Phili 3 | KaaIBT22L | STEP | Tuwısqanlarım, juwmaqlap aytqanda, Iyemiz benen qatnasta bolıp quwanıńlar. Sizlerge birdey nárselerdi qaytalap jazıw meni zeriktirmeydi, jáne de bul sizler ushın zıyansız.

‏ Philippians 3

Qudaydıń haqıyqatlıǵı

1 Tuwısqanlarım, juwmaqlap aytqanda, Iyemiz benen qatnasta bolıp quwanıńlar. Sizlerge birdey nárselerdi qaytalap jazıw meni zeriktirmeydi, jáne de bul sizler ushın zıyansız.

2 Iyttey bolǵan jalǵan muǵallimlerden, jamanlıq islewshilerden, qutqarılıw ushın súnnet etiliw tiyis, dewshilerden saq bolıńlar! 3 Óytkeni bizler – ruwxıy súnnet etilgen Qudaydıń xalqımız. Bizler Qudayǵa Onıń Ruwxı arqalı sıyınamız, Masiyx Iysa menen maqtanıp, óz denemizge súyenbeymiz. 4 Negizinde men olarǵa súyene alar edim. Eger basqa birew óz shıǵısıma hám erisken nárselerime súyeniwge dálilim bar dep oylasa, meniki onıkinen de kóbirek: 5 men segiz kúnlik waqtımda súnnet etildim. Izrail xalqınan, Benyamin urıwınan bolǵan naǵız evreymen. Muxaddes Nızam boyınsha pariseymen. 6 Diniy inta boyınsha iseniwshiler jámáátin quwdalaǵan hám Muxaddes Nızam talap etken haqlıq boyınsha kemshiliksiz adam edim.

7 Biraq, bir waqıtları áhmiyetli dep bilgen bul nárselerimdi endi Masiyx ushın paydasız dep esaplayman. 8 – 9 Awa, men hámme nárseni Iyem Masiyx Iysanı biliwdiń artıqmashlıǵı aldında paydasız dep sanayman. Jáne de, men Masiyx ushın hámme nárseden bas tarttım hám Oǵan erisip, Onıń menen birge bolıw ushın, hámmesin sıpırındı dep esaplayman. Endi Muxaddes Nızamdı orınlawım arqalı alatuǵın óz haqlıǵıma emes, al Masiyxqa degen isenim arqalı beriletuǵın, yaǵnıy Qudaydıń isenimimizge qaray beretuǵın haqlıǵına iyemen. 10 Qáne endi, Masiyxtıń Ózin hám Onıń qayta tiriliwiniń kúshin bilip alsam. Onıń azaplarına qatnasıp, ólimine de sherik bolsam. 11 Solay etip, túbinde ólimnen qayta tiriliwge erissem.

Maqsetke jetiwge tırısıw

12 Men bularǵa álle qashan eriskenim yamasa jetiskenim ushın aytıp atırǵan joqpan. Al, Masiyx meni qanday maqset ushın tańlap alǵan bolsa, men sol maqsetke jetiwge tırısıp atırman. 13 Tuwısqanlar, men ózimdi usı maqsetke jettim dep esaplamayman. Tek ǵana izde qalǵanlardı esten shıǵarıp, aldındaǵılarǵa umtılıp atırman. 14 Qudaydıń sıyına, Onıń Masiyx Iysa arqalı aspanǵa shaqırıwına erisiw ushın, men belgilengen maqsetke jetiwge tırısıp atırman.

15 Solay etip, aramızdaǵı isenimi jetisken adamlardıń hámmesi usı oy-pikirge iye bolsın. Eger sizler basqasha oylaytuǵın bolsańız, Quday sizlerge bunı da ashıp beredi. 16 Degen menen, qanday dárejege erisken bolsaq, sol dárejege say pikirlep, sol dárejege say ómir súreyik.

17 Tuwısqanlarım, hámmeńiz birlikte mennen órnek alıńlar. Bizlerdiń sizlerge kórsetken órnegimiz boyınsha jasap atırǵanlarǵa dıqqat awdarıp, olardan úlgi alıńlar. 18 Sizlerge kóp márte aytqanımday, házir de kóz jaslarımdı tógip tákirarlap atırman: kóp adamlar Masiyxtıń atanaq aǵashtaǵı qurbanlıǵın qabıl etpey, Onıń dushpanı bolıp jasamaqta. 19 Bundaylardıń aqıbeti – nabıt bolıw, olardıń qudayı – óz qulqını. Olar uyatsız qılıqları menen maqtanıp, tek bul dúnyanıń qızıǵın ǵana oylaydı. 20 Biraq, biziń watanımız aspanda. Bizler sol jerden Qutqarıwshımız bolǵan Iyemiz Iysa Masiyxtıń keliwin kútpektemiz. 21 Hámme nárseni boysındıra alatuǵın qúdireti menen, Ol bizlerdiń hálsiz hám ótkinshi denemizdi ózgertip, Óziniń dańqlı denesine uqsatadı.