Num 4 | KaaIBT22L | STEP | Jaratqan Iye Muwsa menen Xaronǵa bılay dedi:

‏ Numbers 4

Qohat urpaǵınıń xızmetleri

1 Jaratqan Iye Muwsa menen Xaronǵa bılay dedi:

2 – Lebiy urıwındaǵı Qohat urpaǵın tiyre hám áwladları boyınsha sanap shıq. 3 Ushırasıw shatırında jumıs islewge jaramlı otızdan eliw jasqa deyingi adamlardıń hámmesin sana.

4 Qohat urpaǵınıń jumısı Ushırasıw shatırındaǵı eń muxaddes buyımlarǵa juwapkershilikten ibarat. 5 Xalıq jolǵa shıqqan waqıtta Xaron menen ulları kelip, ishki bólmeniń perdesin sheship alsın hám onıń menen Kelisim sandıǵın japsın. 6 Keyin onıń ústine jumsaq teriden islengen jabıw jawıp, ústine jáne qızǵısh kók japqısh japsın hám sırıqların sandıqtıń halqalarına jaylastırsın.

7 Usınılǵan nanlar qoyılatuǵın stoldıń ústine qızǵısh kók reńli japqısh jayıp, ústine tabaqlardı, tútetki salatuǵın tostaǵanlardı, ishimlik sadaqaları ushın keseler hám gúzelerdi qoysın. Stoldıń ústinde kúndelikli usınılǵan nanlar da tursın. 8 Bulardıń ústine qırmızı reńli japqısh jawıp, keyin onı jumsaq teriden islengen japqısh penen japsın, al sırıqların stoldıń halqalarına jaylastırsın.

9 Sonnan soń shıra qoyǵıshtı, onıń shıraların, piliklerdi tazalaytuǵın qısqıshlar menen ıdıslardı hám záytún mayı ushın qollanılatuǵın ıdıslardı qızǵısh kók reńli japqısh penen jawıp orasın. 10 Keyin bulardı jumsaq teri menen orap, zámberdiń ústine qoysın.

11 Tútetki tútetiletuǵın altın orınnıń ústine qızǵısh kók tawar jayıp, onıń ústin jumsaq bir teri menen qaplasın hám sırıqların altın orınnıń halqalarına jaylastırsın. 12 Muxaddes orında qollanılatuǵın barlıq buyımlardı alıp, olardı qızǵısh kók japqısh penen orap, ústin jumsaq teriden islengen japqısh penen japsın hám keyin ekinshi zámberdiń ústine qoysın.

13 Qurbanlıq orındı kúlden tazalap, onı shım qızıl reńli jabıw menen japsın. 14 Sonnan soń, xızmet waqtında qollanılatuǵın barlıq buyımlardı: shoq salınatuǵın ıdıslardı, shanıshqını, kúl alatuǵın belsheni, qan sebetuǵın tabaqlardı qurbanlıq orınnıń ústine qoyıp, jumsaq teriden islengen jabıw menen japsın hám sırıqların qurbanlıq orınnıń halqalarına jaylastırsın.

15 Izrail ordası basqa jerge kóshetuǵın waqıtta, Xaron menen onıń ulları muxaddes buyımlardı hám bularǵa tiyisli barlıq zatlardı jıynastırıp, orap bolǵannan soń, Qohat urpaqları kelip, olardı kóterip alıp júrsin. Olar ólmewi ushın muxaddes buyımlarǵa qol tiygizbesin. Qohat urpaǵınıń Ushırasıw shatırındaǵı alıp júretuǵın buyımları usılardan ibarat.

16 Ruwxaniy Xaron ulı Elazar shıralar ushın záytún mayına, xosh iyisli tútetkige, kúndelikli beriletuǵın ǵálle sadaqasına hám maylaw rásimine qollanılatuǵın záytún mayına, jáne de, shatırǵa hám onıń ishindegi barlıq muxaddes buyımlar menen bularǵa tiyisli zatlarǵa juwapker bolsın.

17 Jaratqan Iye Muwsa menen Xaronǵa bılay dedi:

18 – Qohat tiyreleriniń lebiylilerdiń arasınan joq bolıp ketiwine jol qoymańlar. 19 Olardıń eń muxaddes zatlarǵa jaqınlasıp, ólip qalmawı ushın bılay isleń: Xaron menen onıń ulları kelip, Qohat urpaǵınıń hár biriniń isleytuǵın xızmetin hám ne alıp júretuǵının belgilesin. 20 Biraq Qohat urpaǵı azǵantay waqıtqa bolsa da ishke kirip, muxaddes buyımlarǵa qaramasın, bolmasa olar óledi.

