‏ Numbers 9

Qutqarılıw bayramına baylanıslı nızamlar

1Izraillılar Mısırdan shıqqannan keyingi ekinshi jıldıń birinshi ayında Jaratqan Iye Sinay shólinde Muwsaǵa bılay dedi:

2– Izraillılar Qutqarılıw bayramın belgilengen waqıtta bayramlasın. 3Barlıq nızam hám qaǵıydalarǵa ámel qılıp, qurbanlıqtı belgilengen waqıtta, usı aydıń on tórtinshi kúni keshte shalsın.

4Solay etip, Muwsa izraillılarǵa Qutqarılıw bayramın belgilewdi buyırdı. 5Olar Sinay shólinde birinshi aydıń on tórtinshi kúni keshte Qutqarılıw bayramın belgiledi. Olar hár bir nárseni Jaratqan Iyeniń Muwsaǵa buyırǵanınday etip orınladı.

6Al ólige bir jerin tiygizip, haram sanalǵan bazı adamlar sol kúni Qutqarılıw bayramında qatnasa almadı. Sol kúni olar Muwsa menen Xaronnıń aldına kelip, 7Muwsaǵa bılay dedi:

– Ólige jantasqanımız ushın haram sanalamız. Biraq belgilengen waqıtta basqa izraillılar menen birge Jaratqan Iyege arnalǵan qurbanlıqtı ne ushın usına almaymız?

8Muwsa:

– Kútiń, Jaratqan Iyeniń sizler tuwralı maǵan ne buyıratuǵının tıńlap kóreyin, – dedi.

9Jaratqan Iye Muwsaǵa bılay dedi:

10– Izraillılarǵa bılay dep ayt: «Arańızda birińiz yamasa áwladıńızdan birewi ólige bir jerin tiygizgeni ushın haram sanalsa yamasa birewi uzaq saparǵa ketse, onday adam Jaratqan Iyege arnalǵan Qutqarılıw bayramın nıshanlawına boladı. 11Bunday adamlar ekinshi aydıń on tórtinshi kúni keshte Qutqarılıw qurbanlıǵın shalıp, onı ashıtqısız nan hám ashshı shópler menen jesin. 12Tańǵa deyin qurbanlıqtıń góshinen bir túyir de qalmasın, súyekleri sındırılmasın. Qutqarılıw bayramın barlıq qaǵıydalar boyınsha belgilewińiz tiyis. 13Biraq pák sanalǵan hám uzaq saparda bolmaǵan adam Qutqarılıw bayramına qatnasıwdan bas tartsa, ol belgilengen waqıtta Jaratqan Iyege arnap qurbanlıq bermegeni ushın xalqınıń arasınan joq qılınsın. Solay etip, ol óz gúnasınıń jazasın tartadı.

14Arańızda jasap atırǵan kelgindi bir adam Jaratqan Iyege arnalǵan Qutqarılıw bayramına qatnasıwdı qálese, ol bayramnıń nızam hám qaǵıydalarına ámel qılsın. Jergilikli bolsın, kelgindi bolsın, hámme ushın usı nızamdı qollanıwıńız tiyis».

Muxaddes shatır ústindegi bult

15Muxaddes shatır, yaǵnıy buyrıqlar qoyılǵan shatır tiklengen kúni onıń ústin bult qapladı. Muxaddes shatırdı qaplaǵan bult keshten azanǵa deyin ot sıyaqlı bolıp turatuǵın edi. 16Bul awhal hár kúni dawam etti. Muxaddes shatırdı qaplaǵan bult túnde ot sıyaqlı bolıp turatuǵın edi.

17Bult shatırdan joqarı kóterilgende, izraillılar jolǵa shıǵatuǵın edi. Bult qay jerde toqtasa, olar sol jerde toqtaytuǵın edi. 18Izrail xalqı Jaratqan Iyeniń buyrıǵı boyınsha jolǵa shıǵıp, Onıń buyrıǵı boyınsha toqtap, shatırların tigetuǵın edi. Bult Muxaddes shatırdı qaplap turǵan waqıtta, olar da sol jerde turatuǵın edi. 19Bult Muxaddes shatırdı uzaq waqıt qaplap turǵanda, Izrail xalqı Jaratqan Iyeniń buyrıǵına ámel qılıp, jolǵa shıqpaytuǵın edi. 20Bazıda bult Muxaddes shatırdı azǵantay kún qaplap turatuǵın edi. Xalıq ta Jaratqan Iyeniń buyrıǵı boyınsha, ya qonıs basqan jerde qalatuǵın, yamasa kóshetuǵın edi. 21Bazı waqıtları bult tek ǵana keshten azanǵa deyin turıp, azanda Muxaddes shatırdan kóteriletuǵın edi. Sonda xalıq jolǵa shıǵatuǵın edi. Túnde bolsın, kúndiz bolsın, bult shatırdan kóteriliwden, xalıq jolǵa shıǵatuǵın edi. 22Bult Muxaddes shatırdı eki kún, bir ay yamasa uzaq waqıt qaplap tursa da, izraillılar qonıs basqan jerinde qalıp, jolǵa shıqpaytuǵın edi. Biraq bult joqarı kóteriliwden, olar jolǵa shıǵatuǵın edi. 23Olar Jaratqan Iyeniń buyrıǵı boyınsha qonıs basatuǵın yamasa jolǵa shıǵatuǵın edi. Usılay etip, olar Jaratqan Iyeniń Muwsa arqalı bergen buyrıǵına ámel qıldı.