‏ Numbers 34

Qanan eliniń shegaraları

1Jaratqan Iye Muwsaǵa bılay dedi:

2– Izraillılarǵa bılay dep buyır: «Sizlerge múlik etip beriletuǵın Qanan eline kirgenińizde, onıń shegaraları mınaday boladı:

3Sizlerdiń qubla táreptegi shegarańız Zin shólinen Edom shegarası boylap sozıladı. Bul qubla shegarańız shıǵıstaǵı Óli teńizdiń shetinen baslanadı. 4Onnan keyin Aqrabbim biyikliginiń qublasınan Zin arqalı ótip, Qadesh-Barniyanıń qublasına deyin sozıladı. Ol jerden shegara Xasar-Addar arqalı ótip, Asmonǵa deyin baradı. 5Keyin sol jerden burılıp, Mısır shegarasındaǵı sayǵa deyin sozılıp, Jer Orta teńizine barıp tawısıladı.

6Batıs shegarańız Jer Orta teńiziniń jaǵası boladı. Batıstaǵı shegarańız usıdan ibarat.

7Arqa shegarańız Jer Orta teńizinen Hor tawına deyin sozıladı. 8Hor tawınan Lebo-Xamatqa deyin, keyin Sedadqa deyin barıp, 9Zifronǵa deyin sozıladı hám Xasar-Enanda tawısıladı. Arqadaǵı shegarańız usıdan ibarat.

10Shıǵıs shegarańız Xasar-Enannan baslanıp, Shefamǵa deyin sozıladı. 11Keyin shegara Shefamnan Ayınnıń shıǵıs tárepindegi Riblaǵa deyin baradı. Ol jerden Kinneret kóliniń shıǵıs jaǵındaǵı janbawırlarǵa deyin sozıladı. 12Sonnan keyin, shegara ol jerden Iordan dáryası boyınsha sozılıp, Óli teńizge barıp toqtaydı. Hár táreptegi elińizdiń shegaraları usı boladı».

13Sonnan keyin, Muwsa izraillılarǵa:

– Mine, múlik qılıp, shek boyınsha bólisip alatuǵın el usı boladı. Jaratqan Iyeniń buyrıǵı boyınsha bul el toǵız urıw menen bir urıwdıń yarımına bólistirip beriledi. 14Óytkeni Ruben hám Gad urıwları menen Menashshe urıwınıń yarımı ózlerine tiyisli jer úlesin áwladları boyınsha bólisip aldı. 15Bul eki urıw menen yarım urıw Erixonıń qarsısındaǵı Iordan dáryasınıń shıǵıs tárepinen óz múliklerin aldı, – dedi.

Jerdi bólistirip beriwge juwapker jetekshiler

16Jaratqan Iye Muwsaǵa bılay dedi:

17– Ruwxaniy Elazar hám Nun ulı Eshua Izrail xalqına eldi bólistirip bersin. 18Eldi bólistiriw ushın hár bir urıwdan bir jetekshiden alıp, xızmetke qoyıń. 19Sol adamlardıń atları mınalar: Yahuda urıwınan Efunne ulı Kaleb,
20Shimon urıwınan Ammihud ulı Samuel,
21Benyamin urıwınan Kislon ulı Elidad,
22Dan urıwınan Iogliy ulı basshı Bukkiy,
23Yusup ulı Menashshe urıwınan Efod ulı basshı Xanniel,
24Efrayım urıwınan Shiftan ulı basshı Kemuel,
25Zebulon urıwınan Parnax ulı basshı Elisafan,
26Issaxar urıwınan Azzan ulı basshı Paltiel,
27Asher urıwınan Shelomiy ulı basshı Axihud,
28Naftaliy urıwınan Ammihud ulı basshı Pedael.

29Qanan jerin Izrail xalqına múlik etip bólistirip beriń, dep Jaratqan Iye usı adamlarǵa buyırǵan edi.