‏ Numbers 5

Jámiyettiń pákligin saqlaw

1Jaratqan Iye Muwsaǵa bılay dedi:

2– Izrail xalqına buyır. Olar teri keselligine jolıqqan, jınısıy aǵzasınan iriń yaki qan bólinip shıqqan yamasa ólige bir jerin tiygizip haramlanǵan hár bir adamdı ordadan sırtqa shıǵarıp jibersin. 3Erkek bolsın, hayal bolsın arasında Men jasap atırǵan ordanı haramlamawı ushın, olardı ordanıń sırtına shıǵarıp jibersin.

4Izrail xalqı aytılǵanlardı orınlap, Jaratqan Iyeniń Muwsaǵa buyırǵanınday olardı ordanıń sırtına shıǵarıp jiberdi.

Gúna ushın tólem tólew tuwrısında

5Jaratqan Iye Muwsaǵa bılay dedi:

6– Izrail xalqına bılay dep ayt: «Eger bir erkek yamasa hayal birewge qarsı qanday da bir gúna islep, usı arqalı Jaratqan Iyege qıyanet etse, ol adam ayıplı sanaladı. 7Bunday adam islegen gúnasın ashıq moyınlasın. Ol jábir shekken adamǵa keltirgen zıyanı ushın tólem tólesin, jáne de, onıń ústine besten bir bólegin de qosıp bersin. 8Eger de ol adam ólse hám oǵan beriletuǵın tólemdi alatuǵın birde bir jaqın aǵayini bolmasa, onda sol tólem Jaratqan Iyege tiyisli bolıp, bunı ruwxaniyge bersin. Ayıplı adam usı tólem menen birge gúnadan pákleniw ushın qurbanlıqqa bir qoshqar alıp kelsin. 9Izrail xalqınıń ruwxaniyge alıp kelgen muxaddes sadaqalarınıń barlıǵı ruwxaniyge tiyisli bolsın. 10Ruwxaniy qabıl qılǵan hár bir sadaqa ruwxaniydiń ózine tiyisli bolsın».

Hayalınan gúmanlanǵan erkek haqqında

11Jaratqan Iye Muwsaǵa bılay dedi:

12– Izrail xalqına bılay dep ayt: «Eger bir adamnıń hayalı joldan azǵırılıp, kúyewine biyopalıq qılsa, 13basqa bir adam menen jatıp, ózin haramlasa, bunı kúyewinen jasırsa hám buǵan gúwa adam bolmaǵanlıǵı sebepli hayaldıń islegeni jasırın bolsa, 14buǵan qaramastan, kúyewi hayalın qızǵanıp, oǵan qarsı júreginde gúman payda bolıwı múmkin. Yamasa hayalı biyopalıq qılmasa da, kúyewi onı qızǵanıp, júreginde oǵan qarsı gúman payda bolıwı múmkin. 15Usınday jaǵdaylarda ol adam hayalın ruwxaniyge alıp kelsin. Hayalı ushın onnan bir efa ▼

▼ Onnan bir efa – bir efa shama menen 22 l.

arpa unınan sadaqa alıp kelsin. Unnıń ústine záytún mayın yamasa xosh iyisli shayır qospasın. Sebebi bul – ayıptı esletiw ushın beriletuǵın qızǵanıw sadaqası.

16Ruwxaniy hayaldı alıp kelip, Jaratqan Iyeniń aldına turǵızsın. 17Keyin ılaydan islengen ıdısqa muxaddes suw quysın hám Muxaddes shatırdıń ishindegi jerden topıraq alıp, suwǵa salsın. 18Ruwxaniy sol hayaldı Jaratqan Iyeniń aldına turǵızǵannan soń, onıń shashın jaysın, esletiw sadaqasın, yaǵnıy qızǵanıw sadaqasın onıń qolına uslatsın. Ruwxaniydiń ózi nálet keltiretuǵın ashshı suwdı qolına uslap tursın. 19Sonnan soń, ol hayalǵa náletti tastıyıqlatıp, oǵan bılay dep aytsın: „Eger sen basqa bir erkek penen jatpaǵan bolsań, kúyewiń bola tura joldan azǵırılıp, ózińdi haramlamaǵan bolsań, onda nálet alıp keletuǵın mına suw saǵan zıyanın tiygizbesin. 20Biraq kúyewiń bola tura joldan azǵırılıp, basqa bir erkek penen jatıp, ózińdi haramlaǵan bolsań, 21onda adamlar birewdi náletlegende, Jaratqan Iye seniń atıńdı náletke qosıp aytatuǵın qılsın hám qursaǵıń zıyanlanıp, biyperzent qılsın. 22Nálet keltiretuǵın bul suw ishińe barǵanda, qursaǵıń zıyanlanıp, bala tuwa almaytuǵın qılsın“.

Sonda hayal: „Awmiyin, awmiyin“, – dep aytsın.

23Ruwxaniy bul náletlerdi bir bólek terige jazıp, onı ashshı suwǵa shaysın. 24Nálet keltiretuǵın suwdı hayalǵa ishkizsin. Suw hayaldıń ishine kirgennen soń, oǵan azap bersin. 25Ruwxaniy sol hayaldıń qolınan qızǵanıw sadaqasın alıp, Jaratqan Iyeniń aldında joqarı kóterip usınǵannan soń, sadaqanı qurbanlıq orınǵa alıp kelsin. 26Ruwxaniy ǵálle sadaqasınan bir uwıs alıp, onı tolıq sadaqanıń belgisi retinde qurbanlıq orında tútetip jandırsın. Keyin hayalǵa suwdı ishkizsin. 27Eger hayal kúyewine biyopalıq qılıp, ózin haramlaǵan bolsa, nálet alıp keletuǵın suwdı ishkende, oǵan azap beredi. Suw onıń qarnın isirip, tuwmaytuǵın qılıp taslaydı hám ol xalqı arasında náletiy bolıp qaladı. 28Biraq hayal ózin haramlamaǵan hám pák bolsa, ol ózine taǵılǵan ayıptan qutıladı hám bala kóteretuǵın boladı.

29Qızǵanshaqlıq haqqında qaǵıydalar usılardan ibarat. Eger bir hayal kúyewine biyopalıq qılıp, ózin haramlasa, 30yamasa kúyewinde hayalına degen qızǵanısh hám júreginde oǵan qarsı gúman payda bolsa, onda ruwxaniy hayaldı Jaratqan Iyeniń aldına turǵızıp, usı nızam boyınsha is tutsın. 31Sonda kúyewi hár qanday ayıptan qutıladı, hayal bolsa, islegen ayıbınıń jazasın tartadı».