‏

Kitaptıń avtorı Obadiya payǵambar Edom eli haqqında payǵambarshılıq qıladı. Edom xalqı Qudaydıń tańlaǵan xalqına úzliksiz dushpanlıq qılıp kelgeni ushın, Obadiya Edom eliniń pútkilley wayran bolatuǵının járiyalaydı. Bul kitap Muxaddes Kitaptıń ishindegi eń qısqası bolıwına qaramastan, Qudaydıń qatań húkiminen xabar beredi.

Babiloniyalılar b. e. sh. 605-586-jılları dawamında Erusalimge bir neshe márte hújim qılıp, qalanı basıp aladı. Olar Yahuda xalqın Babiloniyaǵa súrgin etip alıp ketedi. Obadiya payǵambar bul kitaptı sol awır dáwirde, birinshi súrgin jıllarında jazadı. Óli teńizdiń qublasındaǵı tawlı aymaqta jasaǵan edom xalqı Erusalimniń qulaǵanına quwanadı. Yahuda xalqınıń basına túsken bul apattan olar tek shadlanıp ǵana qoymastan, qalanı tonaydı, basqınshılarǵa járdem beredi. Quday edom xalqın usı qılmısı ushın jazalaydı, olar menen bir qatar basqa xalıqlardı da húkim qıladı.

Obadiya bul xabardı Yahuda xalqınıń keleshektegi jeńisleri menen tamamlap, tutqınnan qaytıp keletuǵın Qudaydıń xalqı Edom eliniń ústinen húkimdarlıq qılatuǵının aytadı.

‏ Obadiah

Edomnıń jazalanıwı

1Bul Obadiyanıń kórgen ayanı.

Quday Iye Edom haqqında bul sózlerdi ayttı.

Jaratqan Iyeden bir xabar esittik.
Milletlerge jollanǵan jarshı:
«Kelińler, Edomǵa urıs ashayıq!» – dedi.

2«Háy, Edom, seni milletler arasında arzımas qılaman,
Sen oǵada jek kórinishli bolasań.
3Jartastıń jarıqlarında jasap,
Tóbelerdiń biyik shoqqılarına jaylastıń,
Júregińdegi tákabbirlik seni aldadı.
Ózińshe: „Kim meni jerge túsire aladı?“– dediń.
4Búrkittey joqarılasań da,
Uyań juldızlar arasında bolsa da,
Ol jerden tómenge túsiremen seni,
– dedi Jaratqan Iye. –
5Urı hám qaraqshılar túnde kelse,
Tek ǵana ózlerine keregin almay ma?
Júzim teretuǵınlar baǵıńa kirse,
Azǵantay bolsa da, júzim qaldırmay ma?
Biraq sen tolıq nabıt bolasań.
6Esawdıń áwladı – Edom,
Seniń hámme nárseń talan-taraj qılınatuǵını sonshelli,
Hátteki, jasırın ǵáziyneleriń de tabılıp, tartıp alınadı.
7Barlıq awqamlaslarıń saǵan qarsı shıǵıp,
Seni óz jerińnen quwıp shıǵaradı.
Kelisim dúzgenleriń seni aldap, jeńiliske ushıratadı,
Nanıńdı jegenler saǵan duzaq quradı,
Al sen bunı bilmey qalasań.
8Sol kúni,
– deydi Jaratqan Iye, –
Edomnıń dana adamların,
Esawdıń tawlı jerindegi aqıllı adamlardı joq qılaman.
9Háy, Teman, seniń jawıngerleriń qorqınıshqa túsedi,
Esawdıń tawlı jerindegi hár bir adam joq qılınadı.

10Tuwısqanıńa, yaǵnıy Yaqıpqa,
Islegen jawızlıqlarıń ushın shermende bolıp,
Máńgige joq bolasań.
11Onıń mal-múlkin jat jerliler alıp ketken kúni,
Sen uzaqtan qarap turdıń.
Jat xalıqlar Erusalim dárwazalarına kirip,
Ol ushın shek taslaǵanda,
Sen de olar sıyaqlı is tuttıń.
12Tuwısqanıńnıń basına túsken baxıtsızlıǵı ushın,
Qol qawsırıp, qarap turmawıń kerek edi.
Yahuda xalqı qırǵınǵa ushıraǵanda, quwanbawıń kerek edi,
Apat kúnlerinde, maqtanbawıń kerek edi.
13Xalqım apatqa ushıraǵan kúni, qala dárwazalarına kirmewiń kerek edi.
Sol kúni xalqım ushıraǵan baxıtsızlıqqa quwanbawıń kerek edi.
Olar azapqa duwshar bolǵanda, mal-múlkin olja qılmawıń kerek edi.
14Qashıp baratırǵanlardı óltiriw ushın,
Jol kesilispelerin tospawıń kerek edi.
Sol apat kúninde aman qalǵanlardı,
Dushpan qolına tapsırmawıń kerek edi».

Qudaydıń basqa xalıqlardı húkim qılıwı

15«Meniń, Jaratqan Iyeniń barlıq xalıqlardı húkim qılatuǵın kúnim jaqınlastı,
Háy, Edom, sen ne islegen bolsań, saǵan da sol islenedi,
Islegen qılmıslarıń óz basıńa túsedi.
16Sizler muxaddes tawımda ǵázep sharabın iship alǵanıńız sıyaqlı,
Barlıq xalıqlar da sol sharaptan simiredi.
Iship-iship bul dúnyadan joq bolıp ketedi».

Izraildıń jeńisi

17«Sion tawı aman qalǵanlarǵa pana boladı,
Ol jer muxaddes boladı.
Yaqıptıń urpaqları tartıp alınǵan múlkine qaytadan iyelik qıladı,
18Yaqıptıń urpaqları ot,
Yusuptiń xalqı jalın,
Esawdıń xalqı saban bolıp qaladı.
Olardı órtep, joq qıladı,
Esawdıń áwladınan aman qalǵanı bolmaydı».
Bular Jaratqan Iyeniń sózleri.

19Negebte jasaytuǵın Yahuda xalqı Esawdıń tawlı jerin iyeleydi. Al batıstaǵı taw eteklerinde jasaytuǵınlar Filist, Efrayım hám Samariya jerlerin iyeleydi. Benyaminliler Giladtı iyelep aladı. 20Súrgin etilgen izraillı jawıngerler Sarafatqa deyin sozılǵan Qanan jerlerin iyeleydi. Erusalimnen súrgin qılınıp Sefaradta jasap atırǵanlar Negebtegi qalalardı iyelep aladı. Jeńimpazlar Esawdıń tawlı jerine húkimdarlıq qılıw ushın, Sion tawına shıǵadı. Bul patshalıq Jaratqan Iyege tiyisli boladı. 21