Num 8 | KaaIBT22L | STEP | Jaratqan Iye Muwsaǵa bılay dedi:

‏ Numbers 8

Shıralardıń ornatılıwı

1 Jaratqan Iye Muwsaǵa bılay dedi:

2 – Xaronǵa ayt, ol jeti shıranı shıra qoyǵıshqa ornatqanda, shıra qoyǵıshtıń aldınǵı tárepine jaqtılıq túsip turatuǵın qılıp ornatsın.

3 Xaron aytılǵanday etip isledi. Jaratqan Iyeniń Muwsaǵa buyırǵanınday, shıralardı shıra qoyǵıshtıń aldınǵı tárepine jaqtı túsetuǵın qılıp ornalastırdı. 4 Shıra qoyǵısh Jaratqan Iyeniń Muwsaǵa kórsetken úlgisi boyınsha, ultanınan baslap, gúllerine deyin altınnan shókkishlep islengen edi.

Lebiylilerdiń baǵıshlanıp, xızmetke qoyılıwı

5 Jaratqan Iye Muwsaǵa bılay dedi:

6 – Lebiylilerdi Izrail xalqınıń arasınan ayırıp alıp, olardı páklew rásiminen ótkiz. 7 Olardı páklew ushın bılay isleyseń: pákleytuǵın suwdı olardıń ústine serp. Olar shashları menen barlıq júnlerin qırıp taslasın hám kiyimlerin juwsın. Usılayınsha, olar pák boladı. 8 Keyin olar bir buǵa menen ǵálle sadaqası ushın záytún mayı aralastırılǵan sapalı un alıp kelsin. Gúna qurbanlıǵı ushın sen de basqa bir buǵa alıp kel. 9 Lebiylilerdi Ushırasıw shatırınıń aldına alıp kelip, barlıq Izrail jámiyetin jıyna. 10 Lebiylilerdi Jaratqan Iyeniń, yaǵnıy Meniń aldıma ákelgenińde, izraillılar olardıń ústine qolların qoysın. 11 Jaratqan Iyege xızmet etiwi ushın, Xaron izraillılardıń arasınan lebiylilerdi sadaqa sıpatında Maǵan baǵıshlasın.

12 Lebiyliler qolların buǵalardıń basına qoysın hám olardıń gúnalarınan pákleniwi ushın, buǵalardıń birewi gúna qurbanlıǵı ushın, ekinshisi jandırılatuǵın qurbanlıq ushın Jaratqan Iyege usınılsın. 13 Lebiylilerdi Xaron hám onıń ullarınıń aldında turǵız. Olardı sadaqa sıpatında Jaratqan Iyege, Maǵan baǵıshla. 14 Lebiylilerdi basqa izraillılardıń arasınan usı tárizde bólip al. Lebiyliler Maǵan tiyisli boladı.

15 Sen lebiylilerdi páklep, sadaqa sıpatında baǵıshlaǵannan soń, olar Ushırasıw shatırındaǵı xızmetin baslawına boladı. 16 Izraillılar arasında lebiyliler tolıǵı menen Maǵan tiyisli. Sebebi qarınnan birinshi shıqqan barlıq ullardıń ornına olardı Ózime tańlap aldım. 17 Izrail xalqınıń arasındaǵı barlıq birinshi tuwılǵanlar adam bolsın, haywan bolsın – olar Meniki. Óytkeni Men Mısırda birinshi tuwılǵanlardı joq qılǵan kúni, olardı Ózime ayırıp aldım. 18 Solay etip, Izrail xalqında barlıq birinshi tuwılǵan ullardıń ornına lebiylilerdi tańladım. 19 Izraillılar Muxaddes orınǵa jaqınlasıp, bálege duwshar bolmawı ushın, olardıń ornına Ushırasıw shatırındaǵı xızmetti islep, izraillılardıń gúnaların páklew ushın, lebiylilerdi Xaron hám onıń ullarınıń qollarına tapsırdım.

20 Muwsa, Xaron hám pútkil Izrail jámiyeti Jaratqan Iyeniń lebiylilerge baylanıslı Muwsaǵa bergen hár bir buyrıǵın tolıǵı menen orınladı. 21 Lebiyliler ózlerin páklep, kiyimlerin juwdı. Xaron olardı Jaratqan Iyeniń aldında arnawlı túrde baǵıshladı hám olardı tazalaw ushın, gúnalarınan pákledi. 22 Bunnan soń, lebiyliler Xaron hám onıń ullarınıń qol astında Ushırasıw shatırındaǵı ózlerine tiyisli xızmetlerin orınlawǵa keldi. Solay etip, Jaratqan Iye lebiylilerge tiyisli Muwsaǵa qanday buyrıq bergen bolsa, Izrail xalqı sol buyrıqlardı orınladı.

23 Jaratqan Iye Muwsaǵa bılay dedi:

24 – Lebiylilerge tiyisli qaǵıyda mınaday: Jigirma bes hám onnan joqarı jastaǵılar Ushırasıw shatırındaǵı xızmetin baslasın. 25 Al eliw jasqa kelgende, sol xızmetinen bosap, bunnan keyin xızmette bolmasın. 26 Xızmetten bosaǵan lebiyliler Ushırasıw shatırında xızmet etip atırǵan tuwısqanlarına járdem beriwine boladı, biraq ózleri artıq xızmet islemesin. Lebiylilerdiń wazıypaların usılayınsha belgilep ber.