‏ Numbers 6

Jaratqan Iyege baǵıshlanıw

1Jaratqan Iye Muwsaǵa bılay dedi:

2– Izrail xalqına bılay dep ayt: «Eger erkek yamasa hayal ayrıqsha wáde berip, ózin názir sıpatında Jaratqan Iyege baǵıshlasa, 3ol sharaptan hám hár qanday ótkir ishimlikten ózin tıysın. Júzimnen yamasa basqa ótkir ishimliklerden islengen sirke suwınan ishpesin. Júzimnen tayarlanǵan shireli suwdan ishpesin. Júzim de, kishmish te jemesin. 4Ol Jaratqan Iyege baǵıshlanǵan dáwirinde júzimnen tayarlanǵan hesh nárse jemesin, hátteki, júzimniń dánesinen qabıǵına deyin awzına ulıwma almasın.

5Názir sıpatında baǵıshlanǵan dáwirinde basına hesh qanday páki tiymesin. Ol ózin Jaratqan Iyege arnaǵan dáwiriniń aqırına deyin muxaddes bolsın, shashın ósirsin. 6Sol kúnler dawamında ólige jaqınlamasın. 7Hátteki, onıń anası, ákesi, aǵa-inisi yamasa ájapa-qarındası qaytıs bolsa da, olar sebepli ózin haramlamasın. Óytkeni onıń basındaǵı shashı – ózin názir sıpatında Qudayǵa baǵıshlaǵanınıń belgisi. 8Ol názir bolǵan dáwirinde Jaratqan Iyege baǵıshlanǵan boladı.

9Eger onıń janında tosattan birew qaytıs bolıp qalsa, onda ol adamnıń baǵıshlanǵan shashı haramlanadı. Sol sebepli názir bolǵan adam ózin páklew ushın jeti kúnnen keyin shashın aldırıp taslasın. 10Segizinshi kúni ol eki qumırı yamasa eki jas kepter ákelip, Ushırasıw shatırınıń aldında ruwxaniyge bersin. 11Ruwxaniy bulardıń birewin gúna qurbanlıǵı etip, ekinshisin jandırılatuǵın qurbanlıq etip bersin. Solay etip, óli sebepli ayıplı bolǵan sol adam ushın páklew rásimi ótkerilsin. Sol kúni ol óz basın qaytadan baǵıshlasın. 12Ol haramlanǵanlıǵı sebepli onıń aldınǵı baǵıshlanǵan kúnleri esapqa alınbaydı. Sonlıqtan, ayıp qurbanlıǵı ushın bir jasar erkek toqlı usınıp, Jaratqan Iyege ózin qaytadan baǵıshlawı tiyis.

13Názir bolǵan adamǵa arnalǵan qaǵıyda mınalardan ibarat: onıń baǵıshlanıw kúnleri tamam bolǵanda, ol Ushırasıw shatırınıń aldına alıp kelinsin. 14Usı jerde ol Jaratqan Iyege mına qurbanlıqlardı usınsın: jandırılatuǵın qurbanlıq ushın bir jasar minsiz bir erkek toqlı, gúna qurbanlıǵı ushın bir jasar minsiz bir qoy, tatıwlıq qurbanlıǵı ushın minsiz bir qoshqar, 15ǵálle sadaqası hám ishimlik sadaqaları menen birge bir sebet ashıtqısız nanlar – sapalı unnan záytún mayı qosılǵan shórekler, ústine záytún mayı jaǵılǵan pátirler.

16Ruwxaniy bulardı gúna qurbanlıǵı hám jandırılatuǵın qurbanlıq ushın Jaratqan Iyege usınsın. 17Keyin qoshqardı ǵálle hám ishimlik sadaqaları menen birge Jaratqan Iyege tatıwlıq qurbanlıǵı etip usınsın. Sonday-aq, sebettegi ashıtqısız nanlardı da usınsın.

18Sonnan soń, názir bolǵan adam Ushırasıw shatırınıń aldında baǵıshlanǵan shashın aldırıp, shashın tatıwlıq qurbanlıǵı jandırılıp atırǵan otqa jaǵıp jibersin.

19Názir bolǵan adam shashın aldırǵannan soń, ruwxaniy qoshqardıń qaynatılǵan aldınǵı bir sanın, sebetten ashıtqısız bir nandı hám pátirdi onıń qolına uslatsın. 20Keyin ruwxaniy bulardı Jaratqan Iyege baǵıshlaw ushın joqarı kóterip usınsın. Bular joqarı kóterip usınılǵan tós hám artqı san menen birge muxaddes bolıp, ruwxaniydiń payı sanaladı. Sonnan keyin názir bolǵan adam sharap ishiwine boladı.

21Wáde berip, názir sıpatında baǵıshlanǵan adam ushın qaǵıydalar usılardan ibarat. Ol usı qaǵıydalarǵa muwapıq Jaratqan Iyege qurbanlıqların bersin. Sonıń menen birge, qolınan kelgeninshe onnan da kóbiregin beriwine boladı. Ol bergen wádesin baǵıshlaw qaǵıydasına say anıq orınawı kerek».

Ruwxaniydiń aq pátiyası

22Jaratqan Iye Muwsaǵa bılay dedi:

23– Xaron menen onıń ullarına bılay dep ayt: «Izrail xalqına aq pátiya bergenińizde, olarǵa bılay dep aytıń:

24„Jaratqan Iye sizlerdi jarılqasın, qorǵasın!
25Jaratqan Iye sizlerge Óz júziniń nurın shashsın, rehimli bolsın!
26Jaratqan Iye sizlerge Óz názerin salsın hám tınıshlıǵın bersin!“

27Solay etip, ruwxaniyler atımdı aytıp, Izrail xalqına aq pátiya bersin. Sonda Men de olardı jarılqayman».