Gershon urpaǵınıń xızmetleri

21 Jaratqan Iye Muwsaǵa bılay dedi:

22 – Gershon urpaǵın da áwladları hám tiyreleri boyınsha sanaqtan ótkiz. 23 Ushırasıw shatırında jumıs islewge jaramlı otızdan eliw jasqa deyingi barlıq er adamlardı sana.

24 Gershon tiyreleriniń xızmeti hám júk tasıw wazıypaları mınalardan ibarat: 25 olar Ushırasıw shatırınıń ishki hám sırtqı japqıshların, onıń kirer awzındaǵı perdeni, 26 shatır menen qurbanlıq orındı aylana dógereklep turǵan háwliniń perdelerin, háwliniń kirer awzındaǵı perdeni hám arqanlar menen usılarǵa qollanılatuǵın barlıq zatlardı kóterip alıp júrsin. Usı zatlar menen baylanıslı jumıslardıń hámmesin Gershon urpaǵı orınlasın. 27 Xaron hám onıń ulları Gershon urpaǵınıń xızmetin, júklerdi tasıwın hám basqa da orınlaytuǵın wazıypaların shólkemlestirsin. 28 Gershon tiyreleriniń Ushırasıw shatırındaǵı isleytuǵın jumısları usılardan ibarat. Olar ruwxaniy Xaron ulı Itamardıń baqlawı astında xızmet etedi.

Merariy urpaǵınıń xızmetleri

29 Endi Merariy urpaǵın tiyreleri hám áwladları boyınsha sanaqtan ótkiz. 30 Ushırasıw shatırında jumıs islewge jaramlı otızdan eliw jasqa deyingi barlıq er adamlardı sana. 31 Olar Ushırasıw shatırındaǵı jumıs barısında mınalardı orınlaydı: shatırdıń taxtayların, qadaların, baqanların, ultanların, 32 shatırdı dógereklep turǵan háwliniń baqanları menen onıń ultanların, qazıqların, arqanların hám bularǵa qollanılatuǵın barlıq zatlardı kóterip alıp júrsin. Olardıń hár birine ne tasıytuǵının anıqlap, belgilep beriń. 33 Merariy tiyreleriniń Ushırasıw shatırına baylanıslı xızmeti usılardan ibarat. Olar ruwxaniy Xaron ulı Itamardıń baqlawı astında xızmet etedi.

Lebiylilerdiń jáne dizimge alınıwı

34 Muwsa, Xaron hám jámiyettiń kósemleri Qohat urpaǵın tiyreleri hám áwladları boyınsha sanap shıqtı. 35 Ushırasıw shatırında jumıs islewge jaramlı otızdan eliw jasqa deyingi barlıq er adamlardı sanap shıqqanda, 36 olardıń sanı 2750 adam boldı. 37 Ushırasıw shatırında jumıs isleytuǵın Qohat urpaǵı usılar edi. Jaratqan Iyeniń Muwsaǵa bergen buyrıǵı boyınsha Muwsa menen Xaron olardı sanap shıqtı.

38 Gershon urpaǵı da tiyreleri hám áwladları boyınsha sanaldı. 39 Ushırasıw shatırında jumıs islewge jaramlı otız jastan eliw jasqa deyingi barlıq er adamlar sanalǵanda, 40 olardıń sanı 2630 adam boldı. 41 Ushırasıw shatırında jumıs isleytuǵın Gershon urpaǵı usılar edi. Jaratqan Iyeniń buyrıǵı boyınsha Muwsa menen Xaron olardı sanap shıqtı.

42 Merariy urpaǵı da tiyreleri hám áwladları boyınsha sanaldı. 43 Ushırasıw shatırında jumıs islewge jaramlı otız jastan eliw jasqa deyingi barlıq er adamlar sanalǵanda, 44 olardıń sanı 3200 adam boldı. 45 Ushırasıw shatırında jumıs isleytuǵın Merariy urpaǵı usılar edi. Jaratqan Iyeniń Muwsaǵa bergen buyrıǵı boyınsha Muwsa menen Xaron olardı sanap shıqtı.

46 Solay etip, Muwsa, Xaron hám Izraildıń kósemleri lebiylilerdi tiyreleri hám áwladları boyınsha sanap shıqtı. 47 Ushırasıw shatırında jumıs islewge hám júk tasıwǵa jaramlı otız jastan eliw jasqa deyingi barlıq er adamlar sanalǵanda, 48 olardıń ulıwma sanı 8580 adam boldı. 49 Jaratqan Iyeniń Muwsaǵa bergen buyrıǵı boyınsha olardıń hár birine isleytuǵın xızmeti hám tasıytuǵın júkleri belgilep berildi. Solay etip, Jaratqan Iyeniń Muwsaǵa bergen buyrıǵı boyınsha barlıq adamlar dizimge alındı.