp, Teraxqa ornalastı.

28Teraxtan shıǵıp, Mitqaǵa ornalastı.

29Mitqadan shıǵıp, Xashmonaǵa ornalastı.

30Xashmonadan shıǵıp, Moserotqa ornalastı.

31Moserottan shıǵıp, Bene-Yaaqanǵa ornalastı.

32Bene-Yaaqannan shıǵıp, Xor-Hagidgadqa ornalastı.

33Xor-Hagidgadtan shıǵıp, Iotbataǵa ornalastı.

34Iotbatadan shıǵıp, Abronaǵa ornalastı.

35Abronadan shıǵıp, Esion-Geberge ornalastı.

36Esion-Geberden shıǵıp, Zin shólindegi Qadeshke ornalastı.

37Qadeshten shıǵıp, olar Edom shegarasındaǵı Hor tawınıń qasına ornalastı.

38Ruwxaniy Xaron Jaratqan Iyeniń buyrıǵı boyınsha Hor tawına shıǵıp, sol jerde qaytıs boldı. Bul waqıya izraillılar Mısırdan shıqqannan keyin qırqınshı jılı, besinshi aydıń birinshi kúninde boldı. 39Xaron Hor tawında qaytıs bolǵanda 123 jasta edi.

40Qanan eliniń Negebte jasaytuǵın qananlı Arad patshası izraillılardıń sol jerge kelgeninen xabar taptı.

41Izraillılar Hor tawınan shıǵıp, Salmonaǵa ornalastı.

42Salmonadan shıǵıp, Punonǵa ornalastı.

43Punonnan shıǵıp, Obotqa ornalastı.

44Obottan shıǵıp, Moab shegarasındaǵı Iye-Abarimge ornalastı.

45Iye-Abarimnen shıǵıp, Dibon-Gadqa ornalastı.

46Dibon-Gadtan shıǵıp, Almon-Diblatayımǵa ornalastı.

47Almon-Diblatayımnan shıǵıp, Neboǵa jaqın Abarim tawlarına ornalastı.

48Abarim tawlarınan shıǵıp, oypatlıqtıń Moabqa tiyisli bólegine, Erixonıń qarsısındaǵı Iordannıń boyına ornalastı. 49Olar oypatlıqtıń Moabqa tiyisli bóleginde Iordan boylap, Beyt-Eshimottan Abel-Shittimge deyin ornalasıp bardı.

Iordan dáryasınan ótpesten aldın berilgen kórsetpeler

50Sol jerde, oypatlıqtıń Moabqa tiyisli bóleginde, Erixonıń qarsısındaǵı Iordannıń boyında Jaratqan Iye Muwsaǵa bılay dep ayttı:

51– Izraillılarǵa bılay dep ayt: «Sizler Iordan dáryasınan ótip, Qanan eline kirgenińizde, 52sol elde jasaytuǵın barlıq xalıqtı quwıp jiberiń, but súwretlerin hám músinlerin joq qılıp, sıyınıw orınların buzıp taslań. 53Eldi iyelep alıp, ol jerge ornalasıp alıń, óytkeni Men sizlerge sol jerdi múlik qılıp berdim. 54Jerlerdi urıwlar ara shek taslap bólisip alıń. Úlken urıwǵa úlken úles jer, kishi urıwǵa kishi úles jer beriń. Shek boyınsha kimge qaysı jer tússe, sol jer sol urıwǵa tiyisli boladı. Úles jerlerdi ata-babalarıńızdan taraǵan urıwlar boyınsha bólistirip beriń.

55Eger sol eldiń turǵınların quwıp shıǵarmasańız, onda sol jerde qalǵan xalıq kózlerińizge túsken shóp, búyirlerińizge kirgen tikendey boladı. Olar jasaytuǵın jerińizde sizlerdi qısqıǵa aladı. 56Sonda Men olarǵa ne islewdi niyetlegen bolsam, sizlerge sonı isleymen».