‏ Philippians 1

Sálemnama

1Masiyx Iysanıń qulları bolǵan bizler, Pavel hám Timofeyden, Filip qalasındaǵı Iysa Masiyxqa tiyisli bolǵan barlıq muxaddeslerge ▼

▼ Muxaddesler – Iysaǵa iseniwshiler.

, ásirese jámáát jetekshileri menen xızmetshilerine sálem! 2Ákemiz Quday hám Iyemiz Iysa Masiyx sizlerge miyrim hám tınıshlıq bersin!

Paveldiń shúkirlik bildirip, duwa etiwi

3Sizlerdi hár sapar eske alǵanımda, Qudayǵa shúkirlik bildirip atırman. 4Men Qudayǵa duwa etkenimde, sizler ushın hár qashan quwanısh penen sorayman. 5Sebebi sizler bastan baslap házirgi waqıtqa deyin Xosh Xabardı járiyalawǵa úles qosıp kelmektesizler. 6Sizlerdiń arańızda jaqsı isti baslaǵan Qudaydıń bunı Masiyx Iysanıń kúnine shekem tolıq tamamlaytuǵınına anıq isenemen. 7Hámmeńiz tuwralı usınday pikirde bolıwım orınlı, óytkeni sizler hámme waqıt meniń júregimdesiz. Men tutqın bolǵanımda da, Xosh Xabardı jaqlaǵanımda da, onıń haqıyqatın turaqlılıq penen dálillegenimde de, hámmeńiz meniń menen birge Qudaydıń miyrimin bólisip kelmektesiz. 8Sizlerdiń hámmeńizdi Masiyx Iysanıń súyispenshiligi menen qalay saǵınǵanıma Qudaydıń Ózi gúwa. 9Súyispenshiligińiz tolıq bilim hám tereń túsiniwshilik penen ósip arta beriwi ushın duwa etip atırman. 10Solay etip, sizler eń joqarı iygiliktiń ne ekenin ayıra alatuǵın bolıp, Masiyxtıń keletuǵın kúninde pák hám minsiz bolasızlar. 11Jáne de, Qudaydı ullılap, alǵıs-maqtawlar aytıwıńız ushın, Iysa Masiyx arqalı haqlıq jemisine bay bolasızlar.

Ómirimniń mánisi – Masiyx

12Tuwısqanlarım, mınanı biliwińizdi qáleymen: meniń basımnan keshirgenlerim Xosh Xabardıń jáne de kóbirek jayılıwına haqıyqattan da járdem etti. 13Meniń Masiyx ushın tutqın bolǵanım pútkil saray saqshılarına hám qalǵan hámme adamlarǵa málim boldı. 14Sonday-aq, meniń tutqınlıǵım sebepli, kóplegen tuwısqanlarımızdıń Iyemizge degen isenimi bekkemlendi. Olar qorqpastan, Qudaydıń sózin burınǵıdan da kóbirek batırlıq penen aytıwǵa kiristi. 15Durıs, geybirewler Masiyx haqqında kúnshillik penen, jarıspaqqa járiyalasa, al bazılar jaqsı niyet penen járiyalamaqta. 16Usı keyingiler meniń bul jerge Xosh Xabardıń qorǵawshısı etip qoyılǵanımdı bilip, bunı súyispenshilik penen islep atır. 17Al aldınǵıları meniń tutqınlıq awhalımdı ele de awırlastırmaqshı bolıp, Masiyx haqqında ózleriniń ataq-abırayları ushın napák niyet penen járiyalamaqta. 18Biraq, solay bolsa ne bolıptı? Meyli, jaman niyet penen bolsın, meyli, haq niyet penen bolsın, Masiyx haqqında qanday jol menen járiyalansa da, men buǵan quwanaman.

Awa, men quwana beremen de. 19Sebebi sizlerdiń etken duwalarıńızdıń hám Iysa Masiyxtıń Ruwxınıń járdemi menen, bul awhalımnan azat bolatuǵınımdı bilemen.

20Qanday jaǵday bolsa da, shermende bolmawdı qáleymen. Tiri bolsam da, ólsem de, hár qashan bolıp kelgenindey, házir de Masiyxtı denemde ullılaw ushın tolıq batırlıq kórsetiwden bekkem úmit etemen. 21Óytkeni meniń ushın ómirimniń mánisi – bul Masiyx, al ólim utıs demek. 22Biraq, eger bul dúnyada ómir súriwim arqalı ónimli miynet etsem, onda neni tańlawdı bilmeymen. 23Meni eki tárep te ózine tartadı. Bul dúnyadan ketip, Masiyx penen birge bolıwdı qáleymen. Sebebi bul anaǵurlım jaqsıraq. 24Biraq, bul dúnyada qalıwım sizler ushın kereklirek. 25Buǵan kózim jetkenlikten, qalatuǵınımdı bilemen. Isenimde ósip quwanıwıńız ushın, hámmeńiz benen birge bolaman. 26Solay etip, jáne janıńızǵa kelgenimde, Masiyx Iysada men sebepli jáne de kóbirek maqtana alasızlar.

27Tek jasap atırǵan ómirińiz Masiyxtıń Xosh Xabarına ılayıqlı bolsın. Sol waqıtta kelip sizlerdi kórsem de, alısta bolıp hal-jaǵdayıńızdı esitsem de, sizlerdiń bir ruwxta bekkem turǵanıńızdı, Xosh Xabarǵa degen isenim ushın bir jan, bir tán bolıp gúresip atırǵanıńızdı bileyin. 28Jáne de, ózlerińizge qarsı shıqqanlardan hesh qorqpaytuǵınıńızdı da esiteyin. Sizlerdiń bunday batırlıǵıńız olardıń nabıt bolatuǵınınıń, al sizlerdiń qutqarılatuǵınıńızdıń belgisi hám Qudaydıń isi. 29Óytkeni Quday sizlerge Masiyxqa tek iseniwdi emes, al Ol ushın azap shegiwdi de ayrıqsha huqıq etip bergen. 30Usı azaptı basımnan keshirgenimdi sizler kórdińler hám házir de azap shegip atırǵanımdı esitip atırsızlar. Meniń bul gúresime sizler de sheriksizler.