Num 36 | KaaIBT22L | STEP | Bir kúni Yusup ulı Menashshe urıwınan Maxir ulı Gilad áwladınan bolǵan basshılar Muwsanıń hám Izraildıń tiyre basshılarınıń aldına kelip, olarǵa bılay dedi:

‏ Numbers 36

Selofexadtıń qızlarınıń úles jeri

1 Bir kúni Yusup ulı Menashshe urıwınan Maxir ulı Gilad áwladınan bolǵan basshılar Muwsanıń hám Izraildıń tiyre basshılarınıń aldına kelip, olarǵa bılay dedi:

2 – Jaratqan Iye eldi múlik etip, shek boyınsha izraillılar arasında úlestiriw ushın mırzamız Muwsaǵa buyrıq berdi. Tuwısqanımız Selofexadtıń múlki qızlarına beriliwi ushın da buyrıq berilgen edi. 3 Degen menen, eger Selofexadtıń qızları basqa bir Izrail urıwına tiyisli erkeklerge turmısqa shıqsa, olardıń múlikleri kúyewleri tiyisli bolǵan urıwdıń múlkine ótip ketedi. Sonda urıwımız shek boyınsha alǵan jer úlesiniń bir bóleginen ayırılıp qaladı. 4 Hátteki, izraillılardıń Qutlı jılı ^{▼▼ Leb 25:8-17.} belgilengende de, qızlardıń múlki urıwımızǵa qaytarılmay, kúyewleri tiyisli bolǵan urıwda qalıp ketedi. Solay etip, olardıń múlikleri babalarımızdıń urıwına túsken múlikten alınıp, bir bólek jerimizden ayırılıp qalamız.

5 Muwsa Jaratqan Iyeniń sózi boyınsha izraillılarǵa bılay dep buyrıq berdi:

– Yusup áwladınan bolǵan adamlardıń aytqanları durıs. 6 Jaratqan Iye Selofexadtıń qızları haqqında mınaday buyrıq beredi: «Selofexadtıń qızları qálegen jigitke turmısqa shıǵıwına boladı, biraq bul jigitler ákesiniń urıwınan hám tiyresinen bolıwı shárt. 7 Izrail xalqınıń múlik etip alǵan jeri bir urıwdan ekinshi urıwǵa ótip ketpesin. Hár bir izraillı óz urıwınıń múlkin saqlap qalsın. 8 Izraildaǵı hár bir urıwdaǵı jer múlkine miyrasxor bolǵan qız ákesi tiyisli bolǵan urıw hám tiyresindegi jigitke turmısqa shıqsın. Solay etip, hár bir izraillı ata-babalarınıń múlkine ózleri iyelik etip qalsın. 9 Sonda múlik bir urıwdan ekinshi urıwǵa ótip ketpeydi. Hár bir Izrail urıwı ózlerine alǵan múlikti saqlap qalsın».

10 Selofexadtıń qızları Jaratqan Iyeniń Muwsaǵa buyırǵanınday isledi. 11 Selofexadtıń qızları Maxla, Tirsa, Xogla, Milka hám Noa óz atalas aǵalarına turmısqa shıqtı. 12 Solay etip, olar Yusup ulı Menashshe urpaǵınan bolǵan jigitlerge turmısqa shıqtı hám olardıń múlikleri ákeleri tiyisli bolǵan tiyre hám urıwda qaldı.

13 Jaratqan Iyeniń Muwsa arqalı oypatlıqtıń Moabqa tiyisli bóleginde, Erixo qalasınıń qarsısındaǵı Iordan dáryasınıń boyında izraillılarǵa bergen buyrıq hám nızamları usılardan ibarat edi.