‏

Bul xattı elshi Pavel Filimon atlı masiyxıyǵa jazǵan. Filimon Kolosa qalasındaǵı jámááttiń aǵzası bolıwı múmkin. Filimonnıń Onisim degen qulı bar edi. Bul qul xojayınınan qashıp ketkennen keyin, Rimde Pavel menen qamaqta birge bolıp, Pavel arqalı iseniwshi boladı. Qamaqta Onisim Pavelge xızmet etken hám oǵan óz ulınday bolıp qalǵan edi. Sonlıqtan Pavel Onisimdi xojayınına jibergende, ol ushın Filimonǵa ótinish etip, endi onı qul sıpatında emes, al súyikli tuwısqan sıpatında qabıl etiwdi jazadı.

‏ Philemon

Sálemnama

1Iysa Masiyx ushın tutqın bolǵan men, Pavelden hám tuwısqanımız Timofeyden, bizler menen birge xızmet etetuǵın súyikli Filimonǵa sálem! 2Jáne de, apamız Afiyaǵa, bizler menen birge Qudaydıń áskeri bolǵan Arxipke hám seniń úyińdegi iseniwshiler jámáátine de sálem jollaymız. 3Ákemiz Quday hám Iyemiz Iysa Masiyx sizlerge miyrim hám tınıshlıq bersin!

Filimonnıń isenimi hám súyispenshiligi

4Men duwa etkenimde seni tilge alıp, Qudayıma bárqulla shúkirlik bildiremen. 5Sebebi seniń Iyemiz Iysaǵa degen isenimiń hám pútkil muxaddeslerge ▼

▼ Muxaddesler – Iysaǵa iseniwshiler.

degen súyispenshiligiń haqqında esitip atırman. 6Isenimińdi basqalar menen bólisiwde tásirli bolıwıń ushın, qullası, Masiyx arqalı bizler iye bolatuǵın hár qanday iygilikti biliwde jetilisip barıwıń ushın duwa etip atırman. 7Óytkeni tuwısqanım, sen sebepli muxaddeslerdiń kewilleri kóterilip qaldı. Solay etip, seniń súyispenshiligiń maǵan úlken quwanısh hám táselle berdi.

Paveldiń Onisim ushın ótinish etiwi

8Sonlıqtan Masiyxtıń elshisi sıpatında wazıypańdı atqarıwdı saǵan buyırıwǵa biyligim bolsa da, 9– 10házir Iysa Masiyx ushın tutqın bolǵan men, ǵarrı Pavel, qamaqta meniń ulım bolǵan Onisim ushın sennen súyispenshilik penen ótinip sorayman. 11Ol bir waqıtları saǵan paydasız bolǵan edi, biraq endi bolsa saǵan da, maǵan da júdá paydalı bolıp qaldı.

12Onı, yaǵnıy óz júrek-bawırımdı saǵan qaytarıp jiberip atırman. 13Xosh Xabar ushın qamaqta bolǵanımda, seniń ornıńda maǵan xızmet etiwi ushın onı janımda alıp qalıwdı qáler edim. 14Biraq, seniń isleytuǵın jaqsılıǵıń májbúriy túrde emes, al óz ıqtıyarıń menen bolıwı ushın, seniń qayılshılıǵıńsız hesh nárse islegim kelmedi. 15Múmkin, onıń sennen waqıtsha ayra túskeniniń sebebi onı máńgige qaytarıp alıwıń ushın bolǵan shıǵar. 16Onı endi qul dep emes, al quldan zıyat súyikli tuwısqanıń sıpatında qabıl et. Ásirese men ushın ol júdá qádirli. Al sen ushın bolsa, ol hám qul sıpatında, hám Iyemizdegi bir tuwısqan sıpatında jáne de qádirlirek boladı.

17Sonlıqtan eger meni joldasım dep sanaytuǵın bolsań, onı meni qabıl etkendey, qabıl et. 18Ol saǵan qanday da bir jamanlıq islegen bolsa yamasa qarızdar bolsa, meniń esabıma jazıp qoy. 19Men, Pavel, bunı óz qolım menen jazıp atırman: men tóleymen. Al seniń maǵan óz ómiriń menen qarızdar ekenińdi aytpay-aq qoyayın. 20Awa, tuwısqanım, men sennen Iyemiz aldında bir járdem alayın. Masiyx aldında kewlimdi kóter. 21Qulaq asatuǵınıńa isenip, saǵan jazıp atırman. Seniń aytqanımnan da artıq isleytuǵınıńdı bilemen.

22Sonıń menen birge, maǵan turatuǵın bir orın da tayarla. Óytkeni Quday sizlerdiń duwa etip soraǵanlarıńızǵa juwap berip, meni sizlerge jiberetuǵınınan úmit etemen.

Sońǵı sálemnama

23Iysa Masiyx ushın meniń menen birge tutqın bolǵan Epafras saǵan sálem aytıp atır. 24Jáne de, bizler menen xızmet etip atırǵan Mark, Aristarx, Dimas hám Luka da saǵan sálem jollap atır.

25Iyemiz Iysa Masiyxtıń miyrimi sizlerge yar bolsın!