‏ Numbers 35

Lebiylilerge berilgen qalalar

1Jaratqan Iye oypatlıqtıń Moabqa tiyisli bóleginde, Erixonıń qarsısındaǵı Iordannıń boyında Muwsaǵa bılay dedi:

2– Izraillılarǵa buyır, olar alatuǵın úles jerinde lebiylilerdiń jasawı ushın qalalar ajıratıp bersin. Sonıń menen birge, qalalardıń átirapındaǵı jaylawlardı da bersin. 3Solay etip, lebiylilerdiń jasawı ushın qalaları hám olardıń pada, súriwleri menen basqa da haywanları ushın jaylawları bolsın.

4Lebiylilerge beriletuǵın qalalardıń aylana átirapındaǵı jaylawlar qala qorǵanınan baslap mıń shıǵanaq uzınlıqqa sozılǵan bolsın. 5Qala ortada jaylasqan bolıp, onıń sırtınan baslap, shıǵısqa, qublaǵa, batısqa hám arqaǵa qaray eki mıń shıǵanaqtan ólshep shıǵıń. Bular qalalar ushın jaylawlar boladı.

6– Lebiylilerge beriletuǵın qalalardan altawı panalaytuǵın qala bolsın. Solay etip, adam óltiriwshiniń sol jerge qashıwına jol qoyasızlar. Usı altı qaladan tısqarı lebiylilerge qırıq eki qala berilsin. 7Barlıǵı bolıp, lebiylilerge jaylawları menen birge qırıq segiz qala beresizler. 8Izraillılardıń úles jerinen lebiylilerge beriletuǵın qalalar hár bir urıwǵa túsken payına ılayıqlı bolsın. Kóp úles jer alǵan urıw kóp, az úles jer alǵan urıw az qala bersin.

Panalaytuǵın qalalar

(Nzm 19:1-13; Eshu 20:1-9)

9Jaratqan Iye Muwsa menen sóylesiwin dawam etip, bılay dedi:

10– Izraillılarǵa bılay dep ayt: «Iordan dáryasınan ótip, Qanan eline kirgenińizden keyin, 11panalaytuǵın qalalardı tańlap alıń. Solay etip, abaysızda adam óltirip qoyǵan adam sol panalaytuǵın qalaǵa qashıp kete alatuǵın bolsın. 12Bul qalalar adam óltirip qoyǵan adamnıń jámiyet aldında húkim etilmesinen aldın óltirilmewi ushın, onıń ósh alıwshı ámeńgerden qashıp, panalaytuǵın jeri boladı. 13Sizler ajıratatuǵın altı qala panalaytuǵın qala bolsın. 14Panalaytuǵın qalalardıń úshewi Iordan dáryasınıń shıǵıs tárepinen, qalǵan úshewi Qanan jerinen tańlap alınsın. 15Bul altı qala izraillılar hám arańızda jasap atırǵan kelgindiler menen jat jerli adamlar ushın panalaw qalası bolsın. Solay etip, abaysızda adam óltirip qoyǵan adam sol jerge qashıp barsın.

16Eger kim de kim temir qural menen bir adamdı urıp óltirip qoysa, onda urǵan adam qanxor sanaladı hám ol sózsiz óltirilsin. 17Eger tas penen birewdi urıp, onı óltirse, óltirgen adam qanxor sanaladı hám ol sózsiz óltirilsin. 18Yamasa ol aǵash buyım menen birewdi urıp, onı óltirse, onda óltirgen adam qanxor sanaladı hám ol sózsiz óltirilsin. 19Ólgen adamnıń ósh alıwshı adamı qanxordı ushıratıp qalıwdan-aq, onı óltirsin. 20Sonday-aq eger bir adam birewdi jek kórgenlikten iyterip jiberip yamasa bilqastan oǵan qaray bir nárseni ılaqtırıp, ol adamdı óltirse, 21yamasa óshegisip, onı mushı menen urıp óltirse, urǵan adam sózsiz óltirilsin. Óytkeni ol qanxor. Ólgen adamnıń óshin alıwshı adam qanxordı ushıratıp qalıwdan-aq, onı óltirsin.

22Eger kim de kim bir adamdı óshegisip emes, al abaysızdan iyterip jiberse, yamasa oǵan qaray bilmesten bir nárseni ılaqtırıp jiberse, 23yamasa onı kórmey qalıp, ústine bir tastı túsirip alıp, onı óltirip qoysa, biraq óltirip qoyǵan adam oǵan dushpan bolmay, oǵan jawızlıq oylamaǵan bolsa, 24jámiyet adam óltirip qoyǵan menen ósh alıwshı ámeńgerdiń arasında usı qaǵıydalar boyınsha qarar shıǵarsın. 25Jámiyet adam óltirip qoyǵan adamdı ósh alıwshı ámeńgerdiń qolınan qorǵawı kerek hám onı qashıp kelgen panalaytuǵın qalaǵa qaytadan qaytarıp jibersin. Ol adam muxaddes may menen maylanǵan bas ruwxaniydiń ólimine deyin sol jerde jasap qalsın.

26Biraq adam óltiriwshi qashıp barǵan panalaytuǵın qalanıń shegarasınan shıqsa, 27ósh alıwshı ámeńger de onı panalaytuǵın qalanıń shegarasınıń sırtında kórip qalsa, ósh alıwshı ámeńger adam óltiriwshini óltirse, ol ayıplı sanalmaydı. 28Óytkeni adam óltiriwshi bas ruwxaniydiń ólimine deyin panalaytuǵın qala ishinde bolıwı kerek. Tek ǵana bas ruwxaniydiń óliminen soń óz jerine qaytıwına boladı.

29Qay jerde jasasańız da bular áwladlar dawamında sizler ushın qaǵıyda bolsın.

30Adam óltiriwshi gúwalardıń aytqan sózleri boyınsha ólim jazasına tartılsın. Tek bir adamnıń ǵana gúwalıǵı menen hesh kim óltirilmesin.

31Ólimge ılayıqlı qanxordıń janın qutqarıw ushın qun almań, ol sózsiz óltirilsin.

32Panalaytuǵın qalaǵa qashqan adam qun tólep, bas ruwxaniydiń óliminen aldın óz jerine qaytıp barıp jasawına ruxsat bermeń.

33Ózlerińiz jasap atırǵan eldi haramlamań. Qan tógiwshilik eldi haramlaydı. Ishinde qan tógilgen jer tek ǵana qan tókken adamnıń qanı menen páklenedi.

34Ózlerińiz ishinde jasap atırǵan hám Men ishinde bolıp atırǵan jerdi haramlamań. Sebebi Men izraillılardıń arasında jasaytuǵın Jaratqan Iyemen